ការពិនិត្យការសាងសង់បណ្តាញលូលើកំណាត់ផ្លូវជាតិលេខ៦ ស្ថិតក្នុងគម្រោងឆ្នាំ២០២៥ និងកិច្ចប្រជុំពិនិត្យពិភាក្សាពីស្ថានភាពទូទៅពាក់ព័ន្ធនឹងប្រព័ន្ធទឹកកខ្វក់ នៅក្រុងស្ទឹងសែន ខេត្តកំពង់ធំ ខេត្តកំពង់ធំ៖ ថ្ងៃទី៩ ខែតុលា ឆ្នាំ២០២៥ ឯកឧត្តម គួច ប៊ុនលាត រដ្ឋលេខាធិការក្រសួងសាធារណការ និងដឹកជញ្ជូន បានចុះពិនិត្យគម្រោងឆ្នាំ២០២៥ សាងសង់បណ្តាញលូលើកំណាត់ផ្លូវជាតិលេខ៦ ក្នុងចន្លោះគ.ម១២៧+៥៧០ ដល់ គ.ម១២៨+៤៦០ ប្រវែង ១ ៥៩០ម និងដឹកនាំកិច្ចប្រជុំពិនិត្យពិភាក្សាពីស្ថានភាពទូទៅពាក់ព័ន្ធនឹងប្រព័ន្ធទឹកកខ្វក់នៅក្រុងស្ទឹងសែន ខេត្តកំពង់ធំ ដោយមានការចូលរួមពីសំណាក់ឯកឧត្តមអគ្គនាយក លោកអគ្គនាយករង លោកប្រធាន អនុប្រធាននាយកដ្ឋាន មន្ត្រីបច្ចេកទេសពាក់ព័ន្ធ នៃអគ្គនាយកដ្ឋានប្រព័ន្ធចម្រោះទឹកកខ្វក់ កសកដ ព្រមទាំងលោកប្រធាន អនុប្រធានមន្ទីរ និងមន្ត្រីបច្ចេកទេសនៃមន្ទីរសាធារណការ និងដឹកជញ្ជូនខេត្តកំពង់ធំ។ កិច្ចប្រជុំមានគោលបំណងសំខាន់ដើម្បីពិនិត្យពិភាក្សាពីកិច្ចដំណើរការនៃប្រតិបត្តិការ និងការថែទាំស្ថានីយប្រព្រឹត្តកម្មទឹកកខ្វក់នៅក្នុងក្រុងស្ទឹងសែន និងស្ថានភាពបច្ចុប្បន្ននៃប្រព័ន្ធទឹកកខ្វក់នៅតាមតំបន់នានា ដើម្បីកំណត់វិធានការសមរម្យណាមួយ សម្រាប់ការគ្រប់គ្រង និងអភិវឌ្ឍប្រព័ន្ធទឹកកខ្វក់ឱ្យមានប្រសិទ្ធភាពកាន់តែល្អប្រសើរប្រកបដោយចីរភាព និងនិរន្តរ៍ភាព។ ឯកឧត្តមប្រធានអង្គប្រជុំ ក៏បានផ្តល់អនុសាសន៍ណែនាំដល់មន្ទីរសាធារណការ និងដឹកជញ្ជូនខេត្តកំពង់ធំគិតពិចារណាបង្កើតក្រុមការងារសន្តិសុខប្រព័ន្ធទឹកកខ្វក់ ដោយមានការចូលរួមពីអាជ្ញាធរមូលដ្ឋាននៅតាមទីប្រជុំជន ក្រុង ស្រុក ដើម្បីងាយស្រួលនៅពេលមានបញ្ហាប្រឈមណាមួយពាក់ព័ន្ធនឹងទឹកកខ្វក់ គឺយើងអាចទាក់ទងគ្នាបានឆាប់រហ័ស និងងាយស្រួលក្នុងការស្វែងរកដំណោះស្រាយបានភ្លាមៗជូនដល់ប្រជាពលរដ្ឋ ព្រមទាំងបានណែនាំដល់ប្រធានមន្ទីរ និងមន្រ្តីក្រោមឱវាទប្រកបខ្លួនដើរតួនាទីជាវេជ្ជបណ្ឌិតប្រព័ន្ធទឹកកខ្វក់ផងដែរ។ ជាចុងបញ្ចប់ឯកឧត្តមប្រធានអង្គប្រជុំក៏បានថ្លែងអំណរគុណដល់ឯកឧត្តមអភិបាលខេត្តកំពង់ធំ ដែលបានយកចិត្តទុកដាក់ ក៏ដូចជាគាំទ្រដល់មន្ទីរសាធារណការ និងដឹកជញ្ជូនខេត្តកំពង់ធំ ពាក់ព័ន្ធនឹងវិស័យទឹកកខ្វក់ ជាពិសេសការងារប្រតិបត្តិការ និងថែទាំស្ថានីយប្រព្រឹត្តកម្មទឹកកខ្វក់ ដែលកំពុងស្ថិតក្នុងស្ថានភាពលំបាកដូចជា ការទូទាត់ថ្លៃប្រើប្រាស់ចរន្តអគ្គិសនី និងការចំណាយផ្សេងៗរបស់មន្ទីរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube