កិច្ចប្រជុំស្តីពីការត្រៀមរៀបចំការងារដឹកជញ្ជូនប្រតិភូកីឡា ក្នុងព្រឹត្តិការណ៍ការប្រកួតកីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ទីស្តីការក្រសួង៖ នាព្រឹកថ្ងៃអង្គារ ១៣កើត ខែពិសាខ ឆ្នាំថោះ បញ្ចស័ក ព.ស ២៥៦៦ ត្រូវនឹងថ្ងៃទី០២ ខែឧសភា ឆ្នាំ២០២៣ ឯកឧត្តម តូច ចាន់កុសល រដ្ឋលេខាធិការប្រចាំការក្រសួងសាធារណការ និងដឹក ជញ្ជូន និងជាប្រធានក្រុមការងារដឹកជញ្ជូន បានអញ្ជើញដឹកនាំកិច្ចប្រជុំស្តីពីការត្រៀមរៀបចំការងារដឹកជញ្ជូនប្រតិភូកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ដោយមានការចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីសំណាក់ថ្នាក់ដឹកនាំ សមាជិកសមាជិកាក្រុមការងារ អនុក្រុមការងារប្រចាំការ នៅរាជធានី-ខេត្តទាំង៤ (សៀមរាប ព្រះសីហនុ កំពត និងកែប)។ កិច្ចប្រជុំនេះ ត្រូវបានរៀបចំឡើងក្នុងគោលបំណងរាយការណ៍ជូនអំពីបច្ចុប្បន្នភាព នៃដំណើរអញ្ជើញដល់ របស់គណៈប្រតិភូកីឡា ដែលត្រូវចូលរួមព្រឹត្តិការណ៍ការប្រកួតកីឡាអាស៊ីអាគ្នេយ៍ លើកទី៣២ និង អាស៊ានប៉ារ៉ាហ្គេម លើកទី១២ ឆ្នាំ២០២៣ និងសភាពការណ៍ទូទៅនៃការរៀបចំការងារដឹកជញ្ជូនក្នុង ព្រឹត្តិការណ៍កីឡានេះ។ ថ្លែងក្នុងឱកាសនេះដែរ ឯកឧត្តមរដ្ឋលេខាធិការប្រចាំការប្រធានក្រុមការងារបានផ្តល់អនុសាសន៍ណែនាំ សមាជិកសមាជិកា នៃក្រុមការងារ អនុក្រុមការងារ ត្រូវសហការគ្នាឱ្យបានជិតស្និទ្ធជាមួយភាគីពាក់ព័ន្ធ ផ្តល់ព័ត៌មានទៅវិញទៅមកឱ្យបានគ្រប់ជ្រុងជ្រោយ ដើម្បីដោះស្រាយបញ្ហាប្រឈមឱ្យបានទាន់ពេលវេលា ជាពិសេស ត្រូវអនុវត្តតាមតួនាទី និងភារកិច្ចដែលថ្នាក់ដឹកនាំបានប្រគល់ជូនឱ្យអស់ពីលទ្ធភាព សំដៅ ធានាឱ្យការងារដឹកជញ្ជូនកំឡុងពេលប្រកួតប្រកបដោយសណ្តាប់ធ្នាប់ និងប្រព្រឹត្តទៅបានដោយរលូន មានប្រសិទ្ធភាពការងារខ្ពស់ ដើម្បីលើកមុខមាត់ជាតិក្នុងនាមជាម្ចាស់ផ្ទះ។ សូមជម្រាបជូនថា៖ ព្រឹត្តិការណ៍ការប្រកួតកីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ នឹងមានអត្តពលិក និងគ្រូបង្វឹកចូលរួមប្រមាណ ៧០០០នាក់ មន្ត្រីបច្ចេកទេស ចៅក្រម និងអាជ្ញាកណ្តាលប្រមាណ ២០០០នាក់។ ដោយឡែក ក្រុមការងារដឹកជញ្ជូន ត្រូវបានបែងចែកជា ១១ ក្រុម និង២អនុក្រុម ប្រចាំនៅរាជធានី-ខេត្តទាំង៤ (សៀមរាប ព្រះសីហនុ កំពត និងកែប)៕