កិច្ចប្រជុំវេទិកាពិភាក្សាយុទ្ធសាស្រ្តហេដ្ឋារចនាសម្ព័ន្ធរវាងកម្ពុជា និងចក្រភពអង់គ្លេស (UK-Cambodia Strategic Infrastructure Chamber) ភ្នំពេញ៖ នាថ្ងៃចន្ទ ទី២៤ ខែមីនា ឆ្នាំ២០២៥ ឯកឧត្តម ឈៀង ពេជ្រ អនុរដ្ឋលេខាធិការ បានដឹកនាំប្រតិភូក្រសួងសាធារណការ និងដឹកជញ្ជូន រួមមានតំណាងមកពីអគ្គនាយកដ្ឋានភស្តុភារកម្ម អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ អគ្គនាយកដ្ឋានប្រព័ន្ធចម្រោះទឹកកខ្វក់ និងនាយកដ្ឋានផ្លូវដែក ចូលរួមកិច្ចប្រជុំវេទិកាពិភាក្សាយុទ្ធសាស្រ្តហេដ្ឋារចនាសម្ព័ន្ធរវាងកម្ពុជា និងចក្រភពអង់គ្លេស (UK-Cambodia Strategic Infrastructure Chamber) រៀបចំឡើងដោយស្ថានទូតអង់គ្លេសប្រចាំនៅប្រទេសកម្ពុជា និងអគ្គនាយកដ្ឋាន PPP នៃក្រសួងសេដ្ឋកិច្ច និងហិរញ្ញវត្ថុ។ វេទិកានេះត្រូវបានគាំទ្រដោយហិរញ្ញប្បទានសម្រាប់ការនាំចេញរបស់ចក្រភពអង់គ្លេស (UK Export Finance - UKEF) ក្នុងគោលបំណងចំនួន៣៖ (១) ជំរុញកិច្ចសហប្រតិបត្តិការរវាងប្រទេសកម្ពុជា និងប្រទេសអង់គ្លេស ក្នុងការកំណត់គម្រោងអាទិភាព និងនីតិវិធីហិរញ្ញវត្ថុ (២) ជំរុញបន្តរក្សាកិច្ចសហប្រតិបត្តិការ ដើម្បីទទួលបានលទ្ធផលសេដ្ឋកិច្ច និង (៣) បន្តពង្រឹងកិច្ចសហប្រតិបត្តិការរវាងរាជរដ្ឋាភិបាលក្នុងការអភិវឌ្ឍហេដ្ឋារចនាសម្ព័ន្ធ។ តាមរយៈ MoU ដែលបានចុះរវាង UKEF និងក្រសួងសេដ្ឋកិច្ច និងហិរញ្ញវត្ថុ, UKEF បានរៀបចំកញ្ចប់ Credit Guarantees ប្រមាណ ២ពាន់លានផោន សម្រាប់គាំទ្រដល់គម្រោងហេដ្ឋារចនាសម្ព័ន្ធនានា ដែលមានការចូលរួមដោយក្រុមហ៊ុនរបស់ចក្រភពអង់គ្លេស។ ឯកឧត្តម អនុរដ្ឋលេខាធិការ បានជម្រាបជូនអង្គវេទិកាអំពីឱកាសវិនិយោគក្នុងវិស័យសាធារណការ និងដឹកជញ្ជូន ដោយសង្កត់ធ្ងន់ទៅលើបណ្តាការអនុវត្តគម្រោងចំនួន ១៧៤ ដែលមានចែងនៅក្នុងផែនការមេគ្រប់ជ្រុងជ្រោយស្តីពី ប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ ដែលជាត្រីវិស័យក្នុងការអនុវត្តក្នុងរយៈពេល ១០ ឆ្នាំខាងមុខនេះ។ ក្នុងនោះផងដែរ ក្រុមហ៊ុនជំនាញនៃប្រទេសអង់គ្លេស ដែលបានចូលរួមបង្ហាញ គឺក្រុមហ៊ុនទីប្រឹក្សាហិរញ្ញវត្ថុ ក្រុមហ៊ុនសេវាវិស្វកម្ម និងស្ថាបត្យកម្ម និងក្រុមហ៊ុនពាក់ព័ន្ធ ដែលក្នុងនោះរួមមាន Foster+Partner (ក្រុមហ៊ុនស្ថាបត្យកម្មនៃគម្រោងអាកាសយានដ្ឋានអន្តរជាតិតេជោ), Buro Happold, Arup, Broadway Malyan និង Zaha Hadid ជាដើម៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube