ស្ថានីយជញ្ជីងថ្មី នៅផ្លូវជាតិលេខ៤៨ ខេត្តកោះកុង ត្រូវបានក្រុមការងារក្រសួងចុះត្រួតពិនិត្យ ដើម្បីធ្វើការសាងសង់ កោះកុង៖ នាថ្ងៃពុធ ទី១២ ខែមីនា ឆ្នាំ២០២៥ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្រ្តៃយ៍ បានដឹកនាំគណៈប្រតិភូ និងក្រុមការងារពាក់ព័ន្ធ ចុះពិនិត្យទីតាំងសម្រាប់សាងសង់ស្ថានីយថ្លឹងយានយន្តដឹកជញ្ជូនលើសទម្ងន់កម្រិតកំណត់ ចំនួន ១កន្លែង តាមសំណើរបស់រដ្ឋបាលខេត្តកោះកុង នៅលើដីចំណីផ្លូវជាតិលេខ៤៨ ត្រង់ចំណុចចន្លោះគីឡូម៉ែត្រលេខ ២+៩០០ ដល់ ៣+០៥០ ក្នុងភូមិអូរជ្រៅ ឃុំបឹងព្រាវ ស្រុកស្រែអំបិល ខេត្តកោះកុង និងមានការអញ្ជើញចូលរួមពីលោក អ៊ួង សំអឿន នាយកទីចាត់ការអន្តរវិស័យ នៃរដ្ឋបាលខេត្តកោះកុង អាជ្ញាធរមូលដ្ឋាន(ភូមិ ឃុំ ស្រុក) ប្រធានគម្រោងលើកកម្រិតគុណភាពផ្លូវជាតិលេខ៤៨ តំណាងមន្ទីរសាធារណការ និងដឹកជញ្ជូនខេត្តកោះកុង ក្រុមហ៊ុនសាងសង់ផ្លូវជាតិលេខ៤៨ និងអង្គភាពជំនាញពាក់ព័ន្ធផ្សេងទៀត។ ជាលទ្ធផល ក្រុមការងារទាំងមូល បានឯកភាពកំណត់យកទីតាំងខាងលើសម្រាប់សាងសង់ស្ថានីយថ្លឹងយានយន្ត ក្នុងពេលឆាប់ៗខាងមុខនេះ ដើម្បីចូលរួមទប់ស្កាត់ការដឹកជញ្ជូនលើសទម្ងន់កម្រិតកំណត់ និងរួមចំណែកការពារសមិទ្ធផលផ្លូវជាតិលេខ៤៨ ក្រោយពេលលើកកម្រិតគុណភាពផ្លូវរួចរាល់។ គូសបញ្ជាក់ដែរថា គម្រោងសាងសង់ស្ថានីយជញ្ជីងផ្លូវជាតិលេខ៤៨ ខេត្តកោះកុង គឺមានក្នុងផែនការដាក់បន្ថែមទីតាំងស្ថានីយថ្លឹងយានយន្តដឹកជញ្ជូនលើសទម្ងន់កម្រិតកណត់រយៈពេលខ្លី មធ្យម និងវែង របស់គណៈកម្មការចំពោះកិច្ចដោះស្រាយបញ្ហាប្រឈមទាក់ទងនឹងការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដែលមាន ឯកឧត្តមរដ្ឋមន្រ្តីក្រសួងសាធារណការ និងដឹកជញ្ជូន ជាប្រធាន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube