ក្រុមការងារអនុវត្តគម្រោងចុះត្រួតពិនិត្យរោងចក្រផលិតបំពង់បង្ហូរទឹកកខ្វក់ រោងចក្រផលិតគម្របលូ និងសម្ភារនៅប្រទេសកូរ៉េ សម្រាប់ផ្គត់ផ្គង់គម្រោងអភិវឌ្ឍន៍ប្រព័ន្ធចម្រោះទឹកកខ្វក់ ក្នុងក្រុងតាខ្មៅ ប្រទេសកូរ៉េ៖ នាថ្ងៃសុក្រ ទី២១ ខែមីនា ឆ្នាំ២០២៥ ឯកឧត្តមបណ្ឌិត រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំក្រុមការងារអនុវត្តគម្រោងអភិវឌ្ឍន៍ប្រព័ន្ធចម្រោះទឹកកខ្វក់ក្នុងក្រុងតាខ្មៅ បំពេញបេសកម្មពិនិត្យរោងចក្រផលិតបំពង់បង្ហូរទឹកកខ្វក់ រោងចក្រផលិតគម្របលូ ទីស្នាក់ការកណ្ដាលនៃក្រុមហ៊ុនទីប្រឹក្សាបច្ចេកទេស និងក្រុមហ៊ុនសាងសង់ ដោយមានការអញ្ជើញអមដំណើរដោយឯកឧត្តមអនុរដ្ឋលេខាធិការ លោកប្រធានមន្ទីរសាធារណការ និងដឹកជញ្ជូនខេត្តកណ្តាល ប្រធានគ្រប់គ្រងគម្រោង ក្រុមការងារទីប្រឹក្សាគម្រោង Consultant Dohwa-Seoyoung Joint Venture និងក្រុមការងារក្រុមហ៊ុនសាងសង់ Joint Venture of Kumho-Techcross ផងដែរ។ កិច្ចបេសកម្មនេះប្រព្រឹត្តទៅមានរយៈពេល ៤ថ្ងៃ គិតចាប់ពីថ្ងៃអង្គារ ទី១៨ ដល់ថ្ងៃសុក្រ ទី២១ ខែមីនា ឆ្នាំ២០២៥ ក្នុងគោលបំណងដើម្បីចុះត្រួតពិនិត្យរោងចក្រផលិតបំពង់បង្ហូរទឹកកខ្វក់ រោងចក្រផលិតគម្របលូ និងសម្ភារដែលផលិតឡើងដោយរោងចក្រផ្គត់ផ្គង់ ក្នុងការធានាឱ្យបាននូវគុណភាព និងសុវត្ថិភាពនៃផលិតផល ដែលនឹងត្រូវយកមកអនុវត្តការងារសាងសង់សម្រាប់គម្រោងអភិវឌ្ឍន៍ប្រព័ន្ធចម្រោះទឹកកខ្វក់ក្នុងក្រុងតាខ្មៅ ក្រោមហិរញ្ញប្បទានឥណទាន ពីធនាគារនីហរ័ណ-អាហរ័ណ របស់សាធារណរដ្ឋកូរ៉េ នាពេលអនាគតដ៏ខ្លីខាងមុខនេះ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube