ភ្នំពេញ៖ ក្រសួងសាធារណការនិងដឹកជញ្ជូនបានប្រកាសពីការលក់ផ្លាកលេខពិសេសរបស់ខ្លួនក្នុងរយៈពេលជាង៦ឆ្នាំ បានចំណូលជាង៧០លានដុល្លារអាមេរិក។ ក្នុងកិច្ចប្រជុំពិភាក្សាលើរបាយការណ៍វឌ្ឍនភាពនៃការលក់លេខចុះបញ្ជីរថយន្ត នៅថ្ងៃទី២៣ ខែមីនា ឆ្នាំ២០២២ ក្រសួងសាធារណការ បានបង្ហាញរបាយការណ៍គិតចាប់តាំងពីខែ កញ្ញា ឆ្នាំ២០១៦ ដល់ខែកុម្ភៈ ឆ្នាំ២០២២ លេខចុះបញ្ជីរថយន្ត (លេខចុះបញ្ជីពិសេស និងលេខចុះបញ្ជីពិសេសផ្ទាល់ខ្លួន) ក្រសួងលក់បានចំនួន ២០១ ៩៨០លេខ ទទួលបានចំណូលសរុបចំនួន ២៨០ ៧២៨ ២២៨ ៨០០រៀល ស្មើនឹង ៧០ ១៨២ ០៥៧ដុល្លារអាមេរិក។ ថ្លែងក្នុងកិច្ចប្រជុំ រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មការរអន្តរក្រសួងគ្រប់គ្រងការលក់លេខចុះបញ្ជីរថយន្តលោកស្រី កុយ សុដានី បានឲ្យដឹងថា ផ្លាកលេខប្រភេទនេះកាន់តែមានប្រជាប្រិយភាព ពេញនិយមខ្លាំងឡើងៗ។ ក្រសួងនឹងផ្សព្វផ្សាយបន្ថែមទៀតទៅកាន់ក្រុមហ៊ុន សហគ្រាស និងប្រជាពលរដ្ឋឱ្យមានការយល់ដឹងកាន់តែប្រសើរអំពីលេខចុះបញ្ជីពិសេស និងលេខចុះបញ្ជីពិសេសផ្ទាល់ខ្លួន ដើម្បីបង្កើនប្រាក់ចំណូលជាតិឱ្យកាន់តែប្រសើរឡើងថែមទៀត។ លោកស្រីបន្តថា គណៈកម្មការនឹងពិនិត្យលទ្ធភាពជួបប្រជុំជាមួយនឹងក្រុមហ៊ុននានា ដើម្បីធ្វើការផ្សព្វផ្សាយឱ្យក្រុមហ៊ុនទាំងនោះបានដឹងអំពីជម្រើស និងគោលការណ៍រួមដែលត្រូវផ្តល់ជូនទាក់ទងនឹងការទិញលេខចុះ បញ្ជីពិសេស និងលេខចុះបញ្ជីពិសេសផ្ទាល់ខ្លួន៕