សិក្ខាសាលាស្តីពីវិធីសាស្ត្រក្នុងការប្រមូល និងវិភាគស្ថិតិ និងផ្សព្វផ្សាយសៀវភៅទិន្នន័យស្ថិតិវិស័យសាធារណការ និងដឹកជញ្ជូន ខេត្តសៀមរាប៖ ដោយទទួលបានការអនុញ្ញាតពីឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងថ្នាក់ដឹកនាំទទួលបន្ទុក នៅថ្ងៃទី២៨ ខែវិច្ឆិកា ឆ្នាំ២០២៤ ឯកឧត្តម សឿន ប៊ុនលី អគ្គនាយក នៃអគ្គនាយកដ្ឋានផែនការ និងគោលនយោបាយ បានអញ្ជើញជាអធិបតីដឹកនាំសិក្ខាសាលាស្តីពីវិធីសាស្ត្រក្នុងការប្រមូល និងវិភាគស្ថិតិ និងផ្សព្វផ្សាយសៀវភៅទិន្នន័យស្ថិតិវិស័យសាធារណការ និងដឹកជញ្ជូន ដោយមានការអញ្ជើញចូលរួមពីថ្នាក់ដឹកនាំ និងមន្ត្រីជំនាញនៃអគ្គនាយកដ្ឋាន រួមទាំងសិក្ខាកាមមកពីមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត សរុបប្រមាណ ៩០រូប។ សិក្ខាសាលានេះត្រូវបានរៀបចំឡើងរយៈពេល២ថ្ងៃ ចាប់ពីថ្ងៃទី២៨ ដល់ទី២៩ ខែវិច្ឆិកា ឆ្នាំ២០២៤ ក្នុងគោលបំណងដើម្បីផ្តល់នូវមូលដ្ឋានចំណេះដឹង ទាំងផ្នែកទ្រឹស្តី និងការអនុវត្តផ្ទាល់ជូនដល់សិក្ខាកាមជាមន្ត្រីបង្គោលទទួលបន្ទុកការងារស្ថិតិពាក់ព័ន្ធនឹងវិធីសាស្ត្រក្នុងការប្រមូល និងវិភាគស្ថិតិ និងការណែនាំអំពីទម្រង់ស្ថិតិសូចនាករ ដែលបានសិក្សាស្រាវជ្រាវ និងធ្វើបច្ចុប្បន្នភាព ស្របតាមបរិបទជាតិ តំបន់ និងសកលលោក ជាពិសេសតម្រង់ទិសដល់មន្ត្រីបង្គោលក្នុងការចូលរួមសហការ បំពេញ និងផ្តល់ទិន្នន័យស្ថិតិប្រកបដោយគុណភាព សុក្រឹតភាព និងគ្រប់ជ្រុងជ្រោយ។ ជាមួយគ្នានេះ សិក្ខាសាលានេះ ក៏បានផ្សព្វផ្សាយសៀវភៅទិន្នន័យស្ថិតិវិស័យសាធារណការ និងដឹកជញ្ជូន ប្រចាំឆ្នាំ ដែលជាកិច្ចខិតខំប្រឹងប្រែង និងសមិទ្ធផលរួមគ្នាជាមួយអគ្គនាយកដ្ឋានជំនាញ និងមន្ទីរសាធារណ ការនិងដឹកជញ្ជូនទាំង២៥ រាជធានី-ខេត្ត ដើម្បីប្រើប្រាស់ជាមូលដ្ឋានក្នុងការជួយដល់គាំទ្រដល់ការរៀបចំក្របខ័ណ្ឌគោលនយោបាយ ផែនការមេអភិវឌ្ឍន៍វិស័យហេដ្ឋារចនាសម្ព័ន្ធដឹកជញ្ជូន ផែនការយុទ្ធសាស្ត្រអភិវឌ្ឍន៍ជាតិ ផែនការសកម្មភាពអាទិភាព និងការសិក្សាស្រាវជ្រាវគម្រោងផ្សេងៗទៀត៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube