កិច្ចប្រជុំពិភាក្សាការងារជាមួយដៃគូអភិវឌ្ឍន៍ JICA អំពីគម្រោងស្ថិតក្នុងរបៀងសេដ្ឋកិច្ចភាគខាងត្បូងនៃកម្ពុជា ទីស្តីការក្រសួង៖ នាថ្ងៃចន្ទ ទី២៦ ខែសីហា ឆ្នាំ២០២៤ លោក ឈឹម ផល្លា ប្រធាននាយកដ្ឋានផ្លូវថ្នល់ នៃក្រសួងសាធារណការ និងដឹកជញ្ជូន រួមជាមួយមន្ត្រីពាក់ព័ន្ធ បានជួបប្រជុំពិភាក្សាការងារជាមួយដៃគូអភិវឌ្ឍន៍ JICA អំពីគម្រោងស្ថិតក្នុងរបៀងសេដ្ឋកិច្ចភាគខាងត្បូងនៃកម្ពុជា។ ក្នុងនោះដែរ ភាគីក្រសួងបានស្នើឡើងនូវការធ្វើឱ្យប្រសើរនូវកំណាត់ផ្លូវជាតិលេខ ១ ពីភូមិសាស្ត្ររាជធានីភ្នំពេញ ទៅដល់កំពង់ផែស្វយ័តភ្នំពេញ និងការសាងសង់បន្ថែមនូវស្ពានឆ្លងកាត់ទន្លេមេគង្គ ដើម្បីកាត់បន្ថយការកកស្ទះចរាចរណ៍ និងសម្រួលដល់ធ្វើដំណើរ ឬដឹកទំនិញនានា ចេញ-ចូល ឆ្លងកាត់រាជធានីភ្នំពេញ។ ឆ្លើយតបនឹងការលើកឡើងខាងលើនេះ និងបន្ទាប់ពីបានស្តាប់ការបកស្រាយយ៉ាងលម្អិតពីភាពចាំបាច់នៃអភិវឌ្ឍន៍ក្នុងភូមិសាស្ត្រដែលបានលើកឡើង និងដោយផ្អែកលើទិន្នន័យនៃការសិក្សាប្រមូលធាតុចូល ភាគី JICA បានឯកភាពទទួលយកសំណើ ហើយនឹងដាក់ឆ្លងទៅថ្នាក់ដឹកនាំរបស់ខ្លួន។ ក្រៅពីនោះ ភាគីទាំងពីរក៏បន្តពិភាក្សាអំពីវឌ្ឍនភាពនៃការអនុវត្តការងារសាងសង់ផ្លូវជាតិលេខ ៥ ស្ថិតក្នុងគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ៥ ។ ជាមួយគ្នានោះផងដែរ លោកប្រធាននាយកដ្ឋានក៏បានថ្លែងអំណរគុណដល់ JICA ដែលជាតំណាងរដ្ឋាភិបាលជប៉ុន ក្នុងការជួយស្តារ និងធ្វើឱ្យប្រសើរឡើងនូវហេដ្ឋារចនាសម្ព័ន្ធនានានៅកម្ពុជានាពេលកន្លងមក និងសង្ឃឹមយ៉ាងមុតមាំក្នុងការបន្តកិច្ចសហប្រតិបត្តិការដ៏ល្អនៃប្រទេសទាំងពីរ៕