មន្ទីរសាធារណការ និងដឹកជញ្ជូនខេត្តតាកែវ នៅថ្ងៃទី៥ ខែវិច្ឆិកា ឆ្នាំ២០២៤នេះ បានសម្រេចផ្អាកចរាចរណ៍រថយន្ដដឹកទំនិញធុនធ្ងន់គ្រប់ប្រភេទឆ្លងកាត់ផ្លូវជាតិលេខ៣ ជាបណ្ដោះអាសន្ន ដើម្បីបង្ការគ្រោះថ្នាក់ជាយថាហេតុ និងទប់ស្កាត់ការខូចខាតហេដ្ឋារចនាសម្ព័ន្ធ ផ្លូវថ្នល់ ស្ពាន។ការប្រកាសផ្អាកចរាចរណ៍លើរថយន្ដធុនធ្ងន់នេះ បន្ទាប់ពីជំនន់ទឹកភ្លៀងបានជន់លិចហូរកាត់ផ្លូវជាតិលេខ៣ ត្រង់ចំណុចចន្លោះគីឡូម៉ែត្រលេខម៤១ ដល់គីឡូម៉ែត្រលេខ៤៣ (ផ្សារត្រាំខ្នារ) ស្ថិតក្នុងស្រុកគងពិសី និងចន្លោះគីឡូម៉ែត្រលេខ៥៣ ដល់ គីឡូម៉ែត្រលេខ ៥៥ (ផ្សារប៉ាង្គសី) ស្ថិតក្នុងស្រុកបសេដ្ឋ ខេត្តកំពង់ស្ពឺ។ ជាមួយនឹងការជូនដំនឹងពីការផ្អាកចរាចរណ៍លើរថយន្ដដឹកទំនិញធុនធ្ងន់គ្រប់ប្រភេទនេះ មន្ទីរសាធារណការ និងដឹកជញ្ជូនខេត្ត ក៏បានអំពាវនាវឲ្យម្ចាស់រថយន្ត ក៏ដូចជាអ្នកបើកបររថយន្ដដឹកទំនិញធុនធ្ងន់ទាំងអស់ដែលធ្វើចរាចរណ៍ពីរាជធានីភ្នំពេញ ឆ្ពោះទៅខេត្តកំពត និងសម្រាប់ទិសដៅពីខេត្តកំពតឆ្ពោះទៅរាជធានីភ្នំពេញ សូមធ្វើដំណើរវាងតាមផ្លូវជាតិលេខ២២ ឆ្ពោះទៅផ្លូវជាតិលេខ២ (ស្តុបអង្គតាសោម-ក្រុងដូនកែវ) ឬវាងទៅតាមផ្លូវជាតិលេខ៤១ ជាបណ្តោះអាសន្នសិន។សូមជម្រាបបន្ថែមថា កាលពីរសៀលថ្ងៃទី៤ ខែវិច្ឆិកា ម្សិលមិញនេះ លោក ឈា ប៊ុនរិទ្ធ រដ្ឋលេខាធិការប្រចាំ តំណាងឲ្យលោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំក្រុមការងារបច្ចេកទេសនៃនាយកដ្ឋានធារាសាស្រ្តកសិកម្ម ចុះពិនិត្យមើលជាក់ស្តែងស្ថានភាពជំនន់ទឹកភ្លៀងនៅក្នុងភូមិសាស្ត្រស្រុកបាទី ទីតាំងដែលបានកាយផ្តាច់ត្រង់ចំណុចចុងប្រឡាយមេទី២ នៃប្រព័ន្ធធារាសាស្ត្រហនុមាន ស្ថិតក្នុងភូមិរំចេក ឃុំត្នោត ដើម្បីរំដោះជំនន់ទឹកភ្លៀងទៅកាន់បឹងទំនប់រលក ស្ថិតក្នុងស្រុកសំរោង ខេត្តតាកែវ។បន្ទាប់មកពីពិនិត្យទីតាំងដែលកាយផ្ដាច់រួច លោករដ្ឋលេខាធិការប្រចាំការ បានបញ្ជាឱ្យក្រុមការងារបច្ចេកទេសរបស់នាយកដ្ឋាន ត្រៀមកាយផ្តាច់ទីតាំងចំនួន១កន្លែងទៀត ស្ថិតនៅក្នុងភូមិត្រពាំងយោង ឃុំពារាម ទម្លាក់ចូលបឹងក្រាំងក្រចាង និងបឹងស្វាយខម ដើម្បីជួយពន្លឿនការរំដោះជំនន់ទឹកភ្លៀងចេញពីឃុំត្រពាំងសាប ឃុំពារាម ឃុំចំបក់ និងឃុំត្នោត។ ទន្ទឹមនឹងនេះ លោកក៏បានណែនាំដល់ក្រុមការងារបច្ចេកទេសរបស់នាយកដ្ឋានធ្វើការសិក្សាទីតាំងទាំង២នេះ ដើម្បីសាងសង់សំណង់សិល្បការ្យបន្ថែម បន្ទាប់ពីជំនន់ទឹកភ្លៀងបានបញ្ចប់៕