នៅព្រឹកថ្ងៃទី២៣ ខែឧសភា ឆ្នាំ២០២៣ លោកជំទាវ មឹន មាណវី រដ្ឋលេខាធិការ តំណាង ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីបើកវគ្គផ្សព្វផ្សាយអំពីអនុសញ្ញាស៊ី-ដ(CEDAW) និងច្បាប់ពាក់ព័ន្ធមួយចំនួន នៅទីស្តីការក្រសួង។ វគ្គផ្សព្វផ្សាយអំពីអនុសញ្ញាស៊ី-ដ(CEDAW) និងច្បាប់ពាក់ព័ន្ធមួយចំនួន បានរៀបចំឡើងក្នុងគោលបំណងផ្តល់ជូននៅចំណេះដឹងពាក់ព័ន្ធនឹងច្បាប់ស្តីពីអនុសញ្ញាស៊ី-ដ (CEDAW) និងផ្សព្វផ្សាយនៅអនុសាសន៍គន្លឹះទាំង១២ចំណុច របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានលើកឡើងនៅក្នុងកិច្ចប្រជុំបូកសរុបការងារឆ្នាំ២០២២ និងផែនការសកម្មភាពការងារប្រចាំឆ្នាំ២០២៣ របស់ក្រុមប្រឹក្សាជាតិកម្ពុជាដើម្បីស្ត្រី កាលពីថ្ងៃទី២១ ខែកុម្ភះ ឆ្នាំ២០២៣ ដល់សិក្ខាកាមដែលបានចូលរួមទាំងអស់ បានយល់ដឹងកាន់តែច្បាស់លាស់ថែមទៀត អំពីតួនាទី និងតម្លៃរបស់ស្ត្រី នៅគ្រប់ទីកន្លែង និងគ្រប់លំដាប់ថ្នាក់។ គោលការណ៍គ្រឹះទាំង៣នៃអនុសញ្ញាស៊ី-ដ រួមមាន សមភាព គ្មានការរើសអើង និងកាតព្វកិច្ចរបស់រដ្ឋភាគី។ គួរបញ្ជាក់ថា អនុសញ្ញាស៊ី-ដ មាន៣០មាត្រា (មាត្រាគោលអនុវត្ត១-១៦) និងគោលការណ៍ទាំង៣នៃអនុសញ្ញាស៊ី-ដ រក្សានូវភាពដើមជានិច្ច ។កម្ពុជា បានក្លាយជារដ្ឋភាគីក្នុងឆ្នាំ១៩៩២ និងអនុវត្តដោយឥតលក្ខខណ្ឌ ហើយរដ្ឋភាគីត្រូវផ្ញើរបាយការណ៍ដំបូងក្រោយក្លាយជារដ្ឋភាគីរយះពេល២ឆ្នាំ និងបន្ទាប់មករៀងរាល់៤ឆ្នាំ។កម្ពុជា បានផ្ញើរបាយការណ៍ចំនួន៣ដង៖ ១/របាយការណ៍គួបលើកដំបូង ទី២ និងទី៣ នៅឆ្នាំ២០០៣ ២/របាយការណ៍គួបលើកទី៤ និងទី៥ ឆ្នាំ២០១០ ៣/ របាយការណ៍គួបលើកទី៦ ឆ្នាំ២០១៨ ៤/របាយការណ៍គួបលើកទី៧ ឆ្នាំ២០១៤។ គិតត្រឹមថ្ងៃទី១២ ខែមិថុនា ឆ្នាំ២០១៩ ចំនួនរដ្ឋភាគី រួមមាន -សមាជិកអង្គការសហប្រជាជាតិ មាន១៩៣ -រដ្ឋភាគីអនុសញ្ញាស៊ី-ដ មាន១៨៩ -ប្រទេសក្នុងអាស៊ានទាំងអស់ គឺជារដ្ឋភាគីនៃអនុសញ្ញាស៊ី-ដ៕