កិច្ចប្រជុំបន្តដើម្បីត្រៀមរៀបចំសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងសាធារណការ និងដឹកជញ្ជូន ដែលនឹងប្រព្រឹត្តទៅនាដើមខែកុម្ភៈ ឆ្នាំ២០២៣ ខាងមុខ ទីស្តីការក្រសួង៖ ថ្ងៃសុក្រ ១៥កើត ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៦ ខែមករា ឆ្នាំ២០២៣ ឯកឧត្តម តូច ចាន់កុសល រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ ដើម្បីត្រៀមរៀបចំសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ ដែលគ្រោងនឹងប្រព្រឹត្តទៅនាដើមខែកុម្ភៈ ឆ្នាំ២០២៣ ខាងមុខ ដោយមានការអញ្ជើញចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង និងមន្ត្រីពាក់ព័ន្ធ ដែលជាសមាជិក សមាជិកាអនុគណៈកម្មការចំណុះ។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យលើដំណើរការរៀបចំការងារដែលបានផ្ដល់ជូនដល់សមាជិក សមាជិកាគណៈកម្មការ និងអនុគណៈកម្មការសម្រាប់ត្រៀមរៀបចំសន្និបាតបូកសរុបលទ្ធផលការងារ ប្រចាំឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួង ដើម្បីញ៉ាំងឱ្យកម្មវិធីនាឱកាសនោះអាចប្រព្រឹត្តទៅបានដោយរលូន ជោគជ័យ និងប្រកបដោយប្រសិទ្ធភាពខ្ពស់។ ឯកឧត្តម សឿន ប៊ុនលី អគ្គនាយកផែនការ និងគោលនយោបាយបានរាយការណ៍ជូនអង្គប្រជុំអំពីវឌ្ឍនភាពនៃការបូកសរុប និងត្រួតពិនិត្យរបាយការណ៍ ដែលមកដល់ពេលនេះសម្រេចបានចំនួន៩៨% ក្នុងនោះគ្រោងនឹងដាក់ជូនថ្នាក់ដឹកនាំ រួមទាំងអង្គភាពជំនាញពិនិត្យនិងផ្តល់ធាតុចូលបន្ថែមនាដើមសប្តាហ៍ក្រោយ មុននឹង ដំណើរការបោះពុម្ពសៀវភៅសន្និបាតផ្លូវការនៅពាក់កណ្តាល ខែមករា ឆ្នាំ២០២៣ ខាងមុខនេះ។ អង្គប្រជុំបានពិនិត្យពិភាក្សា និងផ្លាស់ប្តូរយោបល់លើចំណុចសំខាន់ៗមួយចំនួនរួមមាន៖ រយៈពេលនៃការរៀបចំពិធីសន្និបាត ការសម្របសម្រួលលើចំនួន និងរយៈពេលនៃបទអន្តរាគមន៍នីមួយៗ ការពិនិត្យលើពង្រាងប្រធានបទសន្និបាត ការរៀបចំសុន្ទរកថាជូនថ្នាក់ដឹកនាំ ព្រមទាំងការរៀបចំលិខិតអញ្ជើញថ្នាក់ដឹកនាំ និងការត្រៀមនូវបច្ចេកទេសផ្សេងៗសម្រាប់កម្មវិធីសន្និបាតនាឱកាសនោះ។ ឆ្លៀតក្នុងឱកាសនោះ ឯកឧត្តមរដ្ឋលេខាធិការ បានលើកទឹកចិត្ត និងបានផ្តាំផ្ញើឱ្យគណៈកម្មការ និងអនុគណៈកម្មការទាំងអស់ សម្រេចបញ្ចប់ភារកិច្ចការងារដែលបានដាក់ជូនឱ្យបានល្អប្រសើរ និងឆាប់រហ័សតាមផែនការដែលបានកំណត់ ដើម្បីគោរពជូនឯកឧត្តមទេសរដ្ឋមន្ត្រីពិនិត្យសម្រេចលើការរៀបចំសន្និបាតនេះ៕