ជំនួបពិភាក្សាការងារជាមួយគណៈប្រតិភូប្រទេសកូរ៉េ ស្ដីពីយុទ្ធសាស្ត្រភាពជាដៃគូរបស់ប្រទេសកូរ៉េ ទីស្ដីការក្រសួង៖ នាព្រឹកថ្ងៃពុធ ទី៩ ខែតុលា ឆ្នាំ២០២៤ ឯកឧត្ដម សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន បានទទួលជួបពិភាក្សាការងារជាមួយគណៈប្រតិភូប្រទេសកូរ៉េ ដឹកនាំដោយលោកស្រី JAE EUN SHIN ស្ដីពីយុទ្ធសាស្ត្រភាពជាដៃគូរបស់ប្រទេសកូរ៉េ(Korea’s Country Partnership Strategy) ដោយមានការអញ្ជើញចូលរួមពីឯកឧត្តមជាថ្នាក់ដឹកនាំទទួលបន្ទុកការងារគម្រោងពាក់ព័ន្ធ និងមន្ត្រីជំនាញពាក់ព័ន្ធក្រោមឱវាទក្រសួង។ ជំនួបពិភាក្សានេះធ្វើឡើងក្នុងគោលបំណង ដើម្បីសិក្សាអំពីការពង្រឹងកិច្ចសហប្រតិបត្តិការលើគម្រោងជំនួយបច្ចេកទេស និងគម្រោងអភិវឌ្ឍន៍វិស័យហេដ្ឋារចនាសម្ព័ន្ធនៅកម្ពុជា រួមមានការសាងសង់ផ្លូវថ្នល់-ស្ពាន ប្រកបដោយគុណភាពធន់ទៅនឹងបម្រែបម្រួលអាកាសធាតុ ។ ឯកឧត្ដមរដ្ឋលេខាធិការ បានលើកឡើងពីយុទ្ធសាស្ត្រអាទិភាពរបស់រាជរដ្ឋាភិបាលក្នុងការជំរុញការតភា្ជប់ផ្លូវ-ស្ពាន និងហេដ្ឋារចនាសម្ព័ន្ធដឹកជញ្ជូនប្រកបដោយគុណភាព និងភាពប្រកួតប្រជែង និងបានជម្រាបជូនគណៈប្រតិភូពីបច្ចុប្បន្នភាពទាក់ទងនឹងការអភិវឌ្ឍហេដ្ឋារចនាសម្ព័ន្ធរបស់កម្ពុជា និងគម្រោងសំខាន់ៗមួយចំនួន ដែលក្នុងនោះរួមមានការចូលរួមចំណែករបស់ភាគីកូរ៉េផងដែរ។ ជាលទ្ធផល ភាគីកូរ៉េបានសម្តែងនូវការពេញចិត្តចំពោះកិច្ចសហប្រតិបត្តិការលើការអនុវត្តការងារកន្លងមក និងបច្ចុប្បន្ន ហើយនឹងពិចារណាផ្តល់ការគាំទ្រលើសំណើដែលបានលើកឡើង ដោយក្នុងនោះភាគីកូរ៉េក៏បានបង្ហាញពីឆន្ទៈក្នុងការពង្រីកកិច្ចសហប្រតិបត្តិការបន្ថែមទៀត លើការអភិវឌ្ឍគម្រោងហេដ្ឋារចនាសម្ព័ន្ធ និងការពង្រឹងសមត្ថភាពមន្រ្តីជំនាញបច្ចេកទេសដល់ក្រសួងសាធារណការ និងដឹកជញ្ជូន ផងដែរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube