កិច្ចប្រជុំពិភាក្សារវាងលេខាធិការដ្ឋានបច្ចេកទេស នៃគណៈកម្មាធិការជាតិសម្របសម្រួលការដឹកជញ្ជូនឆ្លងកាត់ (NTTCC) និងក្រុមហ៊ុនប្រតិបត្តិករដឹកជញ្ជូន ទីស្ដីការក្រសួង៖ នាថ្ងៃសុក្រ ទី២៤ ខែមករា ឆ្នាំ២០២៥ ឯកឧត្តម ប៉ែន បូរាណ អនុរដ្ឋលេខាធិការ តំណាងឯកឧត្តម តូច ចាន់កុសល រដ្ឋលេខាធិការ និងជាប្រធានគណៈកម្មាធិការជាតិសម្របសម្រួលការដឹកជញ្ជូនឆ្លងកាត់ (NTTCC) អញ្ជើញដឹកនាំកិច្ចប្រជុំពិភាក្សា រវាងលេខាធិការដ្ឋានបច្ចេកទេស NTTCC និងក្រុមហ៊ុនប្រតិបត្តិករដឹកជញ្ជូន ដោយមានការអញ្ជើញចូលរួមពី ឯកឧត្ដមអនុរដ្ឋលេខាធិការ លោកប្រធាន សមាជិក សមាជិកា នៃលេខាធិការដ្ឋានបច្ចេកទេស មន្ត្រីជំនាញពាក់ព័ន្ធ តំណាងធនាគារអភិវឌ្ឍន៍អាស៊ី (ADB) តំណាងសមាគមមកពីវិស័យឯកជន និងក្រុមហ៊ុនជាប្រតិបត្តិករដឹកជញ្ជូន សរុបប្រមាណ ៤០រូប។ កិច្ចប្រជុំនេះធ្វើឡើងក្នុងគោលបំណង ដើម្បីផ្សព្វផ្សាយឱ្យកាន់តែទូលំទូលាយស្ដីពីបច្ចុប្បន្នភាពវឌ្ឍនភាពនៃការអនុវត្តការប្រមូលផលដំបូង ( Early Harvest – EH) នៃកិច្ចព្រមព្រៀងស្ដីពីការសម្រួលការដឹកជញ្ជូនឆ្លងកាត់ព្រំដែនក្នុងមហាឣនុតំបន់មេគង្គ (GMS CBTA) ដែលត្រូវបានជំរុញ និងប្តេជ្ញាចិត្តអនុវត្តដោយរដ្ឋមន្ត្រីដឹកជញ្ជូននៃបណ្ដាប្រទេស GMS (នៅឆ្នាំ២០១៨) និងក្រោយការអនុវត្តដោយជោគជ័យនូវការរត់សាកល្បង (Trial Run) នូវប្រតិបត្តិការដឹកជញ្ជូន ពីទីក្រុងគុនមីង សាធារណរដ្ឋប្រជាមានិតចិន មកដល់ទីក្រុងភ្នំពេញ ព្រះរាជាណាចក្រកម្ពុជា កាលពីខែមិថុនា ឆ្នាំ២០២៤ កន្លងទៅ។ ជាមួយគ្នានេះ កិច្ចប្រជុំក៏ធ្វើឡើងដើម្បីចូលរួមចំណែកជាមួយវិស័យឯកជន ក្នុងការស្វែងយល់ពីបំណង និងបញ្ហាប្រឈមនានារបស់ប្រតិបត្តិករដឹកជញ្ជូន សម្រាប់ជំរុញការអនុវត្តកិច្ចព្រមព្រៀង GMS CBTA ឱ្យកាន់តែទូលំទូលាយ និងទាញយកអត្ថប្រយោជន៍ដឹកជញ្ជូនសម្រាប់កម្ពុជាជាអតិបរមាផងដែរ។ សូមបញ្ជាក់ជូនថា ការអនុវត្តនូវការប្រមូលផលដំបូង (GMS EH CBTA) នេះនឹងផ្ដល់ជាជម្រើសថ្មីមួយបន្ថែមទៀត សម្រាប់ប្រតិបត្តិករដឹកជញ្ជូនក្នុងការជ្រើសរើសសម្រាប់ការបំពេញប្រតិបត្តិការប្រចាំថ្ងៃរបស់ខ្លួន ដែលផ្ដល់ភាពងាយស្រួលលើប្រតិបត្តិការដឹកជញ្ជូន (ទាំងទំនិញ និងឣ្នកដំណើរ) និងនីតិវិធីផ្សេងៗឆ្លងកាត់តាមច្រកទ្វារព្រំដែនអន្តរជាតិនៃបណ្ដាប្រទេស GMS ដោយកាត់បន្ថយបាននូវពេលវេលាត្រួតពិនិត្យ និងការរុះរើទំនិញនានាតាមរយៈការចេញនូវឯកសារឣនុញ្ញាតចេញ-ចូលបណ្ដោះឣាសន្ន (TADs) សម្រាប់យានយន្តដែលបានចុះបញ្ជី ក្នុងចំណោមចំនួនកូតាយានយន្ត ៥០០គ្រឿង ដែលប្រទេស GMSនីមួយៗ ឣាចឣនុវត្តបាន។ តាមរយៈយន្តការនៃគណៈកម្មាធិការជាតិសម្របសម្រួលការដឹកជញ្ជូនឆ្លងកាត់នេះ ក្រសួងសាធារណការ និងដឹកជញ្ជូន បាន និងកំពុងបន្តអនុវត្តតាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការណែនាំឱ្យក្រសួងបន្តពង្រឹងកិច្ចសហការជាមួយក្រសួង-ស្ថាប័នពាក់ព័ន្ធ រដ្ឋបាលរាជធានី-ខេត្ត និងដៃគូអភិវឌ្ឍន៍ ក្នុងការអភិវឌ្ឍ និងកែលម្អឱ្យកាន់តែប្រសើរឡើងថែមទៀត នូវហេដ្ឋារចនាសម្ព័ន្ធរូបវ័ន្ត និងនីតិវិធីផ្សេងៗនៅច្រកព្រំដែន និងដោះស្រាយបញ្ហាប្រឈមនានាចំពោះមុខ ដើម្បីសម្រួលដល់ការដឹកជញ្ជូន ពាណិជ្ជកម្ម និងទេសចរណ៍ឆ្លងកាត់ព្រំដែន និងរួមចំណែកការធ្វើសមាហរណកម្មសេដ្ឋកិច្ចជាមួយបណ្ដាប្រទេសជិតខាង និងក្នុងតំបន់៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube