រតនគិរីៈ ប្រជាពលរដ្ឋ រស់នៅតាមបណ្ដោយផ្លូវជាតិលេខ៧៨ ក៏ដូចជា ពលរដ្ឋនៅទីក្រុងបានលុង ផងដែរ បានសំណូមពរយ៉ាងទទូច សុំឲ្យប្រធាន មន្ទីរសាធារណការ និងអាជ្ញាធរខេត្ដរតនគិរី មេត្តាមានវិធានការផ្លូវច្បាប់ ទៅលើម្ចាស់ រថយន្ដណាដែលរកសុីដឹកជ័រកៅស៊ូស្អុយ លក់ធ្វើអាជីវកម្ម ហើយមិនបានវេចខ្ចប់ ឲ្យបានត្រឹមត្រូវ។ កាលើកឡើងបែបនេះ ដោយសាមានអ្នករកស៊ីមួយចំនួន បានដឹកជ័រកៅស៊ូស្អុយ ទៅលក់នៅខេត្តក្រោម ដើម្បីធ្វើអាជីវកម្ម ហើយដឹកឆ្លងកាត់ទីក្រុងបានលុង ជាញឹកញាប់ តែពុំបានវេចខ្ចប់ជ័រនោះ ឲ្យបានត្រឹមត្រូវទេ ធ្វើឲ្យទឹកជ័រស្អុយ ហូរស្រោច ប្រឡាក់ផ្លូវជាតិលេខ៧៨ ស្ទើរគ្រប់ពេល បណ្ដាលឲ្យប៉ះពាល់ដល់ផ្លូវដង្ហើមពួកគាត់។ ជាក់ស្ដែង កាលពីថ្ងៃទី២១ ខែសីហា ឆ្នាំ២០២៣ នេះ មានរថយន្ដខ្នាតធំមួយគ្រឿង ពាក់ស្លាកលេខកំពង់ចាម 3A-1265 ដឹកជ័រកៅស៊ូស្អុយ ពេញមួយរថយន្ថ បើកចេញ ពីស្រុកបរកែវ ឆ្ពោះទៅខេត្ដត្បូងឃ្មុំ តែគេពុំបានវេចខ្ចប់ជ័រនោះ ទៅតាមកាណែនាំរបស់មន្ត្រីជំនាញទេ ធ្វើឱ្យទឹកស្អុយ ហូរស្រោចពេញផ្លូវជាតិលេខ៧៨ ហើយតៃកុងថា មិនបានដឹងពីកាណែនាំ​របស់មន្ទីរសាធារណការ និងដឹកជញ្ជូន ខេត្ដរតនគិរីនោះទេ។ គួររំលឹកថា កាលពីខែវិច្ឆិកា ឆ្នាំ២០២២ កន្លងទៅ លោក សាយ សាមាន ប្រធានមន្ទីរសាធារណការ និងដឹកជញ្ជូន ខេត្ដរតនគិរី និងជាប្រធានលេខាធិការដ្ឋាន នៃអនុគណ:កម្មការ សុវត្ដិភាពចរាចរណ៍ផ្លូវគោក បានចេញសេចក្ដីជូនដំណឹងមួយ ដល់ម្ចាស់ឃ្លាំង និងម្ចាស់រថយន្ដ ដែលរកសុីដឹកជ័រកៅស៊ូស្អុយ ធ្ចើចរាចរណ៍លើផ្លូវជាតិ លេខ៧៦ និងផ្លូវជាតិលេខ៧៨ ក៏ដូចជាផ្លូវនានា ក្នុងភូមិសាស្ត្រខេត្តរតនគីរី ឲ្យបានជ្រាបជាព័ត៌មាន និងបានផ្សព្វផ្សាយ តាមវិទ្យុ និងបណ្ដាញសង្គម។ ការជូនដំណឹងនោះ បានបញ្ជាក់ថាៈ ម្ចាស់ឃ្លាំង និងម្ចាស់រថយន្ដ ត្រូវតែវេចខ្ចប់ជ័រស្អុយ ឲ្យបានត្រឹមត្រូវ មុននឹងធ្វើការដឹកជញ្ជូនចេញទៅលក់ ដើម្បីការពារទឹកស្អុយ ហូរចេញ ពីជ័រកៅស៊ូ នាំឲ្យប្រឡាក់ផ្លូវសាធារណៈ ធ្វើឲ្យប៉ះពាល់សុខភាព ប្រជាពលរដ្ឋ ដែលរស់នៅតាមដងផ្លូវ។ ម្ចាស់ឃ្លាំងទាំងអស់ រួមនឹងម្ចាស់រថយន្ដ ក្រោយទទួលជ្រាបហើយ ត្រូវតែគោរព និងធ្វើតាម បើនៅបន្ដល្មើសទៀត ខាងមន្ទីរ នឹងចាត់វិធានការតាមច្បាប់ជាធរមាន៕