កំពត៖ ក្នុងកិច្ចប្រជុំសាមញ្ញលើកទី១០ អាណត្តិទី៤ របស់ក្រុមប្រឹក្សាខេត្ត នៅថ្ងៃទី១១ ខែមីនា ឆ្នាំ២០២៥ ក្រោមវត្តមាន លោក តាក ហាប់ ប្រធានក្រុមប្រឹក្សាខេត្ត លោក ម៉ៅ ធនិន អភិបាលខេត្តកំពត បានរាយការណ៍ថា ដោយមានការឯកភាពពីប្រមុខរាជរដ្ឋាភិបាល រដ្ឋបាលខេត្ត នឹងចាប់ផ្តើមសាងសង់ស្ពាន និងផ្លូវវាងក្រុងឆ្លងកាត់ព្រែកកំពង់បាយមួយបន្ថែមទៀត ដើម្បីសម្រួលដល់ការធ្វើដំណើររបស់ប្រជាពលរដ្ឋ និងភ្ញៀវទេសចរ ពិសេសគឺ កាត់បន្ថយការកកស្ទះចរាចរណ៍នៅពេលមានបុណ្យទានម្តងៗ ហើយស្ពាននេះ នឹងចាប់ផ្តើមបុកគ្រឹះក្នុងចន្លោះខែឧសភា ទៅខែកក្កដា ឆ្នាំ២០២៥។ លោកអភិបាលខេត្ត បានបន្តថា កន្លងមកក្រោមកិច្ចខិតខំប្រឹងប្រែង និងសហការគ្នាយ៉ាងល្អរវាងរដ្ឋបាលខេត្ត និងក្រុមប្រឹក្សាខេត្ត គម្រោងអភិវឌ្ឍន៍ជាច្រើនត្រូវបានធ្វើឡើងជាបន្តបន្ទាប់ ដើម្បីទាក់ទាញភ្ញៀវទេចរជាតិ និងអន្តរជាតិ ក្នុងគោលបំណងលើកកម្ពស់កម្រិតជីវភាពរបស់ប្រជាពលរដ្ឋឱ្យកាន់តែប្រសើរ ខណៈដែលក្រុមហ៊ុនបរទេស២ បានមកបើករោងចក្រផលិត និងកែច្នៃផ្លែស្វាយ និងរោងចក្រផលិតគ្រឿងវេជ្ជសាស្ត្រនៅខេត្តកំពត។ នៅក្នុងឱកាសនោះលោក ម៉ៅ ធនិន ក៏បានឱ្យដឹងដែរថា ចំពោះស្ថានភាពភូមិសាស្ត្រនយោបាយ និងសតិអារម្មណ៍របស់ប្រជាពលរដ្ឋនៅក្នុងខេត្តមានភាពល្អប្រសើរ។ ជាក់ស្តែងបញ្ហាឆបោករបស់ក្រុមហ៊ុន ជា សារ៉ន កន្លងមកនេះ រដ្ឋបាលខេត្តបានអនុវត្តនូវគោលការណ៍របស់សម្តេចធិបតី ហ៊ុន ម៉ាណែន នាយករដ្ឋមន្ត្រី ដោយបានឱ្យប្រជាពលរដ្ឋមកដាក់ពាក្យស្នើសុំនូវអ្វីដែលពួកគាត់ត្រូវទទួលបានពីក្រុមហ៊ុន ជា សារ៉ន មានដូចជា បណ្ណកម្មសិទ្ធិដីធ្លី និងបណ្ណកាន់កាប់តូប ជាដើម។ គិតចាប់តាំងពីថ្ងៃបើកទទួលពាក្យកាលពីថ្ងៃទី១០ ខែកុម្ភៈ រហូតមកដល់ថ្ងៃទី១០ ខែមីនា ឆ្នាំ២០២៥ ពលរដ្ឋមកដាក់ពាក្យចំនួន ៣ ៧០៣នាក់ លើ ៥ ៧៧៧នាក់។ ការណ៍នេះបញ្ហា ក្រុមហ៊ុន ជា សារ៉ន នឹងឈានទៅបញ្ចប់ក្នុងពេលឆាប់ៗខាងមុខ។ លោកអភិបាលខេត្ត បានបញ្ជាក់ផងដែរថា បច្ចុប្បន្នវិស័យកសិកម្ម និងវិស័យទេសចរណ៍បានក្លាយជាឆ្អឹងខ្នងដ៏សំខាន់របស់ខេត្ត ហើយលោកក៏បានជំរុញដល់អាជ្ញាធរ ពិសេសមន្ត្រីមន្ទីរកសិកម្ម និងមន្ទីរទេសចរណ៍ ត្រូវបង្កើនការយកចិត្តទុកដាក់ចុះផ្ទាល់ដល់មូលដ្ឋាន ដើម្បីប្រមូលផ្តុំ និងចងក្រងជាសហគមន៍ដាំដុះបន្លែ ដំណាំហូបផ្លែ ចិញ្ចឹមសត្វ ដើម្បីផ្គត់ផ្គង់តម្រូវការភ្ញៀវទេសចរឱ្យបានគ្រប់គ្រាន់ ព្រោះមិនអាចឱ្យខេត្តមួយមានភ្ញៀវទេចរមកលេងច្រើនហើយ បែជាគ្មានអាហារ នំចំណី និងផ្លែឈើសម្រាប់លក់នោះទេ៕