រដ្ឋបានសម្ពោធបើកការដ្ឋានសាងសង់ ប្រព័ន្ធលូ និងស្ថានីយប្រព្រឹត្តកម្មទឹកកខ្វក់តម្លៃជិត ៣០លានដុល្លារ នៅក្នុងក្រុងបាវិត ខេត្តស្វាយរៀង នៅថ្ងៃទី០៨ ខែសីហា ឆ្នាំ២០២៥ ក្រោមវត្តមាន ឯកឧត្តម វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន និងឯកឧត្តម ប៉េង ពោធិ៍សា អភិបាលខេត្តស្វាយរៀង។ ឯកឧត្ដម វង្ស ពិសិដ្ឋ បានបញ្ជាក់ថា គម្រោងនេះ ធ្វើឡើងលើទឹកដីក្រុងបាវិត ក្រោមកម្ចីឥណទានរបស់ធនាគារអភិវឌ្ឍន៍អាស៊ី(ADB ) បន្ទាប់ពីបានចុះកិច្ចសន្យាទទួលអនុគម្រោងនេះ ហើយក្រុមហ៊ុនចំនួន១ជាអ្នកទទួលការសាងសង់។ ឯកឧត្តមបន្តថា នេះជាសមិទ្ធផលដ៏មានតម្លៃ និងផ្តល់សារៈប្រយោជន៍យ៉ាងសំខាន់សម្រាប់បងប្អូនប្រជាពលរដ្ឋ និងមូលដ្ឋានទាំងមូលក្នុងក្រុងបាវិត ខណៈឯកឧត្តម ក៏បានថ្លែងអំណរគុណចំពោះក្រសួងសាធារណការ និងធនាគារ ADB ដែលបានផ្តល់ជូននូវគម្រោងទីក្រុងគួរឱ្យចង់រស់នៅនេះឡើង។ ឯកឧត្តមបានគូសបញ្ជាក់បន្ថែមថា គម្រោងនេះ គឺពិតជាមានភាពសមស្រប ឆ្លើយតបទៅនឹងតម្រូវការជាក់ស្តែង ហើយនឹងអាចដោះស្រាយនូវបញ្ហាចំពោះមុខដ៏មានប្រសិទ្ធភាព និងចំទិសដៅ ដែលមូលដ្ឋានកំពុងជួបប្រទះ។គួរបញ្ជាក់ថា ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ដែលបានប្រកាសបើកការដ្ឋាសាងសង់នាពេលនេះ គឺស្ថិតនៅចំណុចភូមិត្រពាំងផ្លុង សង្កាត់បាទី ក្រុងបាវិត ខេត្តស្វាយរៀង សាងសង់ក្រោមកម្ចីធនាគារអភិវឌ្ឍន៍អាស៊ី ADB ក្នុងតម្លៃជិត ៣០លានដុល្លារ (២៩,០៨៦,៧៤៨.១១ដុល្លារ)។ គម្រោងនេះ នឹងប្រើពេលវេលាសាងសង់ ចំនួន ៣៦ខែ ដោយគ្រោងបញ្ចប់នៅ ឆ្នាំ២០២៨ ខាងមុខ។ មកទល់បច្ចុប្បន្ន នៅក្នុងខេត្តស្វាយរៀងមានតំបន់សេដ្ឋកិច្ចពិសេសចំនួន ១២កន្លែង, រោងចក្រ-សហគ្រាសចំនួន ១.០៣៤កន្លែង ជាពិសេសក៏មានប៉ូលសេដ្ឋកិច្ចសំខាន់ៗចំនួន ៣ផងដែរ។