ប្រជាពលរដ្ឋ ជាពិសេសអាណាព្យាបាលសិស្សានុសិស្ស រស់នៅក្នុងភូមិពូហ៊ួង ឃុំចុងផ្លាស់ ស្រុកកែវសីមា ខេត្តមណ្ឌលគិរី អំពាវនាវយ៉ាងទទូចទៅកាន់អាជ្ញាធរពាក់ព័ន្ធ ធ្វើការជួសជុលផ្លូវមួយមួយចំនួនស្ថិតនៅទីតាំងខាងលើនេះឱ្យមានគុណភាព ដើម្បីសម្រួលដល់ការធ្វើដំណើរ។ បើតាមប្រជាពលរដ្ឋដែលស្នើសុំតាមរយៈសារព័ត៌មានកម្ពុជាថ្មី បានលើកឡើងថា នារដូវវស្សា បានបង្កការខូចខាតយ៉ាងធ្ងន់ធ្ងរដល់ផ្លូវក្នុងមូលដ្ឋាន ធ្វើឱ្យការធ្វើដំណើរពិបាក រអិល និងប៉ះពាល់យ៉ាងធ្ងន់ធ្ងរដល់ជីវភាពរស់នៅរបស់អ្នកភូមិ។ជាការកត់សម្គាល់រាល់ពេលភ្លៀងធ្លាក់ខ្លាំងមិនត្រឹមតែផ្លូវពិបាកធ្វើដំណើរនោះទេ ផ្ទះពលរដ្ឋដែលរស់នៅតំបន់មួយចំនួនក៏រងការជន់លិច ដោយសារខ្វះប្រព័ន្ធលូផងដែរ។ នេះបើតាមពលរដ្ឋដែលសុំមិនបញ្ចេញឈ្មោះ។ ពាក់ព័ន្ធបញ្ហានេះ លោក ធន់ សារី ប្រធានមន្ទីរអភិវឌ្ឍន៍ជនបទខេត្តមណ្ឌលគិរី ទើបតែឡើងកាន់តំណែងថ្មី បានប្រាប់ថា ក្រោយពីទទួលដំណឹង ក្នុងនាមមន្រ្តីជំនាញ លោកនឹងចុះទៅពិនិត្យដល់ទីតាំងផ្ទាល់។ លោកបន្តថា ក្នុងករណីពិនិត្យឃើញថាសភាពផ្លូវខូចធ្ងន់ធ្ងរខ្លាំង លោកនឹងសហការជាមួយអាជ្ញាធររដ្ឋបាលឃុំ ជួសជុលផ្លូវនេះឡើងវិញជាបណ្ដោះអាសន្ន ដើម្បីសម្រួលដល់ការធ្វើដំណើររបស់ប្រជាពលរដ្ឋក្នុងមូលដ្ឋាន។លោកក៏បានបញ្ជាក់ថា ក្នុងនាមមន្ទីរជំនាញអភិវឌ្ឍន៍ជនបទ ខេត្តក៏មានផែនការ ក្នុងការជួសជុលផ្លូវ ហើយបានសហការជាមួយក្រុមហ៊ុនរ៉ែមាសតំបន់អូខ្វាវ(Renaissance) ដើម្បីជួសជុលស្ថាបនាផ្លូវនេះឱ្យល្អប្រសើរ នៅឱកាសដាច់ទឹកភ្លៀងនារដូវវស្សា ចុងឆ្នាំ២០២៥នេះ។ផ្ទះពលរដ្ឋរងការជនលិខក្រោយភ្លៀងមួយមេធំ នៅភូមិពូហ៊ួង បើតាមលោកប្រធានមន្ទីរ ទទួលស្គាល់ថាផ្លូវមួយចំនួនតែងរងការខូចខាត និងពិបាកធ្វើដំណើរនារដូវវស្សា ជាពិសេសជំនន់ទឹកភ្លៀង។ ប៉ុន្តែលោកថា ក្រុមជំនាញ ក៏បានសហការជាមួយក្រុមហ៊ុនជាដៃគូ គ្រោងស្ថាបនា និងលើកផ្លូវឱ្យមានកម្ពស់ខ្ពស់ជាងមុន ឱ្យផុតពីការជន់លិចពីជំនន់ទឹភ្លៀង ដែលជាផលរំខានបង្កការកកស្ទះទៅដល់ប្រជាពលរដ្ឋក្នុងការធ្វើដំណើរ៕