វគ្គបណ្តុះបណ្តាល និងផ្សព្វផ្សាយបទដ្ឋានសិក្សាគម្រោងផ្លូវថ្នល់ ស្តីពីការឌីហ្សាញធរណីមាត្រផ្លូវ ខេត្តសៀមរាប៖ ថ្ងៃទី១៧ ខែមិថុនា ឆ្នាំ២០២៥ ឯកឧត្តម យិត បុណ្ណា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីបិទវគ្គបណ្តុះបណ្តាល និងផ្សព្វផ្សាយបទដ្ឋានសិក្សាគម្រោងផ្លូវថ្នល់ ស្តីពីការឌីហ្សាញធរណីមាត្រផ្លូវ (Road Design Specification: Road Geometry) រៀបចំដោយអគ្គនាយកដ្ឋានបច្ចេកទេស ដោយមានការចូលរួមពីថ្នាក់ដឹកនាំទទួលបន្ទុកការងារបច្ចេកទេស ទីប្រឹក្សាក្រសួង អគ្គនាយករងមកពីអគ្គនាយកដ្ឋានពាក់ព័ន្ធ សិក្ខាកាមពីនាយកដ្ឋានអនុវត្តគម្រោងថ្នាក់កណ្ដាលរបស់ក្រសួង ព្រមទាំងក្រសួងសេដ្ឋកិច្ច និងហិរញ្ញវត្ថុ មន្ទីរសាធារណការ និងដឹកជញ្ជូនទាំង២៥ រាជធានី-ខេត្ត និងគ្រប់អង្គភាពវិស្វកម្ម ដែលអនុវត្តគម្រោងស្ថិតក្រោមអាណាប័កក្រសួងសាធារណការ និងដឹកជញ្ជូន ផងដែរ។ តាមរយៈរបាយការណ៍សង្ខេបរបស់ ឯកឧត្តម ហ៊ាង វុត្ថា អគ្គនាយកបច្ចេកទេស លើលទ្ធផលនៃវគ្គបណ្តុះបណ្តាល និងផ្សព្វផ្សាយបទដ្ឋានសិក្សាគម្រោងផ្លូវថ្នល់ ស្តីពីការឌីហ្សាញធរណីមាត្រផ្លូវ (Road Design Specification: Road Geometry) សិក្ខាកាមបានយល់ច្បាស់អំពីបទដ្ឋានដែលបានធ្វើបច្ចុប្បន្នភាពរួមមាន គោលការណ៍រួមក្នុងការឌីហ្សាញធរណីមាត្រផ្លូវ, ចំណាត់ថ្នាក់ផ្លូវ, ការពិចារណាជាមូលដ្ឋាន, ល្បឿន, ពំនុះកាត់ទទឹងផ្លូវ, ចម្ងាយមើលឃើញ, ខ្សែអ័ក្សផ្តេក, ខ្សែអ័ក្សឈរ, កូអ័រដោនេខ្សែអ័ក្សដេក និងខ្សែអ័ក្សឈរ, គន្លងផ្លូវជំនួយ, ការឌីហ្សាញផ្លូវដែលទាក់ទងជាមួយស្ពាន, និងការឌីហ្សាញផ្លូវរូងក្រោមដី។ ថ្លែងក្នុងកម្មវិធីបិទវគ្គបណ្តុះបណ្តាល ឯកឧត្តមរដ្ឋលេខាធិការ បានវាយតម្លៃខ្ពស់ចំពោះការរៀបចំ និងវត្តមានប្រតិបត្តិករ លោក-លោកស្រី ជាវិស្វករ និងមន្ត្រីបច្ចេកទេស ដែលបានចូលរួមក្នុងវគ្គបណ្តុះបណ្តាលបច្ចេកទេសនាពេលនេះ ព្រមទាំងការធ្វើបទបង្ហាញដោយមន្ត្រីបច្ចេកទេសដែលជាគ្រូបង្គោល អមដោយការពន្យល់បន្ថែមរបស់ថ្នាក់ដឹកនាំ និងមន្ត្រីជំនាញនៃក្រសួងសាធារណការ និងដឹកជញ្ជូន រួមទាំងកិច្ចពិភាក្សា និងសំណួរចម្លើយពាក់ព័ន្ធទៅនឹងការឌីហ្សាញធរណីមាត្រផ្លូវដែលបានធ្វើបច្ចុប្បន្នភាព ក៏ដូចជាបទពិសោធន៍ផ្ទាល់របស់មន្ត្រីបច្ចេកទេសក្រសួងសាធារណការ និងដឹកជញ្ជូន និងអង្គភាពអនុវត្តគម្រោងធ្លាប់បានអនុវត្តកន្លងមកឱ្យទទួលបាននូវការស្វែងយល់កាន់តែច្បាស់ពីគោលការណ៍សំខាន់ៗ និងនីតិវិធីនៃការឌីហ្សាញធរណីមាត្រផ្លូវ ប្រកបដោយប្រសិទ្ធភាព សុវត្ថិភាព ជាពិសេសផ្តល់នូវផាសុខភាពដល់អ្នកប្រើប្រាស់ផ្លូវថ្នល់៕