បាឋកថាស្តីពី “រចនាសម្ព័ន្ធចាត់តាំង តួនាទី ភារកិច្ច” របស់ក្រសួងសាធារណការ និងដឹកជញ្ជូន និងកិច្ចសំណេះសំណាលជាមួយសិក្ខាកាមចំនួន ៦១៩នាក់ នៃសាលានាយទាហានសកម្ម ដើម្បីចែករំលែកអំពីចក្ខុវិស័យដ៏ស៊ីជម្រៅរបស់ក្រសួង សំដៅរួមចំណែកក្នុងការជួយជំរុញ និងពង្រឹងដំណើរការបណ្ដុះបណ្ដាលធនធានមនុស្ស ក៏ដូចជារឹតបន្តឹងចំណងទំនាក់ទំនងរវាងស្ថាប័នទាំងពីរឱ្យកាន់តែជិតស្និទ្ធ កំពង់ស្ពឺ៖ នាព្រឹកថ្ងៃព្រហស្បតិ៍ ៧រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៥ ខែធ្នូ ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញផ្តល់កិត្តិយសដ៏ខ្ពង់ខ្ពស់ ក្នុងការធ្វើបាឋកថាស្តីពី “រចនាសម្ព័ន្ធចាត់តាំង តួនាទី ភារកិច្ច” របស់ក្រសួងសាធារណការ និងដឹកជញ្ជូន និងកិច្ចសំណេះសំណាលជាមួយថ្នាក់ដឹកនាំ យោធាចារ្យ នាយទាហាន នាយទាហានរង និងនិស្សិតនាយទាហានសកម្ម នៃសាលានាយទាហានសកម្ម ដោយមានការចូលរួមផងដែរពីសំណាក់ ឯកឧត្តម អស់លោក លោកស្រី ជាថ្នាក់ដឹកនាំក្រសួងការពារជាតិ ក្រសួងសាធារណការ និងដឹកជញ្ជូន តំណាងអគ្គបញ្ជាការដ្ឋាន នៃកងយោធពលខេមរភូមិន្ទ និងប្រតិភូអមដំណើរជាច្រើនរូប។ ជាកិច្ចចាប់ផ្តើម ឯកឧត្តម ឧត្តមសេនីយ៍ឯក ប៊ុត សុភាព នាយកសាលានាយទាហានសកម្ម បានធ្វើរបាយការណ៍ស្វាគមន៍ ព្រមទាំងជម្រាបអំពីសាវតា ដំណើរប្រព្រឹត្តទៅដោយសង្ខេប បច្ចុប្បន្នភាពនៃការបណ្តុះបណ្តាលរបស់សាលា ជូនដល់អង្គពិធីទាំងមូល និងសំណើសុំការពិនិត្យលទ្ធភាពក្នុងការឧបត្ថម្ភទៅលើតម្រូវការចាំបាច់មួយចំនួនរបស់សាលាផងដែរ។ ឯកឧត្តមនាយក បានបញ្ជាក់ថា៖ ចាប់ពីឆ្នាំ១៩៩៥ ដល់ឆ្នាំ២០២២ សាលាបានបណ្តុះបណ្តាលនាយទាហានសកម្មបានចំនួន ២២វគ្គ ដែលមាននាយទាហានសរុបចំនួន ២២៥៩នាក់ ក្នុងនោះមាននារីចំនួន ១៦៣នាក់។ បច្ចុប្បន្នសាលាបាន និងកំពុងបណ្តុះបណ្តាលនាយទាហានសកម្មចំនួន ០២វគ្គ រួមមាន៖ វគ្គនាយទាហានសកម្មជំនាន់ទី២៣ មានចំនួន១៩២នាក់ (នារី៣២នាក់) និង វគ្គនាយទាហានសកម្មជំនាន់ទី២៤ មានចំនួន១៩៨នាក់ (នារី៣០នាក់)។ ក្រៅពីវគ្គបណ្តុះបណ្តាលនាយទាហានសកម្ម សាលាក៏មានវគ្គបំប៉នគរុកោសល្យយោធារចារ្យ ជំនាន់ទី៥ ដោយមានគរុសិស្សនាយទាហានចំនួន ៥០នាក់ (នារី០៣នាក់) ដែលនឹងត្រូវបញ្ចប់វគ្គនៅបំណាច់ខែធ្នូ ឆ្នាំ២០២២ ខាងមុខនេះ។ បន្ទាប់ពីរបាយការណ៍ស្វាគមន៍ និងបច្ចុប្បន្នភាពរបស់សាលា ថ្លែងដោយឯកឧត្តមនាយករួចមក ឯកឧត្តមទេសរដ្ឋមន្ត្រី បានផ្តល់កិត្តិយសដ៏ខ្ពង់ខ្ពស់ អញ្ជើញឡើងធ្វើបទបង្ហាញ ដោយលើកឡើងពីសមិទ្ធផលការងារជាច្រើនកើតចេញពីការខិតខំប្រឹងប្រែងរបស់រាជរដ្ឋាភិបាល ថ្នាក់ដឹកនាំក្រសួង និងមន្ត្រីគ្រប់ជាន់ថ្នាក់ ដែលសម្រេចបានដោយឆន្ទៈមនសិការការងារខ្ពស់ រួមមាន៖ វិស័យហេដ្ឋារចនាសម្ព័ន្ធផ្លូវ ស្ពាន កំពង់ផែ វិស័យដឹកជញ្ជូនផ្លូវគោក ផ្លូវទឹក ផ្លូវដែក វិស័យភស្តុភារកម្ម ប្រព័ន្ធស្វ័យប្រវត្តិកម្ម ព្រមទាំងទំនើបកម្មប្រព័ន្ធបច្ចេកវិទ្យា និងជាពិសេសការផ្តល់សេវាសាធារណៈ ដែលកាន់តែនាំមកនូវភាពងាយស្រួលជូនដល់បងប្អូនប្រជាពលរដ្ឋ។ ថ្លែងក្នុងបាឋកថានាឱកាសនេះ ឯកឧត្តមទេសរដ្ឋមន្ត្រី បានលើកឡើងអំពីគម្រោងជាច្រើនដែលក្រសួងកំពុងអនុវត្ត គម្រោងដែលគ្រោងនឹងបើកការដ្ឋានសាងសង់ គម្រោងដែលកំពុងសិក្សាសមិទ្ធិលទ្ធភាព និងគម្រោងដែលគ្រោងនឹងចុះកិច្ចព្រមព្រៀងជាមួយដៃគូអភិវឌ្ឍន៍នាពេលឆាប់ខាងមុខនេះ ជូនដល់អង្គពិធីទាំងមូលឱ្យបានជ្រាប។ ដែលនេះសបញ្ជាក់ឱ្យឃើញអំពីការយកចិត្តទុកដាក់ក្នុងការអភិវឌ្ឍវិស័យហេដ្ឋារចនាសម្ព័ន្ធ និងដឹកជញ្ជូនឥតឈប់ឈរក្នុងពេលដែលកម្ពុជាកំពុងស្ថិតនៅក្រោមម្លប់សន្តិភាពយ៉ាងពេញលេញ។ ដើម្បីចូលរួមក្នុងការអភិវឌ្ឍធនធានមនុស្សលើវិស័យសាធារណការ និងដឹកជញ្ជូន ឯកឧត្តមទេសរដ្ឋមន្ត្រី បានផ្តួចផ្តើមគំនិតក្នុងការបង្កើតនូវស្ថាប័នសិក្សាអប់រំមួយ ដែលមានឈ្មោះថា “វិទ្យាស្ថានតេជោសែន សាធារណការ និងដឹកជញ្ជូន” ហើយឆ្លៀតក្នុងឱកាសនោះដែរ ឯកឧត្តមទេសរដ្ឋមន្ត្រី ក៏បានផ្តល់អនុសាសន៍ណែនាំឱ្យគណៈគ្រប់គ្រងសាលា និងគណៈគ្រប់គ្រងវិទ្យាស្ថាន សហការគ្នាក្នុងការចុះអនុស្សរណៈលើការយោគយល់ ដើម្បីជំរុញលើកទឹកចិត្តបញ្ជូននិស្សិតនាយទាហាន ឬ ផ្លាស់ប្តូរសាស្រ្តាចារ្យ ដើម្បីចែករំលែកចំណេះដឹងបន្ថែមរវាងគ្នា និងគ្នា។ ឯកឧត្តមទេសរដ្ឋមន្ត្រី បានចែករំលែកនូវបទពិសោធន៍ល្អៗជាច្រើន ដែលនាំឱ្យឯកឧត្តមទទួលបានជោគជ័យក្នុងភាពជាអ្នកដឹកនាំកន្លងមក ជូនដល់សិក្ខាកាមគ្រប់រូប ហើយនៅចុងបញ្ចប់នៃការធ្វើបាឋកថា ឯកឧត្តមទេសរដ្ឋមន្ត្រី ក៏បានបកស្រាយនូវចម្ងល់ និងសំណួរពាក់ព័ន្ធនឹងវិស័យសាធារណការ និងដឹកជញ្ជូន ដែលសិក្ខាកាមបានធ្វើការចោទសួរផងដែរ។ ឆ្លើយតបទៅនឹងសំណើរបស់ ឯកឧត្តម ឧត្តមសេនីយ៍ឯក នាយកសាលានាយទាហានសកម្ម ដែលគោរពស្នើសុំការស្ថាបនាផ្លូវជុំវិញសាលា ដែលជាផ្លូវយុទ្ធសាស្ត្រមួយរបស់សាលាក្នុងការចល័តល្បាតការពារទីតាំង និងជាទីលានហ្វឹកហាត់កាយសិក្សារបស់និស្សិតនាយទាហានសកម្ម មានប្រវែងសរុបចំនួន ០៤គីឡូម៉ែត្រនោះ ឯកឧត្តមទេសរដ្ឋមន្ត្រី បានផ្តល់អនុសាសន៍ជូនទៅមន្ទីរសាធារណការ និងដឹកជញ្ជូនខេត្តកំពង់ស្ពឺ ក្នុងការចុះសិក្សាជាបន្ទាន់ និងលើកបញ្ជីប៉ាន់តម្លៃដាក់ជូនក្រសួង ដើម្បីធ្វើការពិនិត្យលទ្ធភាព។ លើសពីនេះទៅទៀត ដើម្បីជាការលើកទឹកចិត្តទៅដល់យោធាចារ្យ នាយទាហាន នាយទាហានរង ដែលកំពុងបម្រើការ និងនិស្សិតនាយទាហានសកម្ម ដែលកំពុងខិតខំប្រឹងប្រែងហ្វឹកហ្វឺនរៀនសូត្រនៅសាលានាយទាហានសកម្ម មានចំនួនសរុប ៦១៩នាក់នោះ ឯកឧត្តមទេសរដ្ឋមន្ត្រីបានផ្តល់នូវថវិកាលើកទឹកចិត្ត ក្នុងម្នាក់ៗទទួលបានចំនួន ១០ម៉ឺនរៀល និងឧបត្ថម្ភជូនដល់សាលាសម្រាប់ប្រើប្រាស់លើតម្រូវការចាំបាច់នូវទឹកប្រាក់ចំនួន ៤០លានរៀលផងដែរ៕