ក្រុមនិស្សិតនីតិសាស្រ្តអន្តរជាតិ នៃសាកលវិទ្យាល័យជាតិគ្រប់គ្រង បានទទួលអនុសាសន៍ផ្តាំផ្ញើល្អៗពីថ្នាក់ដឹកនាំក្រសួងសាធារណការ និងដឹកជញ្ជូន មុនពេលធ្វើដំណើរទៅចូលរួមការប្រកួតសវនាការប្រតិដ្ឋ នៅទីក្រុងឡាអេ ប្រទេសហូឡង់ ទីស្តីការក្រសួង៖ នាថ្ងៃចន្ទ ទី១៣ ខែឧសភា ឆ្នាំ២០២៤ ឯកឧត្តម ប៊ុន សុផាត អនុរដ្ឋលេខាធិការ តំណាងឯកឧត្តមរដ្ឋមន្ត្រី ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជួបសំណេះសំណាលជាមួយក្រុមនិស្សិតនីតិសាស្ត្រអន្តរជាតិ នៃសាកលវិទ្យាល័យជាតិគ្រប់គ្រង មុនពេលចេញដំណើរចូលរួមការប្រកួតសវនាការប្រតិដ្ឋ នៅទីក្រុងឡាអេ ប្រទេសហូឡង់ ដោយមានការចូលរួមពីសំណាក់ថ្នាក់ដឹកនាំ និងមន្ត្រីពាក់ព័ន្ធជាច្រើនរូបផងដែរ។ ជំនួបនេះធ្វើឡើងដើម្បីចែករំលែកអំពីបទពិសោធន៍ អនុសាសន៍ និងការអនុវត្តល្អៗ ដែលជាទស្សនទានដ៏មានតម្លៃបំផុតសម្រាប់និស្សិតនៅក្នុងការប្រកួតលើឆាកអន្តរជាតិ ដើម្បីចូលរួមចំណែកយ៉ាងសំខាន់ក្នុងការអភិវឌ្ឍធនធានមនុស្សក្នុងវិស័យយុត្តិធម៌ ក៏ដូចជាផ្តល់ឱកាសឱ្យនិស្សិតក្នុងការផ្សព្វផ្សាយពីប្រទេសកម្ពុជា ទៅកាន់ពិភពលោកផងដែរ។ ថ្លែងក្នុងឱកាសនោះ ឯកឧត្តមអនុរដ្ឋលេខាធិការ បានសម្តែងការកោតសរសើរចំពោះក្រុមនិស្សិតទាំងអស់ និងបានពាំនាំនូវការផ្ដាំផ្ញើសាកសួរសុខទុក្ខពីសំណាក់ ឯកឧត្តមរដ្ឋមន្ត្រី ក៏ដូចជាជំរុញលើកទឹកចិត្តឱ្យនិស្សិតទាំងអស់ផ្ដោតសំខាន់លើការខិតខំប្រឹងប្រែងប្រកួតប្រជែងឱ្យអស់ពីសមត្ថភាព ដើម្បីទទួលបានលទ្ធផលល្អប្រសើរជូនជាតិមាតុភូមិ និងបានលើកឡើងអំពីសមិទ្ធផលសំខាន់ៗ និងការងារជាច្រើនដែលក្រសួង ក្នុងនាមជាសេនាធិការរបស់រាជរដ្ឋាភិបាល បាន និងកំពុងអនុវត្តលើវិស័យសាធារណការ និងដឹកជញ្ជូននៅកម្ពុជា។ សូមជម្រាបជូនផងដែរថា៖ ក្រុមនិស្សិតដែលត្រូវទៅចូលរួមកម្មវិធីនេះ មានចំនួន៧រូប ដោយក្នុងនោះបេក្ខភាពប្រកួតមានចំនួន៥នាក់ និងគ្រូបង្វឹកចំនួន២រូប។ កម្មវិធីសវនាការប្រតិដ្ឋស្តីពីតុលាការព្រហ្មទណ្ឌអន្តរជាតិ ហៅថា " International Bar Association International Criminal Court Moot Court Competition 2024 " ជាកម្មវិធីប្រកួតប្រជែងសវនាការប្រតិដ្ឋកម្រិតថ្នាក់ពិភពលោក នៅក្នុងវិស័យច្បាប់ព្រហ្មទណ្ឌអន្តរជាតិ បានរៀបចំឡើងតាំងពីឆ្នាំ២០០៤ ដោយមានការចូលរួមប្រមាណជា១១២ សាកលវិទ្យាល័យ មកពីបណ្តាប្រទេសនៅជុំវិញពិភពលោក ហើយកម្មវិធីនេះ នឹងប្រព្រឹត្តទៅចាប់ពីថ្ងៃទី៣១ ខែឧសភា រហូតដល់ថ្ងៃទី០៧ ខែមិថុនា ឆ្នាំ២០២៤ នៅទីក្រុងឡាអេ ប្រទេសហូឡង់៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube