កិច្ចប្រជុំគណៈកម្មការពិនិត្យលក្ខណសម្បត្តិវរជន ដែលត្រូវស្នើសុំគ្រឿងឥស្សរិយយស សម្រាប់ឆ្នាំ២០២៣ ទីស្តីការក្រសួង៖ នារសៀលថ្ងៃព្រហស្បតិ៍ ទី២០ ខែកុម្ភៈ ឆ្នាំ២០២៥ ឯកឧត្តម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំគណៈកម្មការពិនិត្យលក្ខណសម្បត្តិវរជន ដែលត្រូវស្នើសុំគ្រឿងឥស្សរិយយស សម្រាប់ឆ្នាំ២០២៣ ដោយមានការអញ្ជើញចូលរួមពីឯកឧត្តម-លោកជំទាវ ជាថ្នាក់ដឹកនាំក្រសួង លោក-លោកស្រីថ្នាក់ដឹកនាំអគ្គនាយកដ្ឋានក្រោមឱវាទក្រសួង សមាជិក សមាជិកា នៃគណៈកម្មការ និងតំណាងមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត ជាច្រើនរូប។ កិច្ចប្រជុំនេះធ្វើឡើងក្នុងគោលបំណងដើម្បីពិភាក្សា ពិនិត្យ និងវាយតម្លៃលក្ខណសម្បត្តិវរជនទាំងថ្នាក់ជាតិ និងថ្នាក់ក្រោមជាតិ ដែលត្រូវស្នើសុំគ្រឿងឥស្សរិយយស សម្រាប់ឆ្នាំ២០២៣ សំដៅធ្វើយ៉ាងណាឱ្យការស្នើសុំគ្រឿងឥស្សរិយយសជូនមន្ត្រីរាជការមានភាពត្រឹមត្រូវតាមនីតិវិធី ប្រកបដោយតម្លាភាព និងយុត្តិធម៌ ពោលគឺអ្នកដែលខិតខំប្រឹងប្រែងបំពេញតួនាទីបានល្អ សមនឹងទទួលបានគ្រឿងឥស្សរិយយស។ ថ្លែងក្នុងកិច្ចប្រជុំនាឱកាសនោះ ឯកឧត្ដមរដ្ឋលេខាធិការ បានគូសបញ្ជាក់ពីការពិនិត្យ និងវាយតម្លៃ ដើម្បីទទួលបានគ្រឿងឥស្សរិយយសជូនមន្ត្រីរាជការណាម្នាក់ គឺត្រូវអនុវត្តតាមគោលការណ៍ស្ដង់ដារនៃការវាយតម្លៃ មានកំណត់ហេតុនៃការប្រជុំវាយតម្លៃរបស់អង្គភាពនីមួយៗ ត្រឹមត្រូវទៅតាមនីតិវិធី ច្បាស់លាស់ និងកំណត់ហេតុប្រជុំវាយតម្លៃរបស់គណៈកម្មការរបស់ក្រសួង ព្រមទាំងឯកសារពាក់ព័ន្ធដទៃទៀតពាក់ព័ន្ធដែលជាទឡ្ហីករណ៍ពីការវាយតម្លៃ ធានាឱ្យការវាយតម្លៃមានសុក្រឹតភាព និងគ្រប់ជ្រុងជ្រោយ ប្រកបដោយយុត្តិធម៌ និងមានតម្លាភាព។ ឯកប្រធានអង្គប្រជុំ ក៏បានស្នើឱ្យអង្គភាពពាក់ព័ន្ធទាំងអស់យកចិត្តទុកដាក់វាយតម្លៃឱ្យបានគ្រប់ជ្រុងជ្រោយ ប្រកបដោយទំនួលខុសត្រូវ ឈរលើគោលការណ៍ស្តង់ដារវាយតម្លៃ និងគោលការណ៍យុត្តិធម៌ ដើម្បីលើកទឹកចិត្តមន្ត្រីដែលខិតខំប្រឹងប្រែងធ្វើការងារ បន្តខិតខំប្រឹងប្រែងបន្ថែមទៀត ហើយស្វែងរកវិធីសាស្ត្រជំរុញលើកទឹកចិត្តដល់មន្ត្រីអសកម្មនឹងការងារ ឱ្យងាកមកសកម្មនឹងការងារឡើងវិញ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube