កិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២៥ របស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី មណ្ឌលគិរី៖ នាថ្ងៃអង្គារ ទី១៧ ខែមិថុនា ឆ្នាំ២០២៥ ឯកឧត្តម ឈួន វិន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានអញ្ជើញដឹកនាំកិច្ចប្រជុំពិភាក្សាសរុបលទ្ធផលការងារប្រចាំឆមាសទី១ ឆ្នាំ២០២៥ របស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ដោយមានវត្តមានចូលរួមពីសំណាក់ ឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត និងឯកឧត្តម ថង សាវុន អភិបាលនៃគណៈអភិបាលខេត្ត និងជាអនុប្រធានអចិន្ត្រៃយ៍ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ឯកឧត្តមអនុប្រធានក្រុមការងារ និង ឯកឧត្តម លោកជំទាវ លោក លោកស្រី ជាសមាជិក នៃក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ផងដែរ។ កិច្ចប្រជុំនេះរៀបចំឡើងក្នុងគោលបំណងដើម្បីបូកសរុបលទ្ធផលការងារដែលសម្រេចបាន និងទិសដៅការងារបន្ត របស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី និងពិនិត្យទៅលើសេចក្ដីព្រាងឯកសារការងារ និងសមិទ្ធផលសំខាន់ៗរបស់រាជរដ្ឋាភិបាលផងដែរ។ ថ្លែងនាឱកាសនោះ ឯកឧត្ដមរដ្ឋប្រធានក្រុមការងារ បានគូសបញ្ជាក់ពីកត្តាសុខសន្តិភាព ដែលមាន សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បាននាំមកជូនប្រទេសជាតិ និងប្រជាជន នូវសុខសន្តិភាព តាមរយៈ នយោបាយឈ្នះ-ឈ្នះ ដែលមានរយៈពេល២៦ឆ្នាំកន្លងទៅនេះ ហើយក្នុងរយៈពេល២០ខែ រាជរដ្ឋាភិបាល នីតិកាល ទី៧ នៃរដ្ឋសភា ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បាននិងកំពុងបន្តខិតខំបំពេញបេសកកម្ម បម្រើជាតិ និងប្រជាជនដោយមិនខ្លាចនឿយហត់ និងប្រកបដោយស្មារតីទទួលខុសត្រូវខ្ពស់ សំដៅបន្តដឹកនាំប្រទេសជាតិឱ្យកាន់តែរីកចម្រើនរុងរឿងបន្តទៅមុខទៀត។ បន្ថែមពីនេះ ឯកឧត្ដមប្រធានក្រុមការងារក៏បានសម្តែងនូវការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ក្រុមការងាររាជរដ្ឋាភិបាលចុះមូលដ្ឋានគ្រប់លំដាប់ថ្នាក់ទាំងអស់ និងអាជ្ញាធរគ្រប់លំដាប់ថ្នាក់ ដែលបានបំពេញភារកិច្ចប្រកបដោយប្រសិទ្ធភាព និងការទទួលខុសត្រូវខ្ពស់៕