កិច្ចប្រជុំពិនិត្យរបាយការណ៍ស្តីអំពីសកម្មភាពការងាររបស់សមាគមបុគ្គលិកសាធារណការ និងដឹកជញ្ជូន ទីស្តីការក្រសួង៖ នាព្រឹកថ្ងៃព្រហស្បតិ៍ ទី២១ ខែវិច្ឆិកា ឆ្នាំ២០២៤ ឯកឧត្តម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការកណ្ដាលសមាគមបុគ្គលិកសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានកិត្តិយសសមាគមបុគ្គលិកសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យរបាយការណ៍ស្តីអំពីសកម្មភាពការងាររបស់សមាគមបុគ្គលិកសាធារណការ និងដឹកជញ្ជូន ដោយមានការអញ្ជើញចូលរួមពីឯកឧត្តម លោកជំទាវថ្នាក់ដឹកនាំក្រសួង លោក លោកស្រីជាប្រធាន អនុប្រធាននាយកដ្ឋាន អង្គភាព និងប្រធាន ឬតំណាងមន្ទីរសាធារណការ និងដឹកជញ្ជូនរាជធានី-ខេត្ត។ កិច្ចប្រជុំនេះធ្វើឡើង ក្នុងគោលបំណងពិភាក្សាវាយតម្លៃអំពីការប្រែប្រួលចំនួនសមាជិកសមាជិការបស់សមាគមពោលគឺ សមាជិកចូលថ្មី សមាជិកបោះបង់ និងមរណភាព ការគ្រប់គ្រងហិរញ្ញវត្ថុទាក់ទងនឹងចំណូល-ចំណាយ និងសមតុល្យរបស់សមាគម។ អង្គប្រជុំក៏បានលើកឡើងនូវចំនុចកែសម្រួលលក្ខន្តិកៈរបស់សមាគមបុគ្គលិក ពិភាក្សាបេក្ខភាពឈរឈ្មោះសម្រាប់អាណ្តតិថ្មី និងធាតុចូលមួយចំនួន ក្នុងនោះមានការរំលេចបន្ថែម និងជំរុញការផ្សព្វផ្សាយ តម្រង់គោលដៅ បង្កើនលទ្ធភាពវិជ្ជាជីវៈជូនសមាជិក និងទំនាក់ទំនងតាមអង្គភាពរាជធានី-ខេត្ត ឱ្យកាន់តែល្អប្រសើរ។ ថ្លែងក្នុងកិច្ចប្រជុំនាឱកាសនោះ ឯកឧត្តមរដ្ឋលេខាធិការប្រធានអង្គប្រជុំ បានថ្លែងអំណរគុណដល់អង្គប្រជុំ ដែលបានផ្តល់មតិយោបល់ ក៏ដូចជាធាតុចូលបន្ថែមសំដៅកែលម្អចំណុចខ្វះខាតឱ្យកាន់តែមានភាពប្រសើរឡើង និងបានអំពាវនាវសូមឱ្យអង្គភាពនានាជួយជ្រោមជ្រែងដល់សមាគមបន្តទៀត ដើម្បីជួយគ្នាទៅវិញទៅមកទាំងផ្លូវចិត្ត សម្ភារឱ្យបានរឹងមាំ និងរីកចម្រើន ក៏ដូចជារឹតចំណងសាមគ្គីភាពឱ្យកាន់តែរឹងមាំបន្ថែមទៀត សម្រាប់មន្រ្តីក្រសួងសាធារណការទាំងមូល ទាំងមន្រ្តីដែលកំពុងបម្រើការងារបច្ចុប្បន្ន និងមន្រ្តីដែលបានចូលនិវត្ត៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube