មន្រ្តីជាន់ខ្ពស់ក្រសួងសាធារណ​ការ និងដឹកជញ្ជូន បានលើកឡើងថាបច្ចុប្បន្នរាជរដ្ឋភិបាលបាននឹងកំពុងសិក្សាគម្រោងរថភ្លើងទំនើបចំនួន៤ ដើម្បីសាងសង់នៅកម្ពុជា។ ហើយប្រសិនបើគម្រោងទាំងនេះចេញរូបរាង នឹងចូលរួមចំណែកកាត់បន្ថយការកកស្ទះចរាចរណ៍នៅក្នុងរាជធានីភ្នំពេញ និងទីប្រជុំជននានាក្នុងប្រទេសកម្ពុជាផងដែរ។ នេះបើតាមប្រសាសន៍របស់ឯកឧត្តម តូច ចាន់កុសល រដ្ឋលេខាធិការប្រចាំការក្រសួងសាធារណការ និងដឹកជញ្ជូន។ នៅក្នុងកម្មវិធីជំនួបពិភាក្សាការងារជាមួយនិងក្រុមហ៊ុន Doppelmayr Group ដឹកនាំដោយលោក Martin Ladner អ្នកគ្រប់គ្រងប្រចាំតំបន់កាលពីថ្ងៃទីថ្ងៃទី០៧ ខែកុម្ភៈ ឆ្នាំ២០២៣ ។ យោងតាមការដកស្រង់របស់ក្រសួងសាធារណកា និងដឹកជញ្ជូន នៅក្នុងជំនួបខាងលើ ឯកឧត្តមរដ្ឋលេខាធិការ បានបញ្ជាក់ថាគម្រោងផ្លូវរថភ្លើងទំនើបចំនួន៤ ដែលកំពុងសិក្សានោះរួមមាន៖ គម្រោងសាងសង់ផ្លូវដែកល្បឿនលឿន (High-speed Train) គម្រោងប្រព័ន្ធប្រតិបត្តិការរថភ្លើងស្វ័យប្រវត្តិ (AGT) គម្រោងសិក្សាផ្លូវរថភ្លើងក្រោមដី (Subway) និងការសិក្សាផ្លូវរថភ្លើងលើអាកាសដឹកអ្នកដំណើរធុនស្រាល (Monorail) ជាដើម។ គួរជម្រាបផងដែរថា ទាក់ទងទៅនឹងគម្រោងសិក្សារថភ្លើងទំនើបខាងលើនេះ កាលពីពេលកន្លងទៅសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ក៏ធ្លាប់បានលើកឡើងអំពីគម្រោងសាងសង់រថភ្លើងក្រោមដីផងដែរ ដោយគម្រោងនេះតភ្ជាប់ពីរាជធានីភ្នំពេញ ទៅ ខេត្តកណ្ដាល គ្រោងចំណាយថរិកាជិត២ពាន់លានដុល្លារ។​ ដោយឡែកសម្រាប់រថភ្លើងល្បឿនលឿនវិញ តាមការសិក្សាជំហានដំបូងពីក្រុមហ៊ុនសាជីវកម្មស្ពាន និងថ្នល់ចិន (CRBC) បានឱ្យដឹងថា គម្រោងផ្លូវនេះមានប្រវែងសរុបប្រមាណ ៣៨២គីឡូម៉ែត្រ គ្រោងចាយទុនវិនិយោគប្រមាណជាង ៤ពាន់លានដុល្លារ ដោយរួមបញ្ចូលទាំងក្បាល និងទូរថភ្លើងសម្រាប់ដំណើរការ និងប្រើប្រាស់រយៈពេលសាងសង់ប្រមាណ ៤ឆ្នាំ។ ផ្លូវរថភ្លើងល្បឿនលឿននេះ មានខ្នាតទទឹងប្រវែង ១.៤៣៥ មម ល្បឿនសម្រាប់ធ្វើចរាចរណ៍គឺ ១៦០គ.ម/ម៉ និងមានស្ថានីយសរុបចំនួន៣៣ សម្រាប់ដំណើរការ ។ ចំពោះខ្សែររថភ្លើងត្រូវបំពាក់ប្រភេទក្បាលរថភ្លើង ដែលដំណើរការដោយថាមពលអគ្គិសនី ដោយមានការសាងសង់ផ្លូវអាកាសរំលងកាត់ទទឹងផ្លូវប្រមាណជាង ៣០០កន្លែង ដើម្បីបញ្ចៀសគ្រោះថ្នាក់ចរាចរណ៍ត្រង់ចំណុចប្រសព្វជាមួយផ្លូវថ្នល់ និងមានបែងចែកដាច់ពីគ្នា រវាងស្ថានីយអ្នកដំណើរ និងស្ថានីយលើកដាក់ទំនិញ នៅភូមិសាស្ត្ររាជធានីភ្នំពេញ (មួយនៅស្ថានីយភ្នំពេញសម្រាប់អ្នកដំណើរ និងមួយទៀតនៅស្ថានីយសំរោងសម្រាប់លើកដាក់ទំនិញ)៕