ចុះពិនិត្យវឌ្ឈនភាពការងារសាងសង់បណ្តាញលូខ្នែង ខ្នែងរង និងការកែលម្អប្រព័ន្ធចម្រោះទឹកកខ្វក់ សៀមរាប៖ ថ្ងៃអាទិត្យ ៨កើត ខែបឋមាសាឍ ឆ្នាំថោះបញ្ចស័ក ព.ស ២៥៦៧ ត្រូវនឹងថ្ងៃទី២៥ ខែមិថុនា ឆ្នាំ២០២៣ ឯកឧត្តមរដ្ឋលេខាធិការ រស់ វណ្ណា និងឯកឧត្តមរដ្ឋលេខាធិការ យិត បុណ្ណា ក្រសួងសាធារណការ និងដឹកជញ្ជូន បានដឹកនាំក្រុមការងារបច្ចេកទេសចុះពិនិត្យវឌ្ឈនភាពការងារសាងសង់បណ្តាញលូខ្នែង ខ្នែងរងទឹកកខ្វក់ នៅតំបន់ខាងលិចស្ទឹង WTS-S2 ការកែលម្អស្ថានីយ៍បូមវត្តចក និងចុះពិនិត្យស្ថានីយប្រព្រឹត្តកម្មសំណល់ភក់ (បំលែងជាជីសរីរាង្គ) នៅកន្ត្រក ក្នុងក្របខណ្ឌគម្រោងការផ្គត់ផ្គង់ទឹកស្អាត និងអនាម័យ (WaSSIP) ដោយមានការចូលរួមពីប្រធាននាយកដ្ឋានចំណុះឱ្យអគ្គនាយកដ្ឋានប្រព័ន្ឋចម្រោះទឹកកខ្វក់ នាយកគម្រោង ប្រធានចាត់ចែងគម្រោង ក្រុមហ៊ុនទីប្រឹក្សាបច្ចេកទេស CTI ក្រុមហ៊ុនសាងសង់VIWASEEN និងមន្ត្រី បុគ្គលិកពាក់ព័ន្ឋ។ ឯកឧត្តមរដ្ឋលេខាធិការ បានផ្តល់ការណែនាំឱ្យមន្ត្រីបច្ចេកទេសយកចិត្តទុកដាក់លើការកែសម្រួលប្រតិទិនការងារក្នុងចន្លោះខែសីហា-តុលា ព្រោះជារដូវវស្សា និងត្រូវយកចិត្តទុកដាក់ខ្ពស់លើបច្ចេកទេសត្រង់តំណរទុយោ uPVC ព្រមទាំងបរិក្ខារត្រួតពិនិត្យ និងបរិក្ខារបំពាក់មួយចំនួនសម្រាប់ស្ថានីយបូមដែលងាយស្រួលរកក្នុងទីផ្សារក្នុងស្រុកសម្រាប់ការងារប្រតិបត្តិ និងថែទាំ។ សូមជម្រាបជូនថាគម្រោងនេះគ្រោងបញ្ចប់ការងារសាងសង់ ការងារកែលម្អ (Civil Works)យ៉ាងយូរនៅដើមឆ្នាំ២០២៤ខាងមុខ៕