សម្តេចតេជោ ហ៊ុន សែន ថ្លែងរំលឹកថា យុទ្ធសាស្ត្រកសាងផ្លូវរបស់កម្ពុជា តាំងពីឆ្នាំទសវត្ស ៩០មក រហូតដល់ឆ្នាំ២០០០ មក យើងគិតតែខិតខំកសាងផ្លូវថ្នល់ដែលមានទំហំ ត្រឹម១១ម៉ែត្រ ដោយចាក់កៅស៊ូធម្មតាតែប៉ុណ្ណោះ តែបច្ចុប្បន្នមានផ្លូវល្បឿនលឿនជាច្រើនខ្សែរបានតភ្ជាប់ការធ្វើដំណើរឆ្លងកាត់ពីខេត្តមួយទៅកាន់ខេត្តមួយ។ សម្តេចតេជោ ថ្លែងបែបនេះ នៅថ្ងៃទី០២ ខែមីនា ឆ្នាំ២០២២នេះ ក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការ នៅកំណាត់ផ្លូវជាតិលេខ៣ភ្នំពេញ-កំពត ប្រវែងជាង១៣៤គីឡូម៉ែត្រ សម្រាប់ប្រើប្រាស់នូវសមិទ្ធផលដ៏មានសារៈប្រយោជន៍សម្រាប់ជាតិ និងប្រជាជនកម្ពុជា។ សម្តេចតេជោ ហ៊ុន សែន ថ្លែងបន្តថា ផ្លូវជាតិលេខ ៣ មានចំនួនចរាចរណ៍ធ្វើដំណើរទៅ-មក មានចំនួនសន្ធឹកសន្ធាប់ ហើយទន្ទឹមមានតម្រូវការប្រើប្រាស់ចាំបាច់ផង អមទៅដោយកំណាត់ផ្លូវជាតិលេខ ៣ នេះមានសភាពទ្រុឌទ្រោមខ្លាំង ទើបសម្តេចតេជោ បានស្នើសុំឱ្យមិត្តចិន ជួយពង្រីកផ្លូវជាតិលេខ ៣ ដែលជាផ្លូវមួយខ្សែជួយសម្រួលដល់ការធ្វើដំណើររវាងខេត្តទាំង ៥ រួមមាន ខេត្តតាកែវ កែប កំពត ព្រះសីហនុ និងខេត្តកំពង់ស្ពឺ៕