[Bayon Radio] - ផ្លូវលេខ ១៤៦បេ ដែលតភ្ជាប់ពីផ្លូវជាតិលេខ៤ ត្រង់រង្វង់មូលសម្ដេចសង្ឃ ទេព វង្ស ក្នុងស្រុកព្រៃនប់ ឆ្ពោះទៅកាន់ស្រុកស្ទឹងហាវ និងទៅភ្ជាប់ដល់កំពង់ផែក្រុងព្រះសីហនុនឹងស្ថាបនារួចរាល់ជាស្ថាពរក្នុងកំឡុងខែមេសាខាងមុខនេះ
2022-03-28
Go to the website published Bayon Radio
ផ្លូវលេខ ១៤៦បេ ដែលតភ្ជាប់ពីផ្លូវជាតិលេខ៤ ត្រង់រង្វង់មូលសម្ដេចសង្ឃ ទេព វង្ស ក្នុងស្រុកព្រៃនប់ ឆ្ពោះទៅកាន់ស្រុកស្ទឹងហាវ និងទៅភ្ជាប់ដល់កំពង់ផែក្រុងព្រះសីហនុនឹងស្ថាបនារួចរាល់ជាស្ថាពរក្នុងកំឡុងខែមេសាខាងមុខនេះ។ ខណៈអញ្ជើញដឹកនាំមន្ដ្រីជំនាញត្រួតពិនិត្យគុណភាពផ្លូវមួយខ្សែនេះនារសៀលថ្ងៃទី២៨ ខែមីនា ឆ្នាំ២០២២ ឯកឧត្តម ទេសរដ្ឋមន្ត្រី ស៊ុន ចាន់ថុល បានឲ្យដឹងថា ការស្ថាបនាផ្លូវ១៤៦បេ គឺមានគុណល្អត្រឹមត្រូវតាមបច្ចេកទេស ដែលនឹងប្រើប្រាស់យូរអង្វែង ពិសេសគឺការធ្វើចរាចរណ៍រថយន្តដឹកទំនិញធំៗចេញចូលកំពង់ផែ ដើម្បីកាត់បន្ថយគ្រោះថ្នាក់ ឬកកស្ទះចរាចរណ៍ក្នុងក្រុងព្រះសីហនុ។
ផ្លូវលេខ១៤៦បេ សាងសង់ឡើងក្រោមកញ្ចប់ថវិកាសន្សំរបស់ជាតិ ផ្លូវនេះមានប្រវែងសរុប ៤៣,០២ គីឡូម៉ែត្រ ក្នុងនោះប្រវែង ២១ គីឡូម៉ែត្រ ជាប្រភេទផ្លូវបេតុងកៅស៊ូ (AC) កម្រាស់ ៩ សង់ទីម៉ែត្រ, ចំណែកប្រវែង ២២គីឡូម៉ែត្រទៀត ជាប្រភេទផ្លូវបេតុង កម្រាស់ ២៦ សង់ទីម៉ែត្រ និងទទឹងផ្លូវសរុបជារួម ១២ ម៉ែត្រ៕
