លោក តាំង ម៉េងលាន អភិបាលរងខេត្តកណ្តាល និងជាអនុគណៈកម្មការរៀបចំពិធីបុណ្យសង្ក្រាន្ត អមដំណើរដោយ លោក ចាប វន្នី ទីប្រឹក្សាក្រសួង និងជាប្រធានមន្ទីរព័ត៌មានខេត្ត បានដឹកនាំក្រុមការងារចុះពិនិត្យ ការសាងសង់ផ្លូវកៅស៊ូ AC ច្រកចូលរមណីយដ្ឋានភ្នំព្រះរាជទ្រព្យ ផ្លូវបេតុងចូលវត្តព្រះធម្មកេរ្តិ៍ ពិនិត្យបរិវេណបឹងផ្សារដែក និង សំណង់នានាជាច្រើនទៀត ដើម្បីត្រៀមរៀបចំសង្រ្កាន្តខេត្តកណ្ដាល នៅក្នុងបរិវេណភ្នំព្រះរាជទ្រព្យ ស្ថិតក្នុងឃុំផ្សារដែក និងឃុំភ្នំបាត ស្រុកពញាឮ ដែលរៀបចំឡើងដោយរដ្ឋបាលខេត្តកណ្តាល ដើម្បីឱ្យប្រជាពលរដ្ឋ ភ្ញៀវទេសចរជាតិ និងភ្ញៀវទេសចរបរទេសមកលេងកម្សាន្ត ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ នៅថ្ងៃទី១៤-១៦ ខែមេសា ឆ្នាំ២០២៣។ លោក អភិបាលរងខេត្តកណ្តាល បានធ្វើការណែនាំដល់មន្ត្រីពាក់ព័ន្ធ អាជ្ញាធរស្រុក ឱ្យពិនិត្យទីតាំងឱ្យបានសមស្រប ដើម្បីត្រៀមរៀបចំសង្រ្កាន្តឆ្នាំថ្មី នាពេលខាងមុខនេះ ដើម្បីបង្កលក្ខណៈសប្បាយរីករាយជូនប្រជាពលរដ្ឋ ទាំងក្នុងខេត្ត និងខេត្តជាប់ព្រំប្រទល់ផងដែរ ខណៈពិធីបុណ្យចូលឆ្នាំថ្មីប្រពៃជាតិខ្មែរ នឹងឈានចូលមកដល់នៅសល់តែជាង១០ថ្ងៃទៀតប៉ុណ្ណោះ ។ លោកបានស្នើដល់មន្ទីរអង្គភាពជុំវិញខេត្ត និង អាជ្ញាធរស្រុក ត្រូវពន្លឿនការងារដែលនៅសេសសល់ឱ្យបានឆាប់រហ័ស និងមានសណ្ដាប់ធ្នាប់ មានសោភណភាព បរិស្ថានល្អ និងមានអនាម័យ ត្រូវរៀបចំភ្លើងបំភ្លឺ និងភ្លើងពណ៌សម្រាប់លម្អនៅពេលយប់ ឱ្យបានឆាប់រហ័ស ត្រូវយកចិត្តទុកដាក់ក្នុងការថែរក្សា និងសម្អាតបរិស្ថាននៅក្នុងបរិវេណភ្នំព្រះរាជទ្រព្យឱ្យបានល្អប្រសើរជាប្រចាំផងដែរ ជាពិសេសត្រូវធ្វើការផ្សព្វផ្សាយឱ្យបានទូលំទូលាយ ដើម្បីឱ្យស្រទាប់មហាជនបានជ្រួតជ្រាប ពីសកម្មភាពដែលយើងបានធ្វើ។ ជាមួយគ្នានេះលោកអភិបាលរងខេត្ត ក៏បានជំរុញដល់ក្រុមការងារ អនុគណៈកម្មការសង្ក្រាន្ត ត្រូវសហការអនុវត្តតួនាទីភារកិច្ចដូចមានកំណត់ក្នុងសេចក្ដីសម្រេចឱ្យបានល្អប្រសើរ កងកម្លាំងមានសមត្ថកិច្ចត្រូវត្រៀមរៀបចំផែនការការពារថែរក្សាសន្តិសុខ សណ្ដាប់ធ្នាប់សាធារណៈ ជូនប្រជាពលរដ្ឋដែលអញ្ជើញមកលេងកម្សាន្តសប្បាយឱ្យបានល្អ និងមានប្រសិទ្ធភាព ។ លោក តាំង ម៉េងលាន បន្តថា ការរៀបចំកម្មវិធីសង្ក្រាន្តខេត្តកណ្តាល នៅភ្នំព្រះរាជទ្រព្យ សម្រាប់ឱកាសបុណ្យចូលឆ្នាំថ្មីប្រពៃណីជាតិខ្មែរ គឺក្នុងគោលបំណងផ្តល់ឱកាសដល់យុវជន ប្រជាពលរដ្ឋ ភ្ញៀវទេសចរជាតិ និងភ្ញៀវទេសចរបរទេស បានឈ្វេងយល់នូវភាពសម្បូរបែបនៃវប្បធម៌ អរិយធម៌ ទំនៀមទម្លាប់ ប្រពៃណី និងសាសនា របស់ព្រះរាជាណាចក្រកម្ពុជាយើង ដើម្បីរួមចំណែកក្នុងការបំផុសគំនិត ស្មារតីយុវជន ប្រជាជនឱ្យចេះរួមកម្លាំងគ្នា សាមគ្គីគ្នាជាធ្លុងមួយ ជាគ្រួសារខ្មែរតែមួយ ក្នុងមោទនភាពជាតិខ្មែរ និងស្មារតីអភិរក្ស អភិវឌ្ឍន៍វប្បធម៌ជាតិ អត្តសញ្ញាណជាតិខ្មែរឱ្យបានគង់វង្ស រីកចម្រើនទៅមុខទៀត។ លោកបានអំពាវនាវដល់បងប្អូនប្រជាពលរដ្ឋ ពិសេសប្រជាពលរដ្ឋ ក្នុងខេត្តកណ្ដាល សូមអញ្ជើញចូលរួមសប្បាយរីករាយជួបជុំគ្នា លេងល្បែងប្រពៃណី និងរាំលេងកម្សាន្ត ក្នុងឱកាសសង្ក្រាន្តខេត្តកណ្ដាល នៅភ្នំព្រះរាជទ្រព្យឱ្យបានច្រើនកុះករ ៕