ផលិតផលសម្គាល់ភូមិសាស្ត្រ គឺស្លាកសញ្ញាសម្គាល់លើផលិតផលដែលមានប្រភពភូមិសាស្ត្រជាក់លាក់ និងមានគុណសម្បត្ដិ ឬកេរ្ដិ៍ឈ្មោះដែលទាក់ទងនឹងភូមិសាស្រ្តរបស់ផលិតផលនោះ ដែលនាំឱ្យផលិតផលនោះខុសពីផលិតផលធម្មតា។ ផលិតផលសម្គាល់ភូមិសាស្ត្រដែលល្បីៗនៅលើពិភពលោក ដូចជា ស្រាសំប៉ាញ របស់ប្រទេសបារាំង Gruyere cheese របស់ប្រទេសស្វីស ជាដើម។ សំរាប់ប្រទេសកម្ពុជា យើងក៏មានផលិតផលសម្គាល់ភូមិសាស្ត្រ ដូចជា ម្រេចកំពត ស្ករត្នោតកំពង់ស្ពឺ ក្រូចថ្លុងក្រចេះ ទឹកឃ្មុំមណ្ឌលគិរី ប្រហុកសៀមរាប។ ក្រៅពីនេះទៀតផលិតផលរបស់ប្រទេសកម្ពុជា ជាច្រើនទៀតដែរកំពុងដំណើរការចុះបញ្ជីការពារជាផលិតផលសម្គាល់ភូមិសាស្ត្រដូចជា អង្ករបាត់ដំបង អំបិលកែប ក្រូចពោធិ៍សាត់។ នៅផ្សារសរីរាង្គខ្មែរ បងប្អូនទាំងអស់ អាចស្វែងរកផលិតផលសម្គាល់ភូមិសាស្ត្រ ដូចជាទឹកឃ្មុំព្រៃមណ្ឌលគីរី ដែលមានរសជាតិផ្អែមឈ្ងុយឆ្ងាញ់ដូចផ្កា ដែលត្រូវបានប្រមូលដោយសហគមន៍ជនជាតិដើមភាគតិចនៅខេត្តមណ្ឌលគិរី ដោយប្រើវិធីសាស្ត្រប្រពៃណី។ វាគឺជាសិល្បៈមួយដែលបានបន្សល់ទុកពីជំនាន់មួយទៅជំនាន់មួយ។ អ្នកប្រមូលទឹកឃ្មុំព្រៃតែងបន្សល់ទុកទឹកឃ្មុំគ្រប់គ្រាន់ ដើម្បីឱ្យសត្វឃ្មុំអាចបន្តរស់នៅបាន ដែលជាវិធីសាស្ត្រជួយទៅដល់ព្រៃឈើ និងសត្វព្រៃផងដែរ៕ ប្រភពពី៖ Khmer Organic Shop