[Kampucheathmey] - ផ្លូវទៅតំបន់កន្ទុយនាគប្រសព្វ ៣ ប្រទេស កម្ពុជា-ឡាវ-វៀតណាម គ្រោងសាងសង់នៅឆ្នាំ ២០២៨
2023-04-05
Go to the website published Kampucheathmey
រដ្ឋាភិបាលគ្រោងនឹងសាងសង់ផ្លូវទៅតំបន់មុំ ៣ កន្ទុយនាគដែលប្រសព្វគ្នារវាងប្រទេស ៣ គឺកម្ពុជា-ឡាវ-វៀតណាមនៅឆ្នាំ ២០២៨។
ថ្លែងប្រាប់បណ្ដាញព័ត៌មានក្នុងសន្និសីទកាលពីម្សិលមិញនេះ លោក សាយ សាមាន ប្រធានមន្ទីរសាធារណការ និងដឹកជញ្ជូនខេត្តរតនគិរី បានឲ្យដឹងថា ក្នុងសន្និបាតបូកសរុបលទ្ធផលការងាររបស់ក្រសួងសាធារណការនិងដឹកជញ្ជូន ជួសមុខឲ្យថ្នាក់ដឹកនាំខេត្ត លោកបានធ្វើបទអន្តរាគមន៍ស្នើសុំការសាងសង់ផ្លូវចំនួនពីរខ្សែក្នុងខេត្តរតនគិរី។
លូវទាំងពីរខ្សែដែលលោកលើកសំណើយ៉ាងទទូចនោះគឺទីមួយផ្លូវទៅវ៉ឺនសៃ និងមួយខ្សែទៀតគឺផ្លូវទៅតំបន់មុំ ៣ កន្ទុយនាគប្រសព្វគ្នារវាងកម្ពុជា-ឡាវ-វៀតណាម។
ជាការឆ្លើយតបរដ្ឋមន្ត្រីក្រសួងសាធារណការបានសន្យានឹងរៀបចំឆាប់ៗ។ បើតាមលោក សាយ សាមាន ផ្លូវទៅតំបន់កន្ទុយនាគ ត្រូវបានរៀបចំចូលជាប្រព័ន្ធផ្លូវជាតិមានឈ្មោះផ្លូវជាតិលេខ ៧៨-៥។
លោកបន្តថា ផ្លូវនេះសរុបមានប្រវែង ១៩១ គ.ម ចែកចេញជា ៣ កំណាត់។ គឺទីមួយពីក្រុងបានលុងទៅភូមិតងណងលិប្រភេទជា DBST មានប្រវែង ២១.៩៥ គ.ម កំណាត់ទីពីរពីភូមិតងណងលិទៅដល់ស្រុកតាវែងជាផ្លូវល្បាយថ្មដែលមានប្រវែង ២៥.៩ គ.ម និងកំណាត់ទី ៣ ពីស្រុកតាវែងរហូតទៅដល់តំបន់កន្ទុយនាគមានប្រវែង ១៤៣.៩៦ គ.ម។
លោកបន្តថា ផ្លូវទៅតំបន់កន្ទុយនាគបច្ចុប្បន្នអាចធ្វើដំណើរបានត្រឹមស្រុកតាវែង បើចង់ធ្វើដំណើរបន្តដល់តំបន់មុំ ៣ កន្ទុយនាគត្រូវឆ្លងចូលប្រទេសវៀតណាម។
ដោយឡែកផ្លូវទៅវ៉ឺនសៃ លោក សាយ សាមាន ប្រធានមន្ទីរសាធារណការនិងដឹកជញ្ជូនខេត្តរតនគិរីបានបញ្ជាក់ថា ចែកចេញជាពីរកំណាត់ គឺចេញពីអូរជុំទៅវ៉ឺនសៃជាផ្លូវក្រាលគ្រួសក្រហមមានប្រវែង ២៨.៥២ គ.ម និងមួយកំណាត់ទៀតជាផ្លូវដីបន្តរហូតដល់ត្រពាំងក្រៀលព្រំប្រទល់កម្ពុជាឡាវមានប្រវែង ១០៤,៤៥ គ.ម។ សរុបផ្លូវទាំងមូលមានប្រវែង ១៣២,៩៧ គ.ម។
លោកបញ្ជាក់ថា ផ្លូវទៅវ៉ឺនសៃជាគម្រោងផ្លូវជាតិ ដែលនឹងគ្រោងចាប់ផ្តើមអនុវត្តការសាងសង់នៅឆ្នាំ ២០២៧។ ដោយឡែកផ្លូវទៅតំបន់មុំ ៣ កន្ទុយនាគប្រសព្វគ្នារវាងកម្ពុជា-ឡាវ-វៀតណាម គ្រោងចាប់ផ្ដើមអនុវត្តការសាងសង់នៅឆ្នាំ ២០២៨ ប៉ុន្តែអាចលឿនជាការគ្រោងទុកដោយផ្អែកតាមស្ថានភាពជាក់ស្ដែង៕
