ភ្នំពេញ ៖ គម្រោងសាងសង់ស្ពានអាកាសភ្លោះសម្ដេចមហាបវរធិបតី នៅប៉ែកខាងត្បូងភ្នំពេញ បានសម្រេចវឌ្ឍនភាពប្រមាណ២៥ភាគរយហើយ និងគ្រោងបញ្ចប់ទាំងស្រុង (ទាំងពីរស្ពាន ) នៅអំឡុងខែមិថុនា ឆ្នាំ ២០២៥ខាងមុខនេះ ។ នេះបើយោងតាមលោកសាំ ពិសិដ្ឋ ប្រធានមន្ទីរសាធារណការនិងដឹកជញ្ជូន រាជធានីភ្នំពេញថ្លែងប្រាប់អ្នកសារព័ត៌មានកាលពីថ្ងៃទី៤ ធ្នូ ២០២៤ ។លោកបន្តថា គម្រោងសាងសង់ស្ពានទី១ នឹងបញ្ចប់នៅមុនពិធីបុណ្យចូលឆ្នាំប្រពៃណីជាតិខ្មែរ ឆ្នាំ ២០២៥ខាងមុខ ហើយគម្រោងទាំងមូល នឹងបញ្ចប់នៅអំឡុងខែមិថុនា ឆ្នាំ ២០២៥ ខណៈបច្ចុប្បន្នការដ្ឋានសាងសង់បានបញ្ចប់ការសាងសង់សរសរស្ពានទាំងអស់រួចហើយ ។គម្រោងនេះ បានប្រើប្រាស់ថវិការបស់រាជរដ្ឋាភិបាល តាមរយៈរដ្ឋបាលសាលារាជធានីភ្នំពេញ ដោយខ្ទង់ចំណាយនៃការសាងសង់ប្រមាណជាង១៦លានដុល្លារអាមេរិក ប្រើប្រាស់រយៈពេលសាងសង់ ១២ខែ ។គម្រោងសាងសង់ស្ពានអាកាសភ្លោះនេះ ស្ពានជាប្រភេទបេតុងអាមេ ( ធ្នឹមរាងអក្សរ I ) ដែលមានបណ្ដោយស្ពានសរុប ៦២២ម៉ែត្រ ,បណ្ដោយតួស្ពាន:២៨១ម៉ែត្រ ,ផ្លូវតភ្ជាប់ក្បាលស្ពានទៅមកខាងមហាវិថីសម្តេចតេជោ ហ៊ុន សែនប្រវែង ១៨០ម៉ែត្រ,ផ្លូវតភ្ជាប់ក្បាលស្ពានទៅមកខាងព្រលានយន្តហោះ អន្តរជាតិតេជោ ១៦១ម៉ែត្រ។ ស្ពានទី១: ផ្លូវឯកទិសមានទិសដៅតាមបណ្តោយមហាវិថីសម្តេចតេជោ ហ៊ុន សែន ឆ្លងកាត់ផ្លូវជាតិលេខ២ឆ្ពោះទៅកាន់អាកាសយានដ្ឋានអន្តរជាតិតេជោ។ ស្ពានទី២: ផ្លូវឯកទិសមានទិសដៅឆ្លងកាត់ផ្លូវជាតិលេខ២ពីអាកាសយានដ្ឋានអន្តរជាតិតេជោ ឆ្ពោះទៅកាន់ មហាវិថីសម្តេចតេជោ ហ៊ុន សែន។ ទម្ងន់ផ្ទុកអនុញ្ញាត : ២៥តោន កម្ពស់សុវត្ថិភាព:៥.៥០ម៉ែត្រ ( ត្រង់ចំនុចប្រសព្វផ្លូវជាតិលេខ២ ) ៕