ការចុះពិនិត្យផ្ទាល់លើការផ្សព្វផ្សាយ ពិគ្រោះយោបល់សាធារណៈកម្រិតសហគមន៍ និងសកម្មភាពការអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) នៅសង្កាត់ស្លក្រាម សង្កាត់សាលាកំរើក សង្កាត់ស្វាយដង្គំ និងសង្កាត់គោកចក ក្នុងក្រុងសៀមរាប សៀមរាប៖ នាថ្ងៃព្រហស្បតិ៍ ទី០១ ខែកុម្ភៈ ឆ្នាំ២០២៤ លោក លន់ ហេង តំណាងថ្នាក់ដឹកនាំអង្គភាពគ្រប់គ្រងគម្រោង និងជាអ្នកប្រធានចាត់ចែងគម្រោង រួមជាមួយលោកស្រី Mariam Sherman នាយិកាធនាគារពិភពលោកសម្រាប់កម្ពុជា ភូមា និងឡាវ បានចុះពិនិត្យផ្ទាល់លើការផ្សព្វផ្សាយ ពិគ្រោះយោបល់សាធារណៈកម្រិតសហគមន៍ និងសកម្មភាពការអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) នៅក្រុងសៀមរាប ដែលគាំទ្រថវិកាដោយធនាគារពិភពលោក ដោយមានការចូលរួមពីថ្នាក់ដឹកនាំ មន្ត្រីជំនាញនៃមន្ទីរសាធារណការ និងដឹកជញ្ជូនខេត្ត មន្ត្រីថ្នាក់មូលដ្ឋានមានខាងសង្កាត់ស្លក្រាម សង្កាត់សាលាកំរើក សង្កាត់ស្វាយដង្គំ សង្កាត់គោកចក និងតំណាងប្រជាពលរដ្ឋក្នុងសង្កាត់ទាំងបួន។ ក្នុងដំណើបេសកកម្មនេះ គឺដើម្បីធ្វើការពិនិត្យទៅលើការងារអនុវត្តផ្ទាល់ រួមមានការងារស្តារធ្វើឱ្យប្រសើរឡើងសា្ថនីយបូមទឹកកខ្វក់ទាំងបីទីតាំង ការងារស្តារធ្វើឱ្យប្រសើរឡើងស្ថានីយប្រព្រឹត្តកម្មទឹកកខ្វក់ ការងារសាងសង់បណ្តាញលូខ្នែង និងខ្នែងរង ជាពិសេសដំណើរការនៃការតភ្ជាប់បណ្តាញលូតាមខ្នងផ្ទះ និងចូលរួមក្នុងវេទិកាផ្សព្វផ្សាយបញ្ជ្រាបព័ត៌មានគម្រោងក្នុងសហគមន៍ ដើម្បីពង្រឹងការយល់ដឹងពីស្តង់ដារនានានៃការផ្តល់សេវាអនាម័យ ដល់ភាគីពាក់ព័ន្ធ មានមន្ទីរ ថ្នាក់ខេត្ត ក្រុង សង្កាត់ ដល់បងប្អូនពលរដ្ឋក្នុងក្រុងសៀមរាប ឱ្យទទួលបានព័ត៌មានគ្រប់ជ្រុងជ្រោយ ហើយអាចបង្កើនការកៀរគរពីសំណាក់ដៃគូពាក់ព័ន្ធគ្រប់កម្រិតនៅថ្នាក់ក្រោមជាតិ ឱ្យមានការចូលរួមគាំទ្របន្ថែមទៀតពីការតភ្ជាប់បណ្តាញលូទឹកកខ្វក់នៅតាមសង្កាត់គោលដៅ ឱ្យកាន់តែមានប្រសិទ្ធភាពល្អប្រសើរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube