ពោធិ៍សាត់៖ លោក រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានសំណូមពរដល់ពលរដ្ឋក្រុងពោធិ៍សាត់ ចូលរួមកាតាព្វកិច្ចបង់សេវាកាកសំណល់រាវ តាមតម្លៃមួយសមរម្ស ដែលរដ្ឋកំណត់ ព្រោះចាប់ពីឥឡូវនេះទៅ យើងមានស្ថានីយប្រត្តិកម្មទឹកកខ្វក់ អាចច្រោះទឹកស្អុយទៅជាទឹកធម្មតា ដោយគ្មានជាតិពុល វានឹងជួយកាត់បន្ថយនូវជំងឺផ្សេងៗ ដល់ពលរដ្ឋយើងដែលរស់នៅជុំវិញទឹកស្អុយនេះផងដែរ ហើយមិនតែប៉ុណ្ណោះវានឹងជួយផ្តល់នូវអនាម័យ និងបរិស្ថានមានភាពល្អប្រសើរចំពោះយើងវិញផងដែរ។ លោករដ្ឋលេខាធិការក្រសួងសាធារណ និងដឹកជញ្ជូន បានសំណូមពរបែបនេះ ក្នុងពិធីសម្ពោធដាក់ឲ្យប្រើប្រាស់ គម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហាន១ អនុគម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងពោធិ៍សាត់ ក្រោមកម្ចីឥណទានសម្បទាន ពីធនាគារអភិវឌ្ឍន៍អាស៊ី(ADB) នៅថ្ងៃទី០២ ខែមិថុនា ឆ្នាំ២០២៤ ដែលមានទីតាំងឋិតនៅភូមិចំការចេកខាងជើង សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់។ ក្នុងពិធីនេះ ក៏មានការអញ្ជើញចូលរួមពីថ្នាក់ដឹកនាំខេត្ត និងលោក Anthony Gill តំណាងធនាគារអភិវឌ្ឍន៍អាស៊ី (ADB) ប្រចាំកម្ពុជាផងដែរ។ តាមរបាយការណ៍របស់លោក វង្ស ពិសិដ្ឋ អនុរដ្ឋលេខាធិការក្រសួងសាធារណការនិងដឹកជញ្ជូន និងជាប្រធាននាយកគម្រោងបានឲ្យដឹងថា ការសាងសង់ប្រព័ន្ធលូបេតុងថ្មីប្រវែង២៤,១៨ គ ម ស្តារនិងជួសជុលប្រព័ន្ធលូចាស់ប្រវែង២៧,១៩គម សាងសងស្ថានីយប្រព្រឹត្តកម្មទឹកកខ្វក់១កន្លែង ដែលមានសមត្ថភាពអាចចម្រោះទឹកកខ្វក់ តាមបែបធម្មតាបានចំនួន២.៤០០ម៉ែត្រគូបក្នុង១ថ្ងៃ។ ស្ថាបនា ផ្លូវក្រាលកៅស៊ូ២ជាន់(DBST) ចំនួន១៣ខ្សែ ប្រវែង២០,៦គីឡូម៉ែត្រ ទទឹងទ្រូងផ្លូវចន្លោះ៥ទៅ៨ម៉ែត្រ ស្ថាបនាផ្លូវបេតុងចំនួន០២ខ្សែប្រវែង១,៩៥គីឡូម៉ែត្រ ទទឹងទ្រូងផ្លូវ៤ទៅ៦ម៉ែត្រ ស្ថាបនាឡើងវិញនូវខឿនផ្លូវប្រវែង២២,៦៤គីឡូម៉ែត្រ ស្លាកសញ្ញាចរាចរណ៍ចំនួន៣៤២កន្លែង និងគំនូសចរាចរណ៍ចំនួន៧.៤៩៧ម៉ែត្រការ៉េ ស្តារប្រឡាយនិងពង្រីកតួប្រឡាយប្រវែង២,៨គីឡូម៉ែត្រ និងជួសជុលទំនប់ភូមិកោះ សង្កាត់លលកសក្រុងពោធិ៍សាត់ប្រវែង១.៥គីឡូម៉ែត្រ។ គម្រោងទាំងមូលគ្របដណ្តប់ លើផ្ទៃដីសរុប២៣៣ហិកតា ដីសម្រាប់សាង់សង់ស្ថានីយប្រព្រឹត្តកម្មទឹកកខ្វក់ មានទំហំ៣ហិកតា ដោយចំណាយថវិកាសរុបប្រមាណជាង១៣លាន៦២ម៉ឺនដុល្លាអាមេរិក។ លោករស់ វណ្ណា បានលើកឡើងថា ចំពោះទឹកកខ្វក់ក្រោយពីឆ្លងកាត់ស្ថានីយប្រព្រឹត្តកម្មនេះរួចហើយ វានឹងក្លាយទៅជាជីសម្រាប់ធ្វើកសិកម្ម ពិសេសកាកសំណល់ភក់ ដែលត្រូវធ្វើការកែឆ្នៃ។ ដើម្បីឲ្យស្ថានីយមួយនេះធានាបាននូវនិរន្តភាពយូរអង្វែង សូមប្រជាពលរដ្ឋចូលរួមបង់សេវាកាកសំណល់រាវ ដែលយើងគ្រប់ក្រុមគ្រួសារបានបញ្ចេញចោលរាល់ថ្ងៃ បន្ទាប់ពីសម្ពោធដាក់ឲ្យដំណើរការពីថ្ងៃនេះទៅ។ តាមរបាយការណ៍ត្រូវចំណាយ១២.០០០ដុល្លាអាមេរិកក្នុង១ខែ ជំហ៊ានដំបូងជាបន្ទុករដ្ឋ។ លោកបានបន្តថា នេះជាសមិទ្ធិផលថ្មីក្រោមដីមួយទៀត ដែលប្រជាពលរដ្ឋខេត្តពោធិ៍សាត់ ទទួលបានពីប្រមុខរាជរដ្ឋាភិបាល ក្នុងការលើកកម្ពស់សុខមាលភាព ឲ្យកាន់តែប្រសើរឡើង បន្ទាប់យើងមានទីលានទុកសំរាម១កន្លែង តាមបែបបច្ចេកទេសរួចហើយនោះ។ នៅចុងឆ្នាំ២០២៤នេះ សង្កាត់ចំនួន០៣នៅត្រើយខាងកើតស្ទឹងពោធិ៍សាត់ នៃក្រុងពោធិ៍សាត់ អាចទទួលបានគម្រោងសាងសង់ស្ថានីយប្រព្រឹត្តកម្មទឹកកខ្វក់ នេះផងដែរ៕