កិច្ចប្រជុំត្រួតពិនិត្យលើសេចក្ដីព្រាងគោលនយោបាយគ្រប់គ្រងប្រព័ន្ធចម្រោះទឹកកខ្វក់ សំដៅលើកកម្ពស់អនាម័យ និងសុខុមាលភាពប្រជាពលរដ្ឋ និងរៀបចំក្រុមការងារទទួលខុសត្រូវក្នុងការរៀបចំសិក្ខាសាលារួមគ្នាផ្លាស់ប្តូរចំណេះដឹង បទពិសោធន៍លើប្រព័ន្ធទឹកកខ្វក់ជាមួយស្ថានទូតអូស្ត្រាលី ទីស្ដីការក្រសួង៖ ថ្ងៃសុក្រ ១០រោច ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៨ ខែវិច្ឆិកា ឆ្នាំ២០២២ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យលើសេចក្ដីព្រាងគោលនយោបាយគ្រប់គ្រងទឹកកខ្វក់ និងរៀបចំក្រុមការងារទទួលខុសត្រូវក្នុងការរៀបចំសិក្ខាសាលារួមគ្នាផ្លាស់ប្តូរចំណេះដឹង បទពិសោធន៍លើប្រព័ន្ធទឹកកខ្វក់ជាមួយស្ថានទូតអូស្ត្រាលី ដោយមានការចូលរួមពីថ្នាក់ដឹកនាំក្រសួងទទួលបន្ទុក និងមន្ត្រីជំនាញពាក់ព័ន្ធជាច្រើនរូប។ អង្គប្រជុំបានពិភាក្សាពីគម្រោងរៀបចំសិក្ខាសាលាស្តីពីការផ្លាស់ប្តូរចំណេះដឹង បទពិសោធន៍ និងការអនុវត្តល្អៗទាក់ទងនឹងការគ្រប់គ្រងទឹកកខ្វក់ ក្រោមកិច្ចសហការរៀបចំជាមួយស្ថានទូតអូស្ត្រាលី ដែលគ្រោងនឹងប្រព្រឹត្តទៅនៅថ្ងៃទី០៦ ដល់ថ្ងៃទី០៧ ខែធ្នូ ឆ្នាំ២០២២ និងបានបន្តពិនិត្យលើសេចក្តីព្រាងស្តីពីយថាប្រភេទទូទៅនៃប្រព័ន្ធលូ (General Specification of Sewerage System) និងគោលការណ៍ ណែនាំជាតិស្តីពីផែនការគ្រប់គ្រងប្រព័ន្ធប្រព្រឹត្តកម្មសំណល់ភក់តាមបែបធម្មជាតិ (FSTP) ក្រោមកិច្ចសហការយ៉ាងជិតស្និទ្ធពីធនាគារអភិវឌ្ឍន៍អាស៊ី(ADB)។ ជាលទ្ធផល អង្គប្រជុំបានឯកភាពលើគោលនយោបាយគ្រប់គ្រងប្រព័ន្ធទឹកកខ្វក់ជាមូលដ្ឋាន និងសហការរៀបចំសិក្ខាសាលារួមគ្នាជាមួយស្ថានទូតអូស្ត្រាលី ដោយឡែកគោលនយោបាយលម្អិតជាយុទ្ធសាស្ត្រ និងផែនការសកម្មភាពលើការគ្រប់គ្រងប្រព័ន្ធទឹកកខ្វក់នឹងត្រូវពិភាក្សាលម្អិតបន្ថែមនៅក្នុងកិច្ចប្រជុំលើកក្រោយបន្តទៀត៕