ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញសំណេះសំណាលជាមួយថ្នាក់ដឹកនាំ មន្ត្រីរាជការ មន្ត្រីកិច្ចសន្យា និងបុគ្គលិក នៃមន្ទីរសាធារណការ និងដឹកជញ្ជូន ខេត្តបន្ទាយមានជ័យ បន្ទាយមានជ័យ៖ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន នៅរសៀលថ្ងៃព្រហស្បតិ៍ទី១៤ ខែកញ្ញា ឆ្នាំ២០២៣។ បានអញ្ជើញជាអធិបតីភាពសំណេះសំណាលជាមួយថ្នាក់ដឹកនាំ មន្ត្រីរាជការ មន្ត្រីកិច្ចសន្យា និងបុគ្គលិក នៃមន្ទីរសាធារណការ និងដឹកជញ្ជូន ខេត្តបន្ទាយមានជ័យ ព្រមទាំងផ្តល់ជូនសម្ភារជួសជុល ថែទាំផ្លូវ ផ្លាកសញ្ញាចរាចរណ៍។ ជំនួបសំណេះសំណាលនេះ មានការអញ្ជើញចូលរួមពី ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងគណៈប្រតិភូអមដំណើររួមមាន ឯកឧត្តម រដ្ឋលេខាធិការ អនុរដ្ឋលេខាធិការ អគ្គនាយក ថ្នាក់ដឹកនាំក្រសួង លោកប្រធានមន្ទីរ និងមន្ត្រីពាក់ព័ន្ធជាច្រើនរូប។ ​លោកប្រធានមន្ទីរសាធារណការ​ និងដឹកជញ្ជូន​ ខេត្តបន្ទាយមានជ័យ បាន់លើកឡើងពីរបាយការណ៍វឌ្ឍនភាពការងារ ៩ខែដើមឆ្នាំ២០២៣ រួមមាន៖ សមិទ្ធផលដែលសម្រេចបាន បច្ចុប្បន្នភាពការងារកំពុងអនុវត្ត ទិសដៅការងារបន្ត និងសំណូមពរមួយចំនួនជាអាទិភាព ជម្រាបជូនឯកឧត្តមរដ្ឋមន្ត្រី។ ឯកឧត្តម អ៊ុំ រាត្រី បានលើកឡើងពីសមិទ្ធផលធំៗជាច្រើន ដែលជាការខិតខំរបស់ក្រសួងសាធារណការ និងដឹកជញ្ជូន តាំងពីអាណត្តិមុនៗ ដែលបានកែប្រែមុខមាត់ខេត្តជាប់ព្រំដែនមួយនេះ ឱ្យកាន់តែមានភាពសកម្ម ពិសេសគឺគម្រោងរៀបចំច្រកទ្វារព្រំដែនអន្តរជាតិស្ទឹងបត់-បាណងអៀន និងហេដ្ឋារចនាសម្ព័ន្ធផ្លូវថ្នល់តភ្ជាប់ខ្វាត់ខ្វែង។ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងពី​យុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ដែលបានដាក់ចេញ ដោយក្នុងនោះមានបាវចនាចំនួន៥ គឺ “កំណើន ការងារ សមធម៌ ប្រសិទ្ធភាព និងចីរភាព” និងមានអាទិភាពគន្លឹះចំនួន៥ គឺ “មនុស្ស ផ្លូវ ទឹក ភ្លើង និងបច្ចេកវិទ្យា”។ ឯកឧត្តមបន្តថា ក្រសួងបានរៀបចំយន្តការអនុវត្តការងារ ស្របតាមចក្ខុវិស័យ និងមាគ៌ានយោបាយរបស់រាជរដ្ឋាភិបាលអាណត្តិទី៧ ផ្ដោតសំខាន់លើចំណុចសំខាន់ៗដូចជា៖ បន្តលើកកម្ពស់សេវាដឹកជញ្ជូនឱ្យកាន់តែមានប្រសិទ្ធភាព គុណភាព លឿនរហ័ស និងបន្តលើកកម្ពស់ការតភ្ជាប់ការដឹកជញ្ជូន និងការអភិវឌ្ឍហេដ្ឋារចនាសម្ព័ន្ធផ្លូវថ្នល់។ ក្រសួងក៏ដាក់ចេញនូវយន្តការធំៗចំនួន ៤ រួមមាន៖ (១)ពង្រឹងប្រសិទ្ធភាពអភិបាលកិច្ចផ្ទៃក្នុង និងអភិវឌ្ឍធនធានមនុស្ស (២)ពិពិធកម្មនៃប្រភពធនធានថវិកា (៣)ពង្រីកការគ្រប់គ្រង និងប្រសិទ្ធភាពនៃការប្រើប្រាស់ថវិកា ពង្រឹងការងារនីតិកម្ម និងកសាងបទដ្ឋានបច្ចេកទេស និង (៤)ពង្រឹងការប្រើប្រាស់បច្ចេកវិទ្យាទំនើប និងប្រព័ន្ធឌីជីថល។ ឯកឧត្តមរដ្ឋមន្ត្រី បានផ្តល់នូវអនុសាសន៍ល្អៗ និងបានអញ្ជើញជាកិត្តិយសផ្តល់ជូននូវសម្ភារ និងផ្លាកសញ្ញាសុវត្ថិភាពការដ្ឋានផ្លូវថ្នល់ រួមមាន៖ មួកការដ្ឋាន​ អាវចំណាំងផ្លាត​ កៅស៊ូត្រជាក់​ Cold Mix ចំនួន ២០០បាវ ដល់មន្ទីរសម្រាប់ប្រើប្រាស់ក្នុងការជួសជុលថែទាំផ្លូវ ក្នុងដែនសមត្ថកិច្ចរបស់ខ្លួនផងដែរ៕