ពិធីរំលឹកខួបលើកទី១១២ ទិវាអន្តរជាតិនារី ៨មីនា ឆ្នាំ២០២៣ នៅទីស្តីការក្រសួងសាធារណការ និងដឹកជញ្ជូន ក្រោមមូលបទ៖ ស្ដ្រីរួមគ្នា រក្សាសុខសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល ទីស្ដីការក្រសួង៖ ថ្ងៃចន្ទ ១៥កើត ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៦ ខែមីនា ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីភាពក្នុងពិធីរំលឹកខួបលើកទី១១២ ទិវាអន្តរជាតិនារី ៨មីនា ឆ្នាំ២០២៣ ក្រោមមូលបទ៖ ស្ដ្រីរួមគ្នា រក្សាសុខសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល ដោយក្នុងពិធីនេះមានការចូលរួមពីថ្នាក់ដឹកនាំក្រសួង ប្រធានសមាគមនារីក្រសួងសាធារណការ និងដឹកជញ្ជូន តំណាងសមាគមនារីកម្ពុជាដើម្បីសន្តិភាព និងអភិវឌ្ឍន៍ តំណាងក្រសួងកិច្ចការនារី និងមន្ត្រីរាជការជាស្ត្រីរបស់ក្រសួងផងដែរ។ ក្នុងសុន្ទរកថាស្វាគមន៍ លោកជំទាវមឹន មាណវី រដ្ឋលេខាធិការ និងជាប្រធានសមាគមនារីក្រសួងសាធារណការ និងដឹកជញ្ជូន បានគូសបញ្ជាក់អំពីការយកចិត្តទុកដាក់ និងការផ្ដល់តម្លៃដល់មន្ត្រីរាជការជាស្ត្រីស្របតាមឆន្ទៈរបស់រាជរដ្ឋាភិបាលកម្ពុជា ក្នុងការគោរពសិទ្ធិមនុស្ស និងតម្លៃស្ត្រីយ៉ាងពិតប្រាកដ ដោយបានជំរុញសកម្មភាពលើកកម្ពស់សមភាពយេនឌ័រ ការយកចិត្តទុកដាក់ផ្ដល់កិត្តិយស មិនរើសអើង មិនមើលស្រាលលើសមត្ថភាព ព្រមទាំងបានផ្ដល់ឱកាសឱ្យស្ត្រីបង្កើនភាពអង់អាចក្នុងការកសាងសមត្ថភាពប្រកបដោយចីរភាពសម្រាប់ការអភិវឌ្ឍសង្គមជាតិ។ ថ្លែងក្នុងមតិសំណេះសំណាលនាឱកាសនេះ ឯកឧត្តមទេសរដ្ឋមន្ត្រី បានគាំទ្រលើមូលបទដែលបានលើកឡើងថា ”ស្ដ្រីរួមគ្នា រក្សាសុខសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល” ដែលក្នុងនោះការពង្រឹងសមត្ថភាពឱ្យស្របទៅនឹងបច្ចុប្បន្នភាពនៃការអភិវឌ្ឍរបស់សង្គម ពិសេសភាពរីកចម្រើននៃបដិវត្តន៍ឧស្សាហកម្ម 4.0 ដែលទាមទារឱ្យស្រ្តីគ្រប់រូប និងមន្ត្រីរាជការជាស្រ្តីត្រូវចេះប្រើប្រាស់ប្រព័ន្ធបច្ចេកវិទ្យា ដើម្បីទទួលបានព័ត៌មាននៃការវិវឌ្ឍនទាន់ហេតុការនៃព្រត្តិការណ៍សំខាន់ៗ។ ឯកឧត្តមទេសរដ្ឋមន្ត្រី បានស្នើឱ្យវិទ្យាស្ថានតេជោសែនសាធារណការ និងដឹកជញ្ជូន សហការជាមួយ អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ក្នុងការរៀបចំកម្មវិធីបណ្ដុះបណ្ដាលវគ្គខ្លី លើការប្រើប្រាស់កុំព្យូទ័រ កម្មវិធីស្រាវជ្រាវតាមរយៈគេហទំព័រ (Search Engine) ជំនាញធ្វើបទបង្ហាញ (Presentation skill) ជំនាញភាពជាអ្នកដឹកនាំ (Leadership skill) ដល់មន្ត្រីរាជការជាស្តី្រនៅក្រសួងសាធារណការ និងដឹកជញ្ជូន ដើម្បីបង្កើនសមត្ថភាពស្ត្រីឱ្យកាន់តែទូលំទូលាយ ព្រមទាំងបានណែនាំឱ្យថ្នាក់ដឹកនាំក្រសួងសិក្សាលទ្ធភាពតែងតាំងស្ត្រីជាអនុប្រធានមន្ទីរសាធារណការ និងដឹកជញ្ជូន នៅគ្រប់រាជធានី-ខេត្តទាំងអស់ ដើម្បីលើកកម្ពស់សមភាពយេនឌ័រ និងបង្កើនភាពអង់អាចដល់ស្រ្តីក្នុងនាមជាថ្នាក់ដឹកនាំ៕