សិក្ខាសាលាផ្សព្វផ្សាយសៀវភៅគម្រោងកម្មវិធីវិនិយោគសាធារណៈ (ក.វ.ស.) ៣ឆ្នាំរំកិល ២០២៤-២០២៦ និងកម្មវិធីបណ្តុះបណ្តាលមន្ត្រីបង្គោលថ្នាក់ជាតិ និងថ្នាក់ក្រោមជាតិ ទីស្តីការក្រសួង៖នាថ្ងៃព្រហស្បតិ៍ ទី១៧ ខែតុលា ឆ្នាំ២០២៤ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយសៀវភៅគម្រោងកម្មវិធីវិនិយោគសាធារណៈ (ក.វ.ស.) ៣ឆ្នាំរំកិល ២០២៤-២០២៦ និងកម្មវិធីបណ្តុះបណ្តាលមន្ត្រីជនបង្គោលថ្នាក់ជាតិ និងថ្នាក់ក្រោមជាតិ សម្រាប់បន្តការរៀបចំការងារ ក.វ.ស. ៣ឆ្នាំរំកិល ដោយមានការអញ្ជើញចូលរួមពីថ្នាក់ដឹកនាំក្រសួង គ្រូឧទ្ទេសជាមន្រ្តីជំនាញ និងសិក្ខាកាមមកពីអង្គភាពក្រោមឱវាទក្រសួង សរុបប្រមាណ១៨០ រូប។ សិក្ខាសាលានេះត្រូវបានរៀបចំឡើងក្នុងគោលបំណងបង្ហាញអំពីទិន្នន័យនៃគម្រោងវិនិយោគសាធារណៈដែលមានអាទិភាពខ្ពស់របស់ក្រសួង-ស្ថាប័នសម្រាប់អនុវត្ត ដើម្បីចូលរួមចំណែកសម្រេចបានគោលនយោបាយអាទិភាពនានា របស់រាជរដ្ឋាភិបាល និងដើម្បីជាធាតុចូលសម្រាប់ការរៀបចំក្របខ័ណ្ឌហិរញ្ញវត្ថុសាធារណៈ ក្របខ័ណ្ឌថវិការយៈពេលមធ្យម និងច្បាប់ហិរញ្ញវត្ថុសម្រាប់ការគ្រប់គ្រងប្រចាំឆ្នាំ។ ជាក់ស្ដែង នៅក្នុងដំណើរការរៀបចំ ក.វ.ស. ៣ឆ្នាំរំកិលនេះ គឺជាការបន្ដការអនុវត្ដ សេចក្ដីសម្រេចរបស់រាជរដ្ឋាភិបាលស្ដីពីសុខដុមនីយកម្មការងារផែនការចំណាយវិនិយោគ សាធារណៈរបស់រដ្ឋ និងហិរញ្ញប្បទានសហប្រតិបត្ដិការនៅក្នុង ក្របខណ្ឌក្រសួងសាធារណការ និងដឹកជញ្ជូន។ កម្មវិធីវិនិយោគសាធារណៈ (ក.វ.ស.) ៣ឆ្នាំរំកិល មានគោលដៅ និងគោលបំណងច្បាស់លាស់ចំនួន៣ រួមមាន៖ ទី១ គឺជាឧបករណ៍គ្រប់គ្រងគម្រោង ទី២ គឺជាមូលដ្ឋានគ្រឹះក្នុងការសម្របសម្រួលជាមួយក្រសួងស្ថាប័នពាក់ព័ន្ធ និងទី៣ យន្តការតម្រឹមសម្រិតសម្រាំងជាមួយដៃគូអភិវឌ្ឍន៍ ជាពិសេសការផ្សាភ្ជាប់ជាមួយកម្មវិធីវិនិយោគផ្សេងទៀត៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube