កោះកុង៖ ប្រជាពលរដ្ឋកំពុងទន្ទឹងរង់ចាំ សមិទ្ធផលថ្មីលើការស្ថាបនាផ្លូវជាតិលេខ៤៨ ក្នុងខេត្តកោះកុង ដែលក្រុមការងារបច្ចេកទេសកំពុងពន្លឿនការអ៊ុតកៅស៊ូ ដើម្បីសម្រួលដល់អ្នកធ្វើដំណើរ ក៏ដូចជាភ្ញៀវទេសចរ ដែលមានបំណងមកលេងកម្សាន្តក្នុងខេត្តជាប់សមុទ្រមួយនេះ នាពិធីបុណ្យចូលឆ្នាំប្រពៃណីជាតិខ្មែរខាងមុខ។ គិតត្រឹមចុងខែ កុម្ភៈ ២០២៣ ការសាងសង់បានជិត ៤៣% ខណៈក្រុមការងារស្ថាបនាផ្លូវជួបផលលំបាកខ្លាំង លើបច្ចេកទេសសាងសង់ និងខិតខំពន្លឿនការសាងសាង់បន្ថែមឲ្យបាន ៦០% នៅមុនពិធីបុណ្យចូលឆ្នាំថ្មីខាងមុខនេះ។ គេតែងនិយាយថា ផ្លូវជាតិលេខ៤៨ ក្នុងខេត្តកោះកុង មានចំណោតខ្ពស់ ជ្រោះជ្រៅ ផ្លូវកោងបត់បែនដូចអន្ទង់ ប្រឈមជួបគ្រោះថ្នាក់ចរាចរណ៍ និងពិបាកក្នុងការដឹកជញ្ជូនទំនិញជាដើម។ ប៉ុន្តែអ្វីៗគ្រប់យ៉ាងនឹងមានភាពល្អប្រសើរឡើងវិញក្រោយបញ្ចប់ការស្ថាបនាផ្លូវជាតិលេខ៤៨ ហើយរួចរាល់ជាស្ថាពរ នៅឆ្នាំ ២០២៥ខាងមុខ អ្នកធ្វើដំណើរលើដងផ្លូវនេះ នឹងទទួលបានភាពកក់ក្តៅខ្លាំងច្រើនជាងពេលកន្លងមក។ បើតាម លោក ហុក ស៊ីណាត អនុប្រធាន ទីប្រឹក្សាក្រុមការងារបច្ចេកទេស អះអាងថា កត្តាដែលធ្វើឲ្យអ្នកដំណើរ មានហានិភ័យបែបនេះ គឺដោយហេតុថា ដើមឡើយផ្លូវជាតិលេខ៤៨ ជាផ្លូវចាស់មានប្រវែង ១៥០គីឡូម៉ែត្រ តែក្រោយសាងសង់រួចផ្លូវនេះនឹងនៅសល់ប្រវែងសរុបត្រឹម ១៤៨គីឡូម៉ែត្រ ព្រោះថា ផ្លូវនេះមានចំណុចកោង ៣១២ទីតាំង ក្នុងនោះផ្លូវកោងអន្ទង់ អាំងខុសបច្ចេកទេស ៦៧ទីតាំង ដែលតម្រូវឲ្យកែសម្រួលតាមបច្ចេកទេសឡើងវិញឲ្យនៅសល់ត្រឹម ៧% ងាយស្រួលក្នុងធ្វើដំណើរពុំមានហានិភ័យ។ ដោយមានការសហការគ្នាយ៉ាងល្អ លោក អន ដាវុធ ប្រធានមន្ទីរសាធារណៈការ និងដឹកជញ្ជូន ខេត្តកោះកុង បានបង្ហាញសុទិដ្ឋិនិយមថា សម្រាប់ពេលនេះក្រសួងសារធារណៈការ បានបញ្ជូនក្រុមវិស្វករ ជំនាញៗ ចុះត្រួតពិនិត្យជាបន្តបន្ទាប់ ចំណែកឯក្រុមហ៊ុនទទួលបានសិទ្ធិសាងសង់ ក៏ដូចគ្នាដែរ ពោលគឺក្រុមការងារបច្ចទេសរបស់គេ កំពុងបន្ថែមគ្រឿងចក្រពុះបំបែកថ្ម ស្តារសម្រុតគ្រប់ចំណតទីតាំងដែលចោទខ្លាំង ចំនួនបីកន្លែង រួមមាន៖ ចំណោតអន្ទង់អាំងអន្តូងទឹក ត្រពាំងរូង និងតាតៃ ដើម្បីសម្រួលដល់ការធ្វើដំណើរទៅមកជាប្រចាំ។ ប្រជាពលរដ្ឋខេត្តកោះកុង ក៏ដូចជា អ្នកដំណើរធ្លាប់បានឆ្លងកាត់ផ្លូវជាតិលេខ ៤៨នេះ រីករាយសាទរយ៉ាងខ្លាំង និងបានថ្លែងអំណរគុណដល់រាជរដ្ឋាភិបាលកម្ពុជា បានផ្តល់នូវហេដ្ឋារចនាសម្ព័ន្ធផ្លូវជាតិមួយខ្សែនេះដែលជាផ្លូវដង្ហើមសេដ្ឋកិច្ច នៃភាគនិរតីរបស់ប្រទេស៕