[Rasmei Kampuchea Daily News] - មន្ត្រីជំនាញតំណាងក្រសួងសាធារណការ និងដឹកជញ្ជូន បានផ្តល់ការបណ្តុះបណ្តាល ស្តីពីការប្រើប្រាស់បច្ចេកវិទ្យា QR code ដល់មន្ត្រីពាក់ព័ន្ធនៃអង្គភាពប្រយុទ្ធប្រឆាំងអំពើពុករលួយ
ដោយ: សុផល / ភ្នំពេញ: លោកហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូន បានដឹកនាំមន្ត្រីជំនាញបច្ចេកទេសផ្តល់ការបណ្តុះបណ្តាលលើការប្រើប្រាស់បច្ចេកវិទ្យា QR Code ដល់មន្ត្រីពាក់ព័ន្ធនៃអង្គភាពប្រយុទ្ធប្រឆាំងអំពើពុករលួយ។
ការបណ្តុះបណ្តាលនេះបានធ្វើឡើងក្រោមអធិបតីភាព លោក អ៊ូ វិសាល អគ្គនាយក នៃអគ្គនាយកដ្ឋានរដ្ឋបាល និងសន្តិសុខ នៃអង្គភាពប្រយុទ្ធប្រឆាំងអំពើពុករលួយ ដែលមានអ្នកចូលរួមប្រមាណ ៩០រូប។
វគ្គបណ្តុះបណ្តាលនាថ្ងៃទី៣០ ខែមីនា ឆ្នាំ២០២២ នៅអង្គភាពប្រយុទ្ធប្រឆាំងអំពើពុករលួយនេះធ្វើឡើងតាមការស្នើសុំរបស់អង្គភាពប្រយុទ្ធប្រឆាំងអំពើពុករលួយ មកក្រសួងសាធារណការ និងដឹកជញ្ជូន ដើម្បីពង្រឹងសមត្ថភាពមន្ត្រីក្រោមឱវាទលើការយល់ដឹង និងគន្លឹះសំខាន់ៗលើការប្រើប្រាស់បច្ចេកវិទ្យា QR Code ការការពារសុវត្ថិភាពទិន្នន័យ ជាពិសេសបទពិសោធន៍នៃការប្រើប្រាស់ QR Code ក្នុងវិស័យសាធារណការ និងដឹកជញ្ជូន។
សិក្ខាកាមដែលចូលរួមអាចសិក្សាស្វែងយល់និងពិនិត្យប្រើប្រាស់បច្ចេកវិទ្យា QR Code ក្នុងអង្គភាពប្រយុទ្ធប្រឆាំងអំពើពុករលួយដើម្បីពង្រឹងយន្តការគ្រប់គ្រងបច្ចេកវិទ្យាក្នុងអង្គភាព៕
