សិក្ខាសាលាពិគ្រោះយោបល់លើសេចក្តីព្រាងចុងក្រោយ នៃផែនការមេស្ដីពី "ទំនើបកម្មប្រព័ន្ធព័ត៌មានភស្តុភារកម្មនៅកម្ពុជា" (Cambodia Logistic Information Modernization Master Plan) ដើម្បីសម្រេចឱ្យបាននូវប្រព័ន្ធភស្តុភារកម្មប្រកបដោយប្រសិទ្ធភាព និងភាពជឿនលឿន ភ្នំពេញ៖ ថ្ងៃអង្គារ ៨រោច ខែផល្គុន ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៤ ខែមីនា ឆ្នាំ២០២៣ លោកជំទាវ តុង ផល្លី អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីភាពក្នុងពិធីបើកសិក្ខាសាលាពិគ្រោះយោបល់លើ សេចក្តីព្រាងចុងក្រោយនៃផែនការមេស្ដីពី "ទំនើបកម្មប្រព័ន្ធព័ត៌មានភស្តុភារកម្មនៅកម្ពុជា" (Cambodia Logistic Information Modernization Master Plan) ដែលជាជំនួយអភិវឌ្ឍន៍ផ្លូវការ (ODA) របស់រដ្ឋាភិបាលនៃសាធារណរដ្ឋកូរ៉េ តាមរយៈក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន សហការរៀបចំដោយវិទ្យាស្ថាន Korea Research Institute for Human Settlements (KRIHS) ដោយមានការចូលរួមពីមន្ត្រីបច្ចេកទេសក្រសួងក្រុមហ៊ុន Neighbor System សកលវិទ្យាល័យ Incheon National University និងក្រុមហ៊ុន SAMOOCM ផងដែរ។ ផែនការមេនេះបានបង្ហាញពីការវិភាគយ៉ាងទូលំទូលាយអំពីប្រព័ន្ធភស្តុភារកម្មនៅកម្ពុជា និងផ្ដល់ការណែនាំអំពីទិដ្ឋភាពជាក់ស្ដែងសម្រាប់ការធ្វើទំនើបកម្ម អាស្រ័យហេតុនេះហើយទើបក្រុមការងាររៀបចំសិក្ខាសាលានេះឡើងក្នុងគោលបំណងប្រមូលធាតុចូលបន្ថែមពីភាគីពាក់ព័ន្ធ ដើម្បីធ្វើឱ្យរបាយការណ៍សិក្សានេះមានភាពស៊ីជម្រៅ និងគ្រប់ជ្រុងជ្រោយ។ សិក្ខាសាលានេះមានការធ្វើបទបង្ហាញអំពីផែនការមេនៃប្រព័ន្ធព័ត៌មានភស្តុភារកម្មនៅកម្ពុជា (Cambodia Logistic Information Master Plan) ព្រមទាំងការធ្វើបទបង្ហាញអំពីប្រព័ន្ធព័ត៌មានភូមិសាស្ត្រដឹកជញ្ជូន និងស្ទិកគ័រសុវត្ថិភាពសម្រាប់រថយន្តដឹកទំនិញនៅប្រទេសកូរ៉េ (The Transportation GIS and Truck Safety Stickers In Korea) សម្រាប់អង្គពិធីទាំងមូលផងដែរ។ ចក្ខុវិស័យរបស់ផែនការមេ គឺដើម្បីសម្រេចឱ្យបាននូវប្រព័ន្ធភស្តុភារកម្មប្រកបដោយប្រសិទ្ធភាព និងភាពជឿនលឿនតាមរយៈការផ្លាស់ប្តូរឌីជីថល និងការដាក់ចេញគោលដៅសំខាន់ៗចំនួន៣រួមមាន៖ ការផ្លាស់ប្តូរទៅជាឌីជីថល (Digital Transformation) ការច្នៃប្រឌិតឌីជីថល (Digital Innovation) និងបរិស្ថានឌីជីថល (Digital Environment) ក្នុងនោះចាំបាច់ឱ្យក្រុមការងារអនុវត្តយុទ្ធសាស្ត្រចំនួន១២ ដើម្បីសម្រេចចក្ខុវិស័យឱ្យបានជោគជ័យ។ សូមជម្រាបថា៖ ផែនការមេស្ដីពី "ទំនើបកម្មប្រព័ន្ធព័ត៌មានភស្តុភារកម្មនៅកម្ពុជា" (Cambodia Logistic Information Modernization Master Plan) ស្ថិតក្រោមគម្រោងរៀបចំផែនការមេទំនើបកម្មប្រព័ន្ធភស្តុភារកម្មកម្ពុជា និងអនុវត្តសាកល្បងដោយផ្អែកលើប្រព័ន្ធបច្ចេកវិទ្យាកុំព្យូទ័រ (Cambodia Master Plan of Logistics System Modernization and Pilot Project of Logistics Computer System) ដែលគម្រោងនេះរៀបចំដើម្បីធ្វើឱ្យប្រសើរឡើងនូវប្រព័ន្ធភស្តុភារកម្មជាតិរបស់ប្រទេសកម្ពុជា ដោយផ្តោតលើទិសដៅសំខាន់ៗចំនួន០៣គឺ៖ ១) ការបង្កើតផែនការមេប្រព័ន្ធគ្រប់គ្រងព័ត៌មានភស្តុភារកម្មជាតិ ២) ការអនុវត្តសាកល្បងនៃប្រព័ន្ធព័ត៌មានភស្តុភារកម្ម និង ៣) ការបង្កើនសមត្ថភាពរបស់មន្ត្រីរាជការ តាមរយៈការបណ្តុះបណ្តាលក្នុងប្រទេស និងនៅប្រទេសកូរ៉េ៕