[Phnom Penh Post] - ក្រសួងរកឃើញរថយន្តធុនធ្ងន់ ៣៣ គ្រឿងដឹកជញ្ជូនលើសទម្ងន់ក្នុងកម្រិតអនុគ្រោះ ខណៈម្ចាស់រថយន្តត្រូវបានអប់រំណែនាំ
2022-09-16
Go to the website published Phnom Penh Post
ភ្នំពេញៈ ក្រសួងសាធារណការ និងដឹកជញ្ជូនរកឃើញរថយន្តធុនធ្ងន់ចំនួន ៣៣ គ្រឿងដឹកជញ្ជូនលើសទម្ងន់ តែស្ថិតក្នុងកម្រិតអនុគ្រោះនៅក្រុងតាខ្មៅ ខេត្តកណ្តាល បន្ទាប់ពីក្រុមការងារចល័តចម្រុះរបស់ក្រសួងបានបើកប្រតិបត្តិការឆ្មក់ត្រួតពិនិត្យរយៈពេល ២ ថ្ងៃ ខណៈម្ចាស់រថយន្តត្រូវបានអប់រំណែនាំឱ្យបញ្ឈប់ការដឹកជញ្ជូនលើសទម្ងន់។
កាលពីថ្ងៃទី ១៣-១៤ ខែកញ្ញា លោក គឹម សាន់ អនុរដ្ឋលេខាធិការក្រសួងសាធារណការបានដឹកនាំក្រុមការងារចល័តចម្រុះ សម្រាប់ឆ្មក់ត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់របស់ក្រសួងចុះរឹតបន្តឹងច្បាប់ស្ដីពីការអនុវត្តច្បាប់ដឹកជញ្ជូនលើទម្ងន់កម្រិតកំណត់ នៅក្រុងតាខ្មៅ ដោយសហការជាមួយមន្ត្រីរដ្ឋបាលខេត្ត។
ក្រសួងសាធារណការបញ្ជាក់ក្នុងហ្វេសប៊ុកនាថ្ងៃទី ១៦ ខែកញ្ញា ថា៖ «ប្រតិបត្តិការនេះបានត្រួតពិនិត្យរកឃើញរថយន្តធុនធ្ងន់ចំនួន ៣៣ គ្រឿងលើសទម្ងន់ក្នុងកម្រិតអនុគ្រោះ តាមរយៈការដាក់ជញ្ជីងថ្លឹង»។
ជញ្ជីងថ្លឹងត្រូវបានដាក់នៅចំណុចគល់ស្ពានព្រែកសំរោង ផ្លូវលេខ ២១ បេ ភូមិព្រែកសំរោង សង្កាត់កំពង់សំណាញ់ ក្រុងតាខ្មៅតាំងពីថ្ងៃរសៀលរហូតដល់ពាក់កណ្ដាលយប់។
លោក គឹម សាន់ បានពន្យល់ណែនាំដល់ម្ចាស់រថយន្តឱ្យយល់ពីច្បាប់នៃការដឹកជញ្ជូនលើសទម្ងន់កម្រិតកំណត់ គឺច្បាប់ផ្លូវថ្នល់ និងបានណែនាំកុំឱ្យដឹកជញ្ជូនលើសទម្ងន់បន្តទៀត ព្រោះការដឹកលើសទម្ងន់បានបង្កមហន្តរាយដល់ផ្លូវជាតិ និងគ្រោះថ្នាក់ចរាចរណ៍ធ្ងន់ធ្ងរ។
គិតត្រឹមថ្ងៃទី ១៤ ខែកញ្ញា ឆ្នាំ ២០២២ គណៈកម្មាធិការសម្របសម្រួលអចិន្ត្រៃយ៍នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់បានឃាត់ទុកយានយន្តសរុបទូទាំងប្រទេសចំនួន ២៦៣ គ្រឿង៕
