ភ្នំពេញ៖ រដ្ឋមន្ត្រីក្រសួងមហាផ្ទៃ លោក ស សុខា បានជំរុញឱ្យមន្ត្រីនគរបាល បង្កើតក្រុមការងារចល័ត ដើម្បីពិនិត្យករណីផ្លាកលេខយានយន្តក្លែងក្លាយ ដើម្បីបង្កើនប្រសិទ្ធភាពនៃការបង្ក្រាបបទល្មើស។ លោក ស សុខា ថ្លែងបែបនេះ ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៤ និងដាក់ចេញទិសដៅការងារឆ្នាំ២០២៥ របស់អគ្គស្នងការដ្ឋាននគរបាលជាតិ នៅទីស្តីការក្រសួងមហាផ្ទៃ កាលថ្ងៃទី៣១ ខែឆ្នូ ឆ្នាំ២០២៤។លោក ស សុខា បានបញ្ជាក់ថា៖ «ខ្ញុំសូមឱ្យយកចិត្តទុកដាក់ ជាពិសេសពិនិត្យក្នុងការបង្កើតក្រុមចល័តមួយ ដើម្បីដំណើរការ ដោយមានការស្នើសុំការប្រើប្រាស់ពីក្រសួងសាធារណការ និងដឹកជញ្ជូន ដើម្បីយល់ព្រមទៅលើផ្លាកលេខឡានទាំងអស់នោះ។ មួយក្រុមនោះ អត់មានគ្នាច្រើនទេ ត្រឹមតែ ៤ ទៅ ៥ នាក់ប៉ុណ្ណោះ ពេលមានរឿងអ្វី យើងអាចឆែកភ្លាមៗ ព្រោះផ្លាកលេខក្លែងក្លាយ យើងមើលអត់ដឹងនោះទេ ព្រោះគាត់ជាន់លេខដូចគ្នា។»។ ពីពិធីដដែល រដ្ឋមន្ត្រីក្រសួងមហាផ្ទៃ បានបញ្ជាក់ថា ករណីបន្លំផ្លាកលេខនេះ នៅតែបន្តកើតមានឡើង ទាំងយានយន្ត និងទោចក្រយានយន្ត ដែលចរាចរណ៍នៅតាមដងផ្លូវ។ ក្នុងន័យនេះ លោក ស សុខា បានស្នើឱ្យមន្ត្រីមានសមត្ថកិច្ច បន្តបង្កើនការយកចិត្តទុកដាក់ អនុវត្តភារកិច្ច និងលុបបំបាត់ ករណី ផ្លាកលេខក្លែងក្លាយដែលនៅតែជាបញ្ហាប្រឈមនៅក្នុងសង្គម៕