កិច្ចប្រជុំបូកសរុបការងារខែធ្នូ ឆ្នាំ២០២២ និងទិសដៅខែមករា ឆ្នាំ២០២៣ របស់ក្រុមការងារយុវជនគណបក្សក្រសួងសាធារណការ និងដឹកជញ្ជូន រាជធានីភ្នំពេញ៖ ថ្ងៃព្រហស្បតិ៍ ១៣រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៩ ខែមករា ឆ្នាំ២០២៣ លោកជំទាវ កុយ សុដានី សមាជិកយុវជនគណបក្សប្រជាជនកម្ពុជាថ្នាក់កណ្ដាល និងជាប្រធានក្រុមការងារយុវជនគណបក្សក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំប្រចាំខែ របស់ក្រុមការងារយុវជនគណបក្សក្រសួង ដោយកិច្ចប្រជុំនេះក៏មានការអញ្ជើញចូលរួមពី ឯកឧត្តម លោកជំទាវ លោក លោកស្រី ជាអនុប្រធាន សមាជិកអចិន្ត្រៃយ៍ និងសមាជិក សមាជិកា។ កិច្ចប្រជុំនេះផ្ដោតសំខាន់ទៅលើការ បង្ហាញសមិទ្ធផលការងាររបស់ក្រុមការងារយុវជនគណបក្សក្រសួងប្រចាំឆ្នាំ២០២២ និងទិសដៅបន្ត ការផ្សព្វផ្សាយឯកសារជំនួយស្មារតីនៃសភាពការណ៍ទូទៅខែធ្នូ ឆ្នាំ២០២២ និងទិសដៅឃោសនាអប់រំខែមករា ឆ្នាំ២០២៣ និងផ្សព្វផ្សាយអំពីលទ្ធផលនៃមីទ្ទីងអបអរសាទរខួបអនុស្សាវរីយ៍លើកទី៤៤ នៃទិវាជ័យជម្នះ ៧មករា ព្រមទាំងប្រគល់ជូននូវបណ្ណសរសើរដល់សមាជិក សមាជិកា នៃក្រុមការងារយុវជនក្រសួង។ ឆ្លៀតក្នុងឱកាសនេះ លោកជំទាវ កុយ សុដានី ក៏បានថ្លែងអំណរគុណ ឯកឧត្តម លោកជំទាវ លោក លោកស្រី ជាអនុប្រធាន និងសមាជិក សមាជិកា ដែលបានខិតខំប្រឹងប្រែងអនុវត្តការងារនាពេលកន្លងមក ដោយជំរុញដល់សមាជិក សមាជិកាទាំងអស់ ត្រៀមខ្លួនសម្រាប់ផែនការឆ្ពោះទៅការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ចាប់ពីដំណាក់កាលត្រៀមបោះឆ្នោត អំឡុងពេលយុទ្ធនាការបោះឆ្នោត ថ្ងៃបោះឆ្នោត និងក្រោយការបោះឆ្នោត ព្រមទាំងបន្ដការយកចិត្តទុកដាក់អនុវត្តការងារផ្សេងៗបន្ថែមទៀតតាមគោលការណ៍ណែនាំ និងបន្តផ្សព្វផ្សាយសកម្មភាពរបស់យុវជនតាមប្រព័ន្ធផ្សព្វផ្សាយសង្គមផងដែរ៕