កិច្ចប្រជុំត្រៀមរៀបចំសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងសាធារណការ និងដឹកជញ្ជូន ដែលគ្រោងនឹងប្រព្រឹត្តទៅនៅដើមខែកុម្ភៈ ឆ្នាំ២០២៣ ខាងមុខ ទីស្តីការក្រសួង៖ នាព្រឹកថ្ងៃព្រហស្បតិ៍ ៧កើត ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៩ ខែធ្នូ ឆ្នាំ២០២២ ឯកឧត្តម តូច ចាន់កុសល រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ ដើម្បីត្រៀមរៀបចំសន្និបាតបូកសរុបលទ្ធផលការងារប្រចាំឆ្នាំ២០២២ និង លើកទិសដៅការងារឆ្នាំ២០២៣ ដែលគ្រោងនឹងប្រព្រឹត្តទៅនាដើមខែកុម្ភៈ ឆ្នាំ២០២៣ខាងមុខ ដោយ មានការអញ្ជើញចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង និងមន្ត្រីពាក់ព័ន្ធ ដែលជាសមាជិក សមាជិកាអនុគណៈកម្មការចំណុះ។ កិច្ចប្រជុំនេះត្រូវបានរៀបចំឡើងក្នុងគោលបំណងដើម្បីបែងចែកតួនាទី និងភារកិច្ចជូនដល់សមាជិក សមាជិកាគណៈកម្មាការ និងអនុគណៈកម្មការសម្រាប់ត្រៀមរៀបចំសន្និបាតបូកសរុបលទ្ធផលការងារ ប្រចាំឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួង ដើម្បីឱ្យការដឹកនាំ គ្រប់គ្រង ចាត់ចែង និងសម្របសម្រួលកម្មវិធីអាចប្រព្រឹត្តទៅបានដោយរលូន ទាន់ពេលវេលា និងប្រកបដោយប្រសិទ្ធភាពការងារខ្ពស់ទៅតាមបំណែងចែកការងារ ដែលមានចែងក្នុងលិខិតបង្គាប់ការ។ អង្គប្រជុំបានពិភាក្សា ផ្លាស់ប្តូរយោបល់យ៉ាងផុសផុល ទៅលើចំណុចសំខាន់ៗនានាដែលរួមមាន៖ ការរៀបចំសុន្ទរកថាជូនថ្នាក់ដឹកនាំ ការជ្រើសរើស និងរៀបចំប្រធានបទសន្និបាត ប្រធានបទនៃបទអន្តរាគមន៍ ការរៀបចំលិខិតអញ្ជើញថ្នាក់ដឹកនាំ ភ្ញៀវកិត្តិយស ព្រមទាំងការរៀបចំចងក្រងទិន្នន័យព័ត៌មានរូបភាព និងវីដេអូ ឯកសារជាដើម ដើម្បីគោរពជូនឯកឧត្តមទេសរដ្ឋមន្ត្រីពិនិត្យសម្រេច។ ឯកឧត្តមរដ្ឋលេខាធិការប្រចាំការ ប្រធានអង្គប្រជុំ បានជំរុញលើកទឹកចិត្តឱ្យអង្គប្រជុំផ្តល់មតិយោបល់ ក៏ដូចជាធាតុចូលឱ្យបានច្រើនដើម្បីធ្វើឱ្យប្រសើរឡើងដល់របៀបវារៈនៃការរៀបចំកម្មវិធី ដើម្បីទាក់ទាញចំណាប់អារម្មណ៍អ្នកចូលរួម និងបានផ្តាំផ្ញើឱ្យគណៈកម្មការ និងអនុគណៈកម្មការនីមួយៗ អនុវត្តតួនាទី និងភារកិច្ចរបស់ខ្លួនដែលបានកំណត់ឱ្យអស់ពីសមត្ថភាព និងលទ្ធភាព ដើម្បីឱ្យការរៀបចំសន្និបាតនេះ អាចសម្រេចបានដោយជោគជ័យ៕