កាលពីថ្ងៃទី ៧ ខែកក្កដា ឆ្នាំ ២០២៥ ម្សិលមិញ លោក ជា ឃឿន ការិយាល័យសាធារណការ ដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណៈ បានដឹកនាំមន្ត្រី នៃការិយាល័យ និងមន្ត្រីសង្កាត់ ចុះអនុវត្តការឈូសឆាយ និងកៀរសម្រួលផ្លូវជង្ហុកសំបុកមាន់ ចំនួន ២ ខ្សែ ដើម្បីសម្រួលដល់ការធ្វើដំណើររបស់ប្រជាពលរដ្ឋ។ផ្លូវជង្ហុកសំបុកមាន់ ចំនួន ២ ខ្សែ រួមមាន ៖ ខ្សែទី១.ផ្លូវចូលសាលាខណ្ឌ ចាប់ពីផ្លូវល្បឿនលឿន រហូតដល់ផ្លូវបេតុងភូមិកប់អំបិល។ ខ្សែទី២.ផ្លូវក្នុងភូមិ ចាប់ពីភូមិតាកេរ្តិ៍ រហូតដល់ភូមិតាសេក ផ្លូវទាំងនេះស្ថិតក្នុងសង្កាត់កំបូល ខណ្ឌកំបូល រាជធានីភ្នំពេញ។លោកប្រធានការិយាល័យសាធារណការ ដឹកជញ្ជូន បានឲ្យដឹងថា សកម្មភាពនេះសម្រេចបានដោយការសហការរវាងមន្ត្រីសាធារណការខណ្ឌ អាជ្ញាធរមូលដ្ឋាន និងប្រជាពលរដ្ឋ ក្នុងគោលបំណងដោះស្រាយបញ្ហាធ្វើដំណើរជាប្រចាំ ហើយជួយកាត់បន្ថយហានិភ័យក្នុងការធ្វើចរាចរណ៍ ជាពិសេសក្រោយពេលមានភ្លៀងធ្លាក់ធ្វើឲ្យផ្លូវជាច្រើនកន្លែងក្លាយជាជង្ហុកសំបុកមាន់។អ្នកស្រី វណ្ណ ស្រីពៅ ជាប្រជាពលរដ្ឋរស់នៅជាប់ផ្លូវមួយខ្សែនេះ ក៏បានលើកឡើងដែរថា អរគុណអាជ្ញាធរខណ្ឌកំបូល ដែលដឹកនាំដោយលោក ឃឹម ស៊ុនសូដា អភិបាលខណ្ឌ បានយកចិត្តទុកដាក់រាល់បញ្ហាទុកកង្វល់របស់ប្រជាពលរដ្ឋដែលមានសំណូមពរទៅអាជ្ញាធរគឺបានដោះស្រាយលឿនជូន និងសូមអាជ្ញាធរបន្តពិនិត្យ និងជួសជុលផ្លូវក្នុងតំបន់ផ្សេងទៀតផងដែរ ដើម្បីលើកស្ទួយជីវភាព រស់នៅរបស់ប្រជាពលរដ្ឋក្នុងមូលដ្ឋានឲ្យកាន់តែប្រសើរ៕