[Business Cambodia] - ប្រយ័ត្នប្រឡងយកបណ្ណបើកបរឡើងវិញ ! កំហុសទាំង ៨ ករណីនេះ ខុសតែ ២ដង អស់ពិន្ទុខ្ទេច
យោងតាមលិខិតប្រកាសអន្តរក្រសួង ដែលត្រូវបានចេញសេចក្តីប្រកាសពីក្រសួងសាធារណការ និងាដឹកជញ្ជូន កាលពីពេលថ្មីៗនេះ បានឲ្យដឹងថា ក្រសួងចាប់ផ្តើមអនុវត្តន៍វិធានសាកល្បង ការកាត់បន្ថយឬដកពិន្ទុទៅលើបណ្ណបើកបរយានយន្តណាដែលបង្កបទល្មើសចរាចរណ៍ផ្លូវគោកចាប់ពីថ្ងៃទី០១ ខែកក្កដា ឆ្នាំ២០២២ នេះតទៅ។
ក្នុងសេចក្តីប្រកាសអន្តរក្រសួងនោះផងដែរ ក្រសួងបានបានបញ្ជាក់ថាបទល្មើសឬ ករណីដែលត្រូវដកពិន្ទុតែ ២ដង ឬ កាត់បន្ថយ ៦ ពិន្ទុ ចំពោះករណីទាំង ៨ ដូចខាងក្រោម ៖
បើកបរលើសល្បឿនកំណត់ចាប់ពី ៥០គីឡូម៉ែត្រ/១ម៉ោង (50Km/h) ឡើងទៅ
បើកបរក្នុងពេលអត្រាជាតិស្រវឹងចាប់ពី ០,៤០មីលីក្រាម/១លីត្រខ្យល់ ឬ ចាប់ពី ០,៨០ក្រាម/១លីត្រឈាមឡើងតៅ ឬមានឥទ្ធិពលគ្រឿងញៀន
រត់គេចខ្លួននៅពេលមានគ្រោះថ្នាក់ចរាចរណ៍
ប្រើប្រាស់ផ្លាកលេខ និងបណ្ណសម្គាលយានយន្តក្លែងក្លាយ
បើកបរល្មើសច្បាប់ស្តីពីចរាចរណ៍ផ្លូវគោក ហើយបង្កឲ្យមានរបួសដល់អ្នកដទៃដោយអចេតនា ហើយបណ្តាលឲ្យអ្នករងគ្រោះ អសមត្ថភាពធ្វើការងារក្នុងរយ:ពេលស្មើ ឬលើសពី ៨ថ្ងៃគិតពីថ្ងៃកើតហេតុ ឬជនរងគ្រោះស្លាប់
កំហុសមិនរាងចាល នៃការប្រើប្រាស់បណ្ណបើកបរហួសសុពលភាព ឬមិនត្រឹមត្រូវតាមប្រភេទយានយន្ត
បដិសេធមិនឲ្យធ្វើការតេស្តជាតិអាល់កុល ឬសារធាតុញៀន
យានយន្តដែលបានផ្ទុកមនុស្ស ឬដឹកមនុស្សនៅពីលើទំនិញផ្សេងៗ
ក្រសួងក៏បានបញ្ជាក់យ៉ាងតឹងរឹងថា រាល់ករណីប្រព្រឹត្តបទល្មើស ក្នុង១ដង ការកាត់ពិន្ទុមិនត្រូវអនុញ្ញាតឲ្យលើសពី ៨ពិន្ទុឡើយ ។ ក្រសួងក៏បានបន្ថែមទៀតថា រាល់បណ្ណបើកបរយានយន្តទាំងអស់គឺមានពិន្ទុតែ ១២ពិន្ទុនោះទេ ។
អាស្រ័យហេតុនេះ បងប្អូនដែលមានបណ្ណបើកបរយានយន្តទាំងអស់ គប្បីចូលរួមគោរពច្បាប់ចរាចរណ៍ផ្លូវគោកទាំងអស់គ្នា ដើម្បីសុខសុវត្ថិភាពនៅលើផ្លូវថ្នាល់ និងជៀសវាងការផាកពិន័យ ព្រមទាំងដកពិន្ទុលើបណ្ណបើកបរយានយន្តផងដែរ ៕
