ពិធីជួបសំណេះសំណាលជាមួយពលករខ្មែរចំនួន ២៤រូប ដែលទើបត្រឡប់មកពីប្រទេសថៃ នៅស្រុកកែវសីមា ខេត្តមណ្ឌលគិរី ស្រុកកែវសីមា៖ នៅព្រឹកថ្ងៃទី១០ ខែតុលា ឆ្នាំ២០២៥ ឯកឧត្តម ទិន ពន្លក រដ្ឋលេខាធិការក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកែវសីមា ឯកឧត្តម ថង សាវុន អភិបាលនៃគណ:អភិបាលខេត្តមណ្ឌលគិរី បានជួបសំណេះសំណាលជាមួយពលករខ្មែរដែលវិលត្រឡប់មកពីប្រទេសថៃ ដោយមានការចូលរួមពី ឯកឧត្តម សួន សុខឃីម រដ្ឋលេខាធិការក្រសួងផែនការ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកកែវសីមា លោក សាន់ ដារិទ្ធ អភិបាលរងខេត្ត ព្រមទាំងមានការចូលរួមពីលោក លោកស្រី ជាប្រធាន អនុប្រធានមន្ទីរជំនាញជុំវិញខេត្ត ថ្នាក់ដឹកនាំស្រុកកែវសីមា និងមន្ត្រីជំនាញជាច្រើនរូបទៀត។ រាជរដ្ឋាភិបាលមានការគិតគូរយកចិត្តទុកដាក់ខ្ពស់ចំពោះសុខមាលភាព និងសិទ្ធិពលករក្នុងការវិលត្រឡប់មកប្រទេសវិញដោយសុវត្ថិភាព ។ ឯកឧត្តម ថង សាវុន អភិបាលខេត្ត បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលជានិច្ចកាល សម្តេចតែងតែគិតគូពីសុខមាលភាពរបស់ប្រជាពលរដ្ឋទូទៅជាពិសេសពលករខ្មែរដែលទើបត្រឡប់មកពីប្រទេសថៃ ។ ឯកឧត្តមបន្តថាពិធីជួបនេះក្នុងគោលបំណង ដើម្បីស្វាគមន៍ពលករខ្មែរដែលបានវិលត្រឡប់មកប្រទេសវិញដោយសុខសុវត្ថិភាព ស្តាប់ និងដោះស្រាយបញ្ហាប្រឈម ជាពិសេសផ្តល់ព័ត៌មានអំពីការងារក្នុងស្រុក រួមទាំងការជម្រុញឱកាសការងារ និងបណ្តុះបណ្តាលវិជ្ជាជីវ:ក្នុងស្រុក ។ ឯកឧត្តមបានផ្តល់កម្លាំងចិត្តដល់ប្រជាពលរដ្ឋទាំងអស់ឱ្យរកការងារធ្វើនៅស្រុកខ្មែរវិញ ព្រោះថាបច្ចុប្បន្នប្រទេសកម្ពុជាយើងកំពុងត្រូវការកម្មករជាច្រើនរូប ដើម្បីបំរើការងារតាមជំនាញដែលយើងចេះនៅតាមបណ្តាក្រុមហ៊ុន សហគ្រាសនានានៅក្នុងខេត្តមណ្ឌលគិរី ក៏ដូចជានៅតាមបណ្តារាជធានី ខេត្ត ។ ឯកឧត្តម ទិន ពន្លក រដ្ឋលេខាធិការក្រសួងបរិស្ថានបានមានប្រសាសន៍ថា បងប្អូនពលករដែលមិនទាន់មានជំនាញ អាចរៀនជំនាញបច្ចេកទេស និងវិជ្ជាជីវ:នៅមជ្ឈមណ្ឌលបណ្តុះបណ្តាលបច្ចេកទេស និងវិជ្ជាជីវ:ខេត្ត និងតាមបណ្តាគ្រឹះស្ថានអប់រំដោយឥតគិតថ្លៃ ។ ឯកឧត្តមបានអំពាវនាវដល់បងប្អូនពលករខ្មែរត្រឡប់មកពីប្រទេសថៃដែលមិនទាន់ទទួលបានការងារធ្វើ សូមចូលរួមឱ្យបានគ្រប់ៗគ្នាដើម្បីទទួលបានឱកាសការងារធ្វើក្នុងស្រុកដែលមានអត្ថប្រយោជន៍ជាច្រើន ។ នាឱកាសនោះ ក្រុមការងាររាជរដ្ឋាភិបាលចុះមូលដ្ឋានស្រុកកែវសីមា និងក្រុមការងារខេត្តបានពាំនាំយកថវិកា និងកញ្ចប់មួយចំនួន ដែលមានការចូលរួមជួយឧបត្ថម្ភពីឯកឧត្តម ឈួន វិន ឯកឧត្តម ថង សាវុន មន្ទីរជំនាញជុំវិញខេត្ត និងរដ្ឋបាលស្រុកកែវសីមា ផ្តល់ជូនពលករខ្មែរដែលទើបត្រឡប់មកពីប្រទេសថៃមានទីលំនៅនៅក្នុងស្រុកកែវសីមា ចំនួន ២៤នាក់ ក្នុងម្នាក់ៗទទួលបានថវិកាមួយចំនួន ដើម្បីជួយដោះស្រាយជីវភាពបានមួយកម្រិតផងដែរ ៕