ភ្នំពេញ៖នៅក្នុងពិធីសម្ពោធដាក់ឱ្យប្រើប្រាស់ជាផ្លូវការអាកាសយានដ្ឋានអន្តរជាតិសៀមរាបអង្គរនៅព្រឹកថ្ងៃទី១៦ ខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត បានថ្លែងថារាជរដ្ឋាភិបាលមានគោលការណ៍ពង្រីកផ្លូវជាលេខ ៦ពីចំណុចប្រសប់អក្សរ Tផ្លូវហាយវ៉េចេញពីព្រលានទៅដល់ទីរួមខេត្តគឺមានចម្ងាយជិត២០គីឡូម៉ែត្រដែលគ្រោងចំណាយ ៦០លានដុល្លារពង្រីកចេញជា៤គន្លងនិង ៦ គន្លងនិងកំពុងចរចាជាមួយក្រុមហ៊ុនធ្វើផ្លូវរទេះភ្លើងកម្រិតស្រាលតភ្ជាប់ពីព្រលានទៅកាន់ក្រុងសៀមរាបតែម្ដង ។ សម្តេចធិបតី ហ៊ុន ម៉ាណែត ថ្លែងថា៖ការពង្រឹងហេដ្ឋារចនាសម្ព័ន្ធតបភ្ជាប់ពីក្រុងសៀមរាបមកកាន់ព្រលានយន្តហោះគឺជាការងារដ៏សំខាន់ ។ ព្រលានយន្តហោះដែលនៅឆ្ងាយពីទី ក្រុងនៅលើពិភពលោកនេះមិនចម្លែកទេ ។ប៉ុន្តែអ្វីដែលសំខាន់គឺការតភ្ជាប់ពីព្រលានទៅទីក្រុង ។ នៅក្នុងន័យនេះសម្តេចធិបតីបានអរគុណក្រុមហ៊ុនវិនិយោគព្រលានយន្តហោះ ដែលមិនត្រឹមតែវិនិយោគសាងសង់ព្រលានទេគឺវិនិយោគកសាងផ្លូវហាយវ៉េពីព្រលានទៅដល់ផ្លូវជាតិលេខ ៦ ។ សម្តេចធិបតីបន្តថា៖«ភារកិច្ចនិងកិច្ចការដែលត្រូវធ្វើគោលការណ៍រាជរដ្ឋាភិបាលត្រៀមហើយមួយគឺយើងមានផែនការពីរទីមួយពង្រីកផ្លូវជាលេខ៦ របស់យើងពីចំណុចប្រសប់អ ក្សរ T ផ្លូវហាយវ៉េពីព្រលានទៅដល់ទីរួមខេត្តគឺមានចម្ងាយជិត ២០ គីឡូយើងបានត្រៀមហើយហើយគម្រោងចំណាយ ៦០ លានដុល្លារហើយយើងបានកំពុងចរចាហើយឆ្នាំក្រោយ យើងនឹងពង្រីកចេញជា៤ គន្លងនិង ៦ គន្លងសម្រាប់ការធ្វើដំណើរនេះ ។ ទីពីយើងកំពុងចរចាជាមួយក្រុមហ៊ុនធ្វើផ្លូវរទេះភ្លើងកម្រិតស្រាលពីព្រលានទៅកាន់ក្រុងសៀមរាបតែ ម្ដង »។ សម្តេចធិបតីបន្តថាការតភ្ជាប់នេះសំខាន់ណាស់គឺធ្វើយ៉ាងណាកាត់បន្ថយចំណាយ,កាត់បន្ថយពេលវេលារវាងការធ្វើដំណើរពីក្រុងសៀមរាបមកកាន់ព្រលា នយន្តហោះនេះ ។ សូមបញ្ជាក់ថាដើម្បីសម្រួលការធ្វើដំណើរចេញ-ចូលអាកាសយានដ្ឋានទៅកាន់ក្រុង​សៀមរា​បនោះក្រុមហ៊ុនសាងសង់ផ្លូវល្បឿនលឿនពីអាកាសយានដ្ឋាន​អន្តរជាតិសៀមរាបអង្គរទៅតភ្ជាប់ផ្លូវជាតិលេខ ៦ ត្រង់បង្គោលគីឡូម៉ែត្រ​លេខ​ ២៩៤ ដែលមាន​ប្រវែង​២៤.៥គីឡូម៉ែត្រ ។ តាមរយៈការសង់ផ្លូវតភ្ជាប់នេះការធ្វើដំណើរទៅកាន់​អាកាស​យានដ្ឋានអន្តរជាតិសៀមរាបអង្គរអាចធ្វើដំណើរតាមផ្លូវចំនួនពីរខ្សែ ។ ផ្លូវទី១.គឺតាមផ្លូវជាតិលេខ៦បត់ឆ្វេងចូលត្រង់បង្គោលគីឡូម៉ែត្រលេខ២៩៤ ដែលមានចម្ងាយពីទីប្រជុំជនក្រុងសៀមរាបប្រមាណ ៤៤.៥គីឡូម៉ែត្រ និង ផ្លូវទី២.តាមផ្លូវជាតិលេខ ៦ បត់ឆ្វេងចូលត្រង់បង្គោលគីឡូម៉ែត្រលេខ ២៨១ហើយបត់ទៅ​តាម​ផ្លូវជាតិលេខ៦៤ដែលមានចម្ងាយពីទីប្រជុំជនក្រុងសៀមរាបប្រមាណ៥៧គីឡូម៉ែត្រ៕