“ការងារដំណើរការបានល្អប្រកបដោយប្រសិទ្ធភាព ទាមទារត្រូវចេះធ្វើផែនការ និងកំណត់សូចនាករគោលដៅឱ្យច្បាស់លាស់ ” គឺជាវត្ថុបំណងក្នុងពិធីបើកសិក្ខាសាលាបណ្ដុះបណ្ដាល និងផ្សព្វផ្សាយផែនការយុទ្ធសាស្ត្រថវិកា (BSP) ឆ្នាំ២០២៣-២០២៥ របស់ក្រសួងសាធារណការ និងដឹកជញ្ជូន កាលពីថ្ងៃទី២៣ មីនា ឆ្នាំ២០២៣ សៀមរាប៖ ថ្ងៃព្រហស្បតិ៍-សុក្រ ២-៣កើត ខែចេត្រ ឆ្នាំខាល ចត្វាស័ក ព.ស ២៥៦៧ ត្រូវនឹងថ្ងៃទី២៣-២៤ ខែមីនា ឆ្នាំ២០២៣ ឯកឧត្តមអនុរដ្ឋលេខាធិការ ស៊ឹង សុគង់ តំណាងឯកឧត្តម សួង ហេង រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាបណ្ដុះបណ្ដាល និងផ្សព្វផ្សាយផែនការយុទ្ធសាស្ត្រថវិកា(BSP) ឆ្នាំ២០២៣-២០២៥ របស់ក្រសួង សាធារណការ និងដឹកជញ្ជូន ដល់អង្គភាពថវិកាក្រោមឱវាទក្រសួង ដោយមានការចូលរួមពីសិក្ខាកាម ជាមន្ត្រីជំនាញរៀបចំផែនការ នៃអង្គភាពថវិកាថ្នាក់កណ្ដាល និងមន្ទីរសាធារណការ និងដឹកជញ្ជូនទាំង ២៥រាជធានី-ខេត្ត សរុបប្រមាណ១២០រូប។ សិក្ខាសាលានេះមានរយៈពេលពីរថ្ងៃ រៀបចំឡើងក្នុងគោលបំណង ដើម្បីផ្សព្វផ្សាយផែនការយុទ្ធសាស្ត្រថវិកាឆ្នាំ២០២៣-២០២៥ ជូនដល់គ្រប់អង្គភាពថវិកាក្រោមឱវាទក្រសួងសាធារណការ និងដឹកជញ្ជូន ឱ្យបានយល់ដឹងស៊ីជម្រៅ និងចែករំលែកបទពិសោធន៍ពីការរៀបចំផែនការយុទ្ធសាស្ត្រថវិកា ដើម្បីបង្កើនសមត្ថភាព និងលទ្ធភាពក្នុងការធ្វើឱ្យផែនការយុទ្ធសាស្ត្រថវិកាក្លាយជាឧបករណ៍ដ៏សំខាន់ សំដៅសម្រេចឱ្យបាននូវផែនការ និងគោលនយោបាយរបស់ក្រសួង ក៏ដូចជារាជរដ្ឋាភិបាលប្រកបដោយប្រសិទ្ធភាព គុណភាព និងទាន់ពេលវេលា។ ថ្លែងទៅកាន់អង្គពិធីនាឱកាសនោះ ឯកឧត្តមអនុរដ្ឋលេខាធិការ បានគូសបញ្ជាក់ពីកិច្ចខិតខំប្រឹងប្រែងរបស់ក្រសួងដែលបានធ្វើឱ្យប្រសើឡើងនូវការប្រើប្រាស់ថវិកាជាតិ និងការវិភាជន៍ថវិកាទៅតាមអង្គភាពថវិកាប្រកបដោយប្រសិទ្ធភាព តម្លាភាព និងភាពត្រឹមត្រូវ និងដែលបានជំរុញឱ្យអង្គភាពថវិកាទាំងអស់ទទួលខុសត្រូវ និងមានភាពជាម្ចាស់ការក្នុងការអនុវត្តការងារដែលក្រសួងបានប្រគល់ជូន ដើម្បីលើកកម្ពស់គុណភាព និងអនុវត្តផែនការយុទ្ធសាស្ត្រថវិកាប្រកបដោយប្រសិទ្ធភាព អនុលោមតាមក្របខណ្ឌ នៃការអនុវត្តកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ។ បន្ថែមពីលើនេះ ឯកឧត្តមអនុរដ្ឋលេខាធិការ បានលើកឡើងមថា៖ លទ្ធផលការងារសម្រេចបានខាងលើនេះ ទាមទារនូវការចូលរួមពីគ្រប់ភាគីពាក់ព័ន្ធទាំងអស់ ដើម្បីរៀបចំផែនការយុទ្ធសាស្ត្រថវិកា និងផែនការថវិកាប្រចាំឆ្នាំឱ្យក្លាយជាវិធានការដ៏សំខាន់មួយក្នុងទិសដៅច្បាស់លាស់ និងអាចបែងចែកធនធានថវិកាប្រកបដោយសមធម៌ និរន្តរភាព និងការអភិវឌ្ឍ ព្រមទាំងសមស្របតាមកម្មវិធីកែទម្រង់ស៊ីជម្រៅរបស់រាជរដ្ឋាភិបាលផងដែរ។ ឯកឧត្ដមអនុរដ្ឋលេខាធិការ បានថ្លែងអំណរគុណដល់អគ្គនាយកដ្ឋានផែនការ និងគោលនយោបាយ និងក្រុមការងារពាក់ព័ន្ធទាំងអស់ ដែលបានរៀបចំកម្មវិធីនេះឡើង និងដែលបានខិតខំប្រឹងប្រែងសម្រេចបាននូវផែនការយុទ្ធសាស្ត្រថវិកាឆ្នាំ២០២៣-២០២៥ ដោយបានកំណត់ចេញនូវសូចនាករសម្រាប់ក្រសួង និងបានសម្តែងក្តីសង្ឃឹមយ៉ាងមុតមាំថាសិក្ខាសាលានេះនឹងមានការពិភាក្សាដេញដោលយ៉ាងផុលផុសរវាងសិក្ខាកាម និងគ្រូឧទ្ទេសន៍ ដើម្បីផ្ដល់ចំណេះដឹង និងបទពិសោធន៍ថ្មីៗបន្ថែមទៀត សំដៅយកទៅបំពេញបន្ថែមនូវចំណុចខ្វះខាត ក៏ដូចជាផ្សព្វផ្សាយបន្តក្នុងអង្គភាពរបស់ខ្លួនឱ្យកាន់តែទូលំទូលាយ និងជំរុញឱ្យការរៀបចំយុទ្ធសាស្រ្តថវិកា និងផែនការថវិការបស់ក្រសួងកាន់តែមានប្រសិទ្ធភាពខ្ពស់៕