នាពេលខាងមុខនេះ ក្រសួងសាធារណការ និងដឹកជញ្ចូន នឹងធ្វើការសហការជាមួយក្រសួងមហាផ្ទៃ ដើម្បីបង្កើតកម្មវិធីកាត់ពិន្ទុបណ្ណបើកបរលើអ្នកបើកបរយានយន្ដណាដែលល្មើស ឬបំពានច្បាប់ចរាចរណ៍។ ការបង្កើតកម្មវិធីនេះ គឺក្នុងគោលបំណងដើម្បីចូលរួមចំណែកក្នុងការកាត់បន្ថយគ្រោះថ្នាក់ចរាចរណ៍ ដែលតែងតែកើតមានជារៀងរាល់ថ្ងៃនៅក្នុងប្រទេសកម្ពុជា។ទាក់ទងនឹងការកាត់ពិន្ទុបណ្ណបើកបរខាងលើ តើលោកអ្នកដឹងទេថា នៅពេលកម្មវិធីកាត់ពិន្ទុនេះដាក់ដំណើរការ អ្នកបើកបរដែលល្មើសច្បាប់ នឹងត្រូវទទួលរងនូវការផាកពិន័យបែបណា? យោងតាមច្បាប់ស្តីពីចរាចរណ៍ផ្លូវគោកបានកំណត់ឱ្យគ្រប់បណ្ណបើកបរត្រូវមាន ពិន្ទុសរុប១២ពិន្ទុ ហើយចំនួនពិន្ទុនេះ ត្រូវកាត់បន្ថយទៅតាមស្ថាននៃការប្រព្រឹត្តបទល្មើសចរាចរណ៍ ចាប់ពី១ពិន្ទុដល់៦ពិន្ទុ ហើយក្នុងករណីអស់ពិន្ទុ គឺបណ្ណបើកបរត្រូវទុកជាមោឃៈ បើអ្នកបើកបរចង់ បានបណ្ណ បើកបរថ្មី ត្រូវរៀននិងប្រឡងយកបណ្ណបើកបរឡើងវិញក្នុងរយៈពេលយ៉ាងតិច៦ខែ គិតចាប់ ពីថ្ងៃដែល បណ្ណបើកបរត្រូវទុកជាមោឃៈ។ យ៉ាងណាតាមការលើកឡើងពីលោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន កាលពីពេលថ្មីៗនេះបានឲ្យដឹងថា ក្រសួងសាធារណការ អាចនឹងចាប់ផ្តើមកម្មវិធីកាត់ពិន្ទុលើប័ណ្ណបើកបររបស់អ្នកល្មើសច្បាប់ ចាប់ពីខែកញ្ញា ខាងមុខនេះតទៅផងដែរ។ ដោយក្នុងនោះតម្រូវឲ្យអ្នកបើកបរត្រូវភ្ជាប់ឯកសារចំនួន ៣ តាមខ្លួនរួមមាន បណ្ណបើកបរ, បណ្ណសម្គាល់យានយន្ដ និងឆៀក៕